མཐོང་ཐོས་འགའ
༡ ཚ་བ་ཆེ་བའི་མཚན་མོ་འདི་དག་ལ།།
སུ་དང་གང་གིས་མཐོང་ཐོས་མ་གྱུར་པའི།།
གནའ་དང་དེང་གི་ལུགས་སྲོལ་མང་པོ་ཞིག།
སྙིང་གི་དཀྱིལ་དང་ཀླད་པའི་སྦུབས་སུ་འཚང་།།
༢ མགོ་བོ་ན་ཞིང་རྐང་པ་སྦྲིད་པ་དང་།།
མིག་འོད་ཤོར་ཏེ་དྲན་པ་ཉམས་ན་ཡང་།།
ཟབ་གསལ་སེམས་ཀྱི་ཁ་ཕྱོགས་མི་ནོར་ཆེད།།
མདུན་ནས་མདུན་དུ་བགྲོད་པ་མང་པོ་ཞིག།
༣ རྣམ་རྟོག་ཆེ་བའི་ཁོར་ཡུག་དོག་པོ་རུ།།
རྣམ་རིག་བསྒྲིམས་ཏེ་ཕྱོགས་དང་མཚམས་སོ་ནས།།
ཆུ་བུར་མིག་ལ་དཀའ་ངལ་འཕར་མ་ཞིག།
སྤྲད་པའི་ངང་ཚུལ་ལུས་དང་གྲིབ་མ་བཞིན།།
༤ གསལ་རིག་སེམས་ཀྱི་རྣམ་གཞག་མང་པོ་ཞིག།
བློ་ལ་འཛིན་ཅིང་ཡིད་ལ་འཐད་ན་ཡང་།།
བསམ་བློ་རང་དབང་ཉིན་མོ་སྐར་མ་དང་།།
དོགས་པ་ཞིག་གིས་ཡོད་ཚད་རྒྱང་དུ་གཡུགས།།
༥ མི་ཡིས་དུད་འགྲོ་སྲུང་ཞིང་སྐྱོབ་པ་ཡི།།
ལོ་རྒྱུས་མང་ཞིང་ཚུལ་དང་མཐུན་ན་ཡང་།།
མི་ཡིས་མི་སྲུང་དཀའ་ཚེགས་ཆེ་བ་དང་།།
སུ་ཡིས་བལྟས་ཀྱང་ངན་པ་ཉིད་དུ་མཐོང་།།
༦ ཅི་སྟེ་སེམས་ལ་དྲི་མེད་ཀུན་སློང་དང་།།
ལུས་གཡོ་གོམ་སྟབས་ལུས་ལ་འཕྲོད་གྱུར་ན།།
ཁ་དང་ལག་པ་ཅུང་ཟད་འགུལ་བ་འདི།།
ཐག་རིང་ཞིག་གི་ས་ལ་དོར་ན་འགྲིག།