༄༅།།བོད་བཙན་པོའི་མཛད་པ་།།
མི་ལོ་སྟོང་གི་ཡར་སྔོན་ཞིག་ནས་།།
སྒང་པ་བོད་ཀྱི་རིགས་བརྒྱུད་བྱུང་།།
ཤིན་ཏུ་མཚར་བའི་རྩིད་འཇོའི་སྤྱོད་པས་།།
རིགས་པའི་གཞིང་དུ་དལ་གྱིས་བསྐྱལ་།།
སྣ་ཚོགས་འཚོ་བའི་འབྱུང་ཁུངས་བཙལ་ཏེ་།།
རིགས་བརྒྱུད་དུ་མས་མཐོ་སྒང་ཁེངས་།།
རུ་ཚོ་དུ་མ་གཅིག་ཏུ་བསྒྲིལ་ནས་།།
གསུམ་གཉིས་ས་ཡི་དཀྱིལ་འཁོར་བཟུངས།།
རྗེ་འབངས་ཡོངས་ཀྱི་བློ་སེམས་མཐུན་ཏེ་།།
སྐད་བརྡ་རིགས་པའི་སྒོ་མོ་ཕྱེས །།
ཟབ་ཅིང་རྒྱ་ཆེའི་ཆོས་ཀྱི་རིགས་པ་།།
ས་མཐོའི་བོད་ཀྱི་གཏེ་བར་དཔེལ་།།
བཙན་པོའི་རྟ་དམགས་ཁྲི་ཚོ་དུ་མ་།།
རྒྱ་ཡི་ཡུལ་དུ་དྲངས་བྱས་ཏེ་།།
རྒྱ་ཡི་རྒྱལ་པོ་རང་སར་མ་ཚུགས་།།
ས་མཐའི་ཡུལ་དུ་བྲོས་དགོས་ཐལ།།
བློ་ཡི་ཡུལ་དུ་འགྱུར་བར་དཀའ་བའི་།།
གཏམ་རྒྱུད་དུ་མ་རི་མོར་བཀོད་།།
ཞི་མཐུན་རྡོ་རིང་ས་ཕྱོགས་གང་སར་།།
བཙན་གྱིས་བཙུགས་པ་ཀུན་གྱིས་ཤེས་།
།
རྒྱ་དང་བལ་གྱི་ལོ་པན་དུ་མ་།།
ས་མཐོའི་ལྗོངས་སུ་གདན་དྲངས་ཏེ་།།
བུ་རམ་ཤིང་པའི་བཀའ་དང་དགོངས་འགྲེལ་།།
ཁ་བའི་སྤྱན་གྱི་ཡུལ་དུ་བསྐྲུན་།།
འདི་དང་ཕྱི་མའི་བདེ་སྐྱིད་དོན་དུ་།
གངས་པའི་སེམས་སུ་ནན་གྱིས་བཅུགས་།།
དེ་དང་དེ་འདྲའི་མཛད་བཟང་དུ་མ་།།
འདྲའི་བློ་ཡིས་དཔག་པར་དཀའ་།།
ཁྲི་རལ་རྒྱལ་པོས་རྡོ་རིང་ངོས་སུ་།།
དབོན་ཞང་མཐུན་པའི་རྡོ་རིང་བཙུགས་།།
རྒྱ་ཡུལ་རྒྱ་དང་བོད་ཡུལ་བོད་ཞེས་།།
སོ་སོའི་མཚན་ནས་ལེགས་པར་བསྐོས་།།
འདྲ་འདྲའི་དབར་བས་སོ་སོའི་དབར་ན་།།
ཕོ་ཉ་གཏོང་བའི་ལམ་སྲོལ་བཏོད་།།
གནས་བཞག་སྤུན་གྱི་གྲོགས་སུ་བྱས་ནས་།།
གཞི་མཐུན་བསམ་པས་རང་ས་བསྐྱངས་།།
སྒང་པའི་འགྲོ་སྐུན་བདེ་བའི་དོན་དུ་།།
དབུལ་ཕྱུག་ལན་གསུམ་བཀའ་ཡིས་མཉོམས་།།
དག་པ་ཆོས་ཀྱི་མཐུན་རྐྱེན་བསྒྲུབ་ཕྱིར་།།
སེར་མོའི་སོགས་ལ་འགྲོ་མང་བྱིན་།།
དེ་ལྟར་མཐོ་སྒང་བདེ་བར་དགོངས་ཀྱང་།།
ངན་པའི་ཚོགས་ཀྱིས་གནོད་བྱས་སྟེ་།།
ཕུགས་འདུན་བཟང་པོ་ཐུགས་ལ་བཅང་བཞིན་།།
ཕྱི་མའི་ཡུལ་དུ་གཞན་གྱིས་བསྐྱལ་།།
གླང་དར་རྒྱལ་པོས་སྲིད་དབང་བཟུང་སྟེ་།།
དམ་པའི་ལྷ་ཆོས་དུག་ཏུ་དགོངས་།།
གོས་སེར་ཅན་རྣམས་སྐྱ་ས་ཕབས་ཏེ་།།
ལྷ་ཁང་ནང་དུ་གཤས་ལ་བཙུགས་།།
བཀའ་དང་དགོངས་འགྲེལ་མེ་རུ་བསྲེགས་ཏེ་།།
དྭངས་བའི་ཞིང་ཁམས་མུན་དུ་བསྒྱུར་།།
མཐས་མ་མེས་པོའི་རྡོ་རིང་ཀློག་བཞིན་།།
སྲོག་གི་དབང་པོ་གཞན་གྱིས་བཀག།
དེ་ལྟར་བསམ་ཚེ་བཙན་པོ་ཉེར་གཉིས་།།
གངས་རིའི་དོན་དུ་རང་སྲོག་འཇིགས།།
མཛད་བཟང་སྟོང་གིས་གང་པའི་བུ་རྒྱུད་།།
བདེ་བའི་གཞིང་དུ་ལེགས་པར་བསྐོད་།།
ད་ལྟའི་བར་དུ་ཁྱོད་ཀྱི་མཛད་བཟང་།།
ཁྱོར་བཞིན་ཁྱོར་བཞིན་གྱེན་དུ་ལངས་།།
སྲིད་མཐའི་བར་དུ་ཁྱོད་ཀྱི་ཤུལ་བཞག་།།
འཇིག་པར་མི་ནུས་བཙན་པོ་ལགས་།།
ཅིས་པ་འདི་ནི་སྟག་ཚང་རིག་རྒོད་དུ་འབོད་པས་གཞན་ཡུལ་ས་མཐའ་ནས་བོད་བཙན་པོའི་མཛད་པ་ལ་ཅུང་ཙན་དྲན་པའོ་།། །།