གླུ་ལེན་དབུགས་ཐེངས་གཅིག་མ།
གླུ་ལེན་དབུགས་ཐེངས་གཅིག་མ།
ལས་དབང་ཁ་ཡིག་གཅིག་པའི།།
ཆུང་འདྲིས་བྱམས་པ་ངེད་གཉིས།།
ཤི་ན་དུར་རྡོ་གཅིག་པའི།།
གྲོས་ཁ་རུམ་ནས་འཆམ་མྱོང་།།
བརྩེ་བ་ཕར་ལ་བཅངས་ཡོད།།
སྙིང་གཏང་ཚུར་ལ་བཤད་སོང་།།
ཆུ་རྐྱང་ཕོ་གར་ཡོད་ན།།
ཕྱེད་བགོ་བྱེད་ཡོང་གསུང་སོང་།།
ཆུ་དང་ཉ་མོ་འདྲིས་འདྲིས།།
ང་དང་ཁྱོད་ལ་འདྲིས་སོང་།།
ལུས་དང་སེམས་པ་གཉིས་པོས།།
བདག་པོ་ང་ཡིན་གསུངས་ཐལ།།
དང་པོ་འཛུམ་གྱིས་ཁྲིད་ཐལ།།
གཉིས་པ་བརྩེ་བས་བསླུས་ཐལ།།
ལས་དབང་ཐོད་པའི་རི་མོ།།
ཡར་ནས་མར་ལ་འཐེན་འདུག།
ནམ་མཁའ་ཡར་ལ་ལངས་དུས།།
དཀོན་མཆོག་མིང་ནས་བོས་ཏེ།།
ཁྱོད་ལ་བར་ཆད་མེད་པའི།།
གསོལ་བ་སྨོན་ལམ་བཏབ་ཡོད།།
དགོང་མོ་མར་ལ་ཉལ་དུས།།
སེམས་པ་རྣལ་ལ་ཕབ་ཅིང་།།
ལག་པ་བྲང་ལ་བཞག་ནས།།
ལྷ་སྐུ་ཡིད་ལ་བྱས་ཡོད།།
ཟླ་བ་ཁེར་འགྲོས་དེ་ཡིས།།
ང་ལ་སྐྱོ་རོགས་གནང་སོང་།།
སྐར་མའི་མི་སྐད་གོ་ན།།
སེམས་གཏམ་བཤད་དགོས་བསམ་བྱུང་།།
ལྷ་སའི་པོ་ཏཱ་ལ་ནས།།
གྲུབ་ཐོབ་ཚངས་དབྱངས་རྒྱ་མཚོ།།
སེམས་པ་བརྩེ་བས་ཁེངས་དུས།།
སྙན་རྩོམ་ཆུ་བོ་འབབ་འབབ།།
གེ་སར་བདུད་ལ་འགྲོ་ཁ།།
འབྲུག་མོའི་མིག་ཆུ་མོད་ཅིང་།།
རྟ་ཁ་ལག་གིས་འཇུ་ནས།།
ངོ་གདོང་མཆི་མ་ཤུར་ཤུར།།
རྣལ་འབྱོར་མི་ལ་རས་པ།།
མཛེ་སེར་གྱེས་ཕྱག་ཕུལ་དུས།།
ཕྱི་ལྟས་ལན་གྲངས་མང་ཞིང་།།
ཤུགས་རིང་དབུག་ཁ་འཚང་འདུག།
མཚོ་མོ་དར་ཁ་འགྲིགས་དུས།།
ངང་པ་ལྷོ་ལ་བསླེབས་ཐལ།།
ཤིང་ལོ་ས་ལ་འཐོར་དུས།།
གྲང་རླུང་ལྷག་པ་འུར་ཐལ།།
འདས་སོང་ཕྱིར་མིག་བྱ་དུས།།
དབྱར་ཟླ་དང་པོ་སྐྱིད་ཐལ།།
སྟོན་ཟླ་མ་བསླེབས་སྔོན་ནས།།
དགུ་ཟླ་གསུམ་པ་འཁྱག་ཐལ།།
༢༠༡༢་སྤྱི་ཟླ་༩་པའི་༢༠་ལ་དེབ་ཀློག་གི་བར་གསེང་ནས་གྲོགས་པོ་ཞིག་གིས་བསྐུལ་ངོ་ལ་བྲིས་པ་ཡིན།