དཔའ་བོ་འཇམ་དཔལ་ཡེ་ཤེས་ཀྱི་རྗེས་དྲན།
དེ་རིང་ཞོགས་པར་“རྒྱལ་གཅེས་དཔའ་བོ་འཇམ་དཔལ་ཡེ་ཤེས་མཆོག་གི་རྗེས་དྲན་ཕ་སྐད་གཙང་མའི་འགྲན་བསྡུར་”ཞེས་པ་ཞིག་འཚོགས་ཏེ། ཐ་སྙད་དེ་དག་སྡེ་ཚན༡༠ རུ་བགོས་ཏེ་འགྲན་རྩོད་བྱས་རྗེས་ནོར་གླིང་མཐོ་སློབ་ཨང་པོ་དང་། ཤེས་རབ་དགའ་ཚལ་གླིང་ཨང་གཉིས་པ། ས་རཱ་མཐོ་སློབ་ཨང་གསུམ་པ་ཆགས་ཡོད་པ་རེད།
དེ་ཡང་ཟླ་འདིའི་ཕྱི་ཚེས་༡༠ ཉིན་དྷ་སར་རྟེན་གཞི་བྱས་པའི་ཤེས་རབ་དགའ་ཚལ་སློབ་གླིང་གི་གོ་སྒྲིག་འོག སློབ་གྲྭ་དེའི་སློབ་ཟུར་རྒྱལ་གཅེས་དཔའ་བོ་འཇམ་དཔལ་ཡེ་ཤེས་དང་། འབྲི་རུ་དགུ་འགྲུབ་གཉིས་ཀྱི་རྗེས་དྲན་ཆེད་ཕ་སྐད་འགྲན་སྡུར་གྱི་མཛད་སྒོ་ཞིག སློབ་གྲྭ་དེའི་ཚོགས་ཁང་དུ་འཚོགས་སོང་ལ། མཛད་སྒོའི་སྐུ་མགྲོན་གཙོབ་བོར་ཤེས་རིག་ལས་ཁུངས་རྩོམ་སྒྲིག་སྡེ་ཚན་གྱི་འགན་འཛིན་ཀརྨ་སྨོན་ལམ་གྱིས་དབུས། ནོར་གླིང་མཐོ་སློབ་ཀྱི་སློབ་སྤྱི་སྤྱི་འཐུས་སྒྲོལ་དཀར་སྐྱབས་དང་། ཤེས་རབ་དགའ་ཚལ་སློབ་གླིང་གི་སློབ་སྤྱི་དང་འགན་འཛིན། གཞན་ཡང་སློབ་གྲྭ་དེའི་དགེ་རྒན་དང་རྣམ་པ་དང་སློབ་མ་བཅས་མཉམ་འཛོམས་བྱས་འདུག
མཛད་སྒོའི་ཐོག་མར་ཚོགས་བཅར་བ་ཚང་མ་སྐུ་བཞེངས་ཀྱིས་བོད་རྒྱལ་ཁབ་ཆེན་པོའི་རྒྱལ་གླུ་བཏང་མཚམས། བོད་མི་རིགས་དང་རྒྱལ་ཁབ་ཀྱི་ཆེད་རང་སྲོག་བློས་བཏང་བའི་རྒྱལ་གཅེས་དཔའ་བོ་དཔའ་མོ་ཡོངས་ལ་མྱ་ངན་གུས་འདུད་ཆེད་ངག་བཅད་སྐར་མ་གཅིག་བྱས་ཏེ་མཛད་སྒོ་དངོས་སུ་དབུ་འཛུགས་བྱས་སོང་།
ཐེངས་འདིའི་འགྲན་སྡུར་ནང་མཉམ་ཞུགས་པ་ས་རཱ་མཐོ་སློབ་དང་། ནོར་གླིང་མཐོ་སློབ། ཀརྟི་མཐོ་སློབ། སྨན་རྩིས་མཐོ་སློབ། ཤེས་རབ་དགའ་ཚལ་སློབ་གླིང་བཅས་ཀྱི་ཚོགས་མི་༡༠ རེ་མཉམ་ཞུགས་བྱས་འདུག་ལ། འགྲན་སྡུར་བྱེད་སྟངས་དེ་ཡང་ཅ་ལག་ལ་བལྟས་ཏེ་མིང་འབྲི་བ་དང་། དབྱེ་འབྱེད། དངོས་མིང་སྡེབ་འབྲི། མང་ཤེས་མང་ཐོབ། དཔོད་བྲིས། ནོར་བཅོས། མགྱོགས་འབྲི། ཆ་ཤས། དཔེ་རིས་ངོས་འཛིན། མྱུར་རྩལ་བཅས་རིགས་ཚན་བཅུ་རུ་བགོས་ཏེ་འགྲན་སྡུར་བྱས་སོང་།
འགྲན་སྡུར་སྐབས་ཐ་སྙད་ཀྱི་གཞི་འཛིན་ས་དེ་བོད་ནས་མཁན་པོ་ཚུལ་ཁྲིམས་བློ་གྲོས་སོགས་ཀྱིས་བསྒྲིགས་པའི། <<རྒྱ་བོད་དབྱིན་གསུམ་གསར་བྱུང་རྒྱུན་བཀོལ་རིས་འགྲེལ་མིང་མཛོད་>>ཅེས་པའི་དེབ་དེ་རེད་འདུག ཕ་སྐད་གཙང་མའི་འགྲན་སྡུར་འདིར་རྩ་བས་བརྒྱ་ཆ་༡༥༠ ཡོད་པ་ལས། ནོར་གླིང་མཐོ་སློབ་ཀྱིས་བརྒྱ་ཆ་༩༥་དང་། ཤེས་རབ་དགའ་ཚལ་སློབ་གླིང་གིས་བརྒྱ་ཆ་༩༡.༥ ། ས་རཱ་མཐོ་སློབ་ཀྱིས་བརྒྱ་ཆ་༨༦ རག་ཡོད་པ་རེད།
མཛད་སྒོའི་སྐུ་མགྲོན་གཙོ་བོ་ཤེས་རིག་ལས་ཁུངས་རྩོམ་སྒྲིག་སྡེ་ཚན་གྱི་འགན་འཛིན་ཀརྨ་སྨོན་ལམ་གྱིས་བོད་ཕྱི་ནང་གི་ཐ་སྙད་གསར་བའི་ཁྱད་པར་སྐོར་གྱི་གཏམ་བཤད་གནང་སྐབས། རྩ་བས་སྐད་ཡིག་གི་འཕེལ་རིམ་ངོ་སྤྲོད་དང་འབྲེལ་བརྗོད་དོན། “བར་ལམ་ཞིག་ནས་ཆབ་སྲིད་ཀྱི་གནད་དོན་དང་། སྤྱི་ཚོགས་ཀྱི་འགྱུར་བ། ཕྱིའི་གནོན་ཤུགས་མང་པོ་ཞིག་ལ་བརྟེན་ནས། ད་ལྟའི་ཆར་ང་ཚོ་གང་འཚམ་གྱིས་རྗེས་ལུས་ཐེབས་ཡོད་རེད་བསམ་གྱི་ཡོད། གང་ཡིན་ཟེར་ན། རྒྱ་གར་ལ་ཡོད་མཁན་ཚོ་ཡིན་ན་སོ་སོའི་ཉིན་རེའི་འཚོ་བའི་སྐད་ཆའི་ནང་། རྒྱ་གར་གྱི་སྐད་བསྲེས་ཀྱི་ཡོད་པ་ལྟར། ནུབ་ཕྱོགས་དང་ལུང་པ་གཞན་པར་ཡོད་མཁན་ཚོ་ཡང་གཅིག་པ་རེད། སོ་སོ་གང་དུ་ཡོད་སའི་ལུང་པའི་སྐད་དང་བོད་སྐད་བསྲེས་ནས་བེད་སྤྱོད་གཏོང་གི་ཡོད་རེད། ལྷག་པར་བོད་མི་མང་ཆེ་བ་བོད་ནང་ལ་ཡོད་རེད། དེར་བརྟེན། བོད་ནང་ལ་སྤྱི་ཚོགས་ཀྱི་འགྱུར་འགྲོས་དང་། ཆབ་སྲིད་ཀྱི་གནོན་ཤུགས་ཕྱོགས་མང་པོ་ཞིག་ནས་རྒྱ་སྐད་ཀྱི་ཤུགས་རྐྱེན་ཆེན་པོ་ཡོད་རེད། གནས་སྟངས་དེ་དེ་རིང་འདིར་ཡོད་པའི་མི་ཚང་མས་ཤེས་ཀྱི་ཡོད་རེད། དེར་བརྟེན། ཚང་མས་འགན་ཁུར་དགོས་ཀྱི་ཡོད་རེད་”ཅེས་དང་། བོད་ཕྱི་ནང་གཉིས་ཀྱིས་ཐ་སྙད་གསར་བཟོ་ལ་ཁྱད་པར་ཡོད་པ་མཐོང་གི་མེད་སྐོར་དང་། གལ་ཏེ་ཁྱད་པར་ཡོད་པ་ཡིན་ན་ཡང་དེ་ལེགས་ཆ་ཞིག་ལ་ངོས་འཛིན་གནང་གི་ཡོད་སྐོར་སོགས་བརྗོད་སོང་།
དེ་ནས་ཤེས་རབ་དགའ་ཚལ་སློབ་གླིང་གི་འགན་འཛིན་བུ་ཕྲུག་ཤསྟྲིས་སློབ་གྲྭའི་ངོ་སྤྲོད་ཀྱི་གཏམ་བཤད་གནང་སྐབས། སློབ་གྲྭ་འདི་༡༩༩༣ གྱི་ཕྱི་ཟླ་༤ པའི་བཙུགས་པ་ཞིག་ཡིན་སྐོར་དང་། ༢༠༡༡ ལོར་སློབ་གྲྭ་འདི་སམྦྷོཊའི་ཁོངས་སུ་ཚུད་ཡོད་སྐོར། དེ་བཞིན་སློབ་གྲྭ་འདི་ནས་སློབ་མཐར་ཕྱིན་པའི་སློབ་ཟུར་༩༥༠ བྱུང་ཡོད་སྐོར་དང་། ད་ལྟའི་ཆར་སློབ་མ་༣༡༥ དང་། དགེ་རྒན་དང་ལས་བྱེད་༥༤ ཡོད་སྐོར་སོགས་བརྗོད་སོང་།
ཐེངས་འདིའི་ཕ་སྐད་གཙང་མའི་འགྲན་སྡུར་གྱི་ཨང་དང་པོར་ཧིན་སྒོར་༡༠༠༠༠ དང་། གཉིས་པར་༧༠༠༠། གསུམ་པར་༥༠༠༠ ཡོད་པ་རེད་འདུག་ལ། ཨང་དང་པོའི་སྤྱིན་བདག་བསང་ཆུ་འབྲུག་བྷེ་དང་། ཨང་གཉིས་པའི་ སྦྱིན་བདག་སློབ་གླིང་དེའི་སློབ་ཟུར་བཀྲ་ཤིས་དོན་འགྲུབ། ཨང་གསུམ་པའི་སྦྱིན་བདག་གངས་ལྗོངས་འགྲིམ་འགྲུལ་ལས་ཁུངས་ཀྱི་འགན་འཛིན་ཟླ་བ་རིན་ཆེན་བཅས་ཡིན་པ་རེད།
འཇམ་དཔལ་ཡེ་ཤེས་ནི་ཁམས་རྟའུ་ནས་ཡིན་པ་དང་། ༢༠༠༦ ལོར་བོད་ནས་དྷ་སའི་གསོག་སྒར་ཤེས་རབ་དགའ་ཚལ་སློབ་གླིང་དུ་འབྱོར་བ་དང། དེ་རྗེས་ལྡི་ལིར་བསྡད་ཡོད་འདུག དུས་རྒྱུན་བོད་དོན་ལས་འགུལ་ག་རེ་སྤེལ་ཡང་ཁོང་ལས་འགུལ་ནང་མཉམ་ཞུགས་བྱེད་མཁན་ཞིག་ཡིན་འདུག ༢༠༡༢ ལོའི་ཕྱི་ཟླ་༣ ཚེས་༢༦ ཉིན་ལྡི་ལི་རུ་རང་ལུས་མེར་བསྲེག་གིས་ཧུའུ་ལ་ངོ་རྒོལ་བྱས་པར་བརྟེན་སྐུ་གཤེགས་ཡོད་པ་རེད།
དེ་བཞིན་༢༠༡༢ ལོའི་ཕྱི་ཟླ་༡༠ ཚེས་༤ ཉིན་བོད་ནང་གི་ནག་ཆུ་གྲོང་ཁྱེར་གྱི་ཁྲོམ་གཞུང་དུ། ཁམས་འབྲི་རུ་ནས་ཡིན་པའི་དགུ་འགྲུབ་ཟེར་བ་ཞིག་གིས་རྒྱ་གཞུང་ལ་ངོ་རྒོལ་གྱིས་རང་ལུས་མེར་སྲེག་བཏང་སྟེ་སྐུ་གྲོངས་པ་ཡང་གསོག་སྒར་སློབ་གྲྭར་ཞུགས་མྱོང་ཡོད་པ་རེད།།
