བདག་གི་སྙིང་ཁོང་ནས་དྲན་པའི་བཤེས་གཉེན་རྣམས་ལ་ཕུལ།
བདག་གི་སྙིང་ཁོང་ནས་དྲན་པའི་བཤེས་གཉེན་རྣམས་ལ་ཕུལ།
ཁྱེད་ནི་འཇིག་རྟེན་འདི་ཡི་ཡོད་ཚད་དེ།།
ཤེས་བྱའི་མཁའ་ལ་བསྐྱོད་པའི་འདབ་གཤོག་དང་།།
རྨོངས་པའི་མཚོ་ལས་སྒྲོལ་བའི་གྲུ་ཆེན་ཏེ།།
མུན་པའི་རྒྱ་ལས་འགྲོལ་བའི་ཉིན་བྱེད་ལགས།།
བཤེས་གཉེན་དམ་པའི་གསུང་རྒྱུན་རེ་རེ་ལས།།
མུན་པའི་གླིང་ལ་སྣང་གསལ་རེ་རེ་འཕྲོ།།
གཡོ་ཟོལ་བྲལ་བའི་འཛུམ་མདངས་རེ་རེ་ཡིས།།
ཤེས་རྨོངས་བདག་ལ་དྲོ་སྐྱིད་རེ་རེ་བསྩལ།།
ཁྱེད་ཀྱི་གམ་དུ་འཚོ་བའི་སྐྱེས་བོ་རྣམས།།
དབང་ཆེན་དཔོན་དང་འབྱོར་ལྡན་མིན་ལགས་ཏེ།།
ཤེས་རབ་མིག་ལྡོངས་འགྲོ་བ་བདག་ཅག་ལ།།
བརྩེ་བའི་ཐུགས་ཀྱིས་གཟིགས་པ་སྙིང་ནས་དྲན།།
བདག་གི་སེམས་སུ་སྨགས་རུམ་ཐིབ་དུས་སུ།།
ཁྱེད་ཀྱིས་སྣང་གསལ་སྟོང་གི་སྐུར་བཞེངས་ཏེ།།
ཤེས་རབ་མིག་ཟུང་སྩོལ་བའི་གཏོང་ཕོད་ཅན།།
ཁྱེད་ལ་འགྲན་པའི་དྲིན་ཅན་སུ་ཞིག་ལགས།།
ཁྱེད་ཀྱི་གཟི་འོད་དྲོན་མོས་སྐྱོང་དུས་སུ།།
སློབ་ལ་མ་བརྩོན་རྣམ་གཡེང་གྲོགས་སུ་བསྟེན།།
ད་ཆ་ཁྱེད་དང་བྲལ་བའི་ས་མཐའ་ནས།།
ཁྱེད་ཉིད་དྲན་པའི་མིག་ཆུ་ཁོང་ལ་བཞུར།།
དཀའ་ཁག་ལམ་ཆེན་བཟོད་པའི་སྟོབས་ཀྱིས་གཤགས།།
ཤེས་མེད་དབུལ་འཕོངས་ཤེས་རིག་ནོར་གྱིས་བསྐྱངས།།
གཏོང་བར་ཆུབ་པའི་དགེ་བའི་བཤེས་གཉེན་རྣམས།།
ས་སྟེང་འདི་ཡི་དབྱིག་མཆོག་མིན་ན་ཅི།།
འཛམ་གླིང་དགེ་རྒན་གྱི་དུས་ཆེན་ཉིན་བཀའ་དྲིན་ཅན་གྱི་དགེ་བའི་བཤེས་གཉེན་རྣམས་དྲན་བཞིན་དུ་མ་ཡུམ་ས་རཱ་ནས་བྲིས་པ་དགེའོ།།
