༄༅།། འགྱུར་ལྡོག་ཁྲོད་ཀྱི་ཚོར་འདུ།།
ཁེར་རྐྱང་གི་འཚོ་བ་འཁྱག་ལ་འབྱར།།
གྲང་རླུང་གིས་གཡུ་མདོག་ཤོ་བོར་བཟོས།།
ངོ་གདོང་གི་འཛུམ་རས་གཞན་དུ་བསྒྱུར།།
ཡིད་ཆད་ཀྱིས་མགོ་བོ་བྲང་ལ་སྨད།།
ལྷགས་རླུང་གིས་ཁུལ་བའི་ལོ་ཟླ་དེར།།
འཆི་གསོན་གྱི་ངོ་ཁ་འདི་ན་རྒས།།
མི་ཚེ་ཡི་རིན་ཐང་བྲོས་དུས་ཐལ།།
མི་ཡུལ་གྱི་འགྱུར་ལྡོག་ཁད་ཀྱིས་ཡལ།།
མི་སེམས་ཀྱི་བདེ་སྐྱིད་དབྱིངས་སུ་ཡིབ།།
ཆག་འཇུག་གི་མཚོ་མོ་ཡང་ཡང་འཁྱིལ།།
འགྲན་རྩོད་ཀྱིས་གཡུར་ས་ཆེ་རུ་བྱིན།།
སྐྱོ་སྣང་གི་འགུག་གླུ་ལེན་སྙིང་འདོད།།
སྨུག་སྤྲིན་གྱི་ན་བུན་རི་ལ་འཁྱིལ།།
སུན་སྣང་གི་རླུང་བུ་སེམས་ན་ལྡང་།།
སེམས་གཏིང་གི་ཚོར་འདུ་གདུ་ཉིན་སྐབས།།
སྐྱོ་འགུལ་གྱི་དབྱངས་རྟ་ཤོར་དེ་ཐལ།།
གསེར་རྟ་བསོད་ནམས་ཕུན་ཚོགས་སམ་དཔལ་ཤུལ་འབྲོང་སྲས་སུ་འབོད་པས་ བོད་ཀྱི་ཟློས་གར་ཚོགས་པའི་ཉེ་འཁྲིས་སུ་སུག་བྲིས་བགྱིས་སོ།། ༢༠༡༢ ༩ ༡༤