ངོས་རང་ལོ་༡༦སྐབས་རང་དབང་བརླགས་སོང་།

ཐེངས་འདིར་༧གོང་ས་མཆོག་གིས་ཨ་རི་དང་ཨིན་ཡུལ་ཁུལ་གྱི་མཛད་འཕྲིན་སྐབས་གཙུག་ལག་སློབ་གྲྭ་དགུ་དང་། སློབ་ཕྲུག་དང་མི་མང་བཅས་ཁྱོན་མི་གྲངས་༧༣༠༠༠ བརྒལ་བར། བཀའ་ཆོས་དང་བཀའ་སློབ་སོགས་གནང་ཡོད་པ་རེད་འདུག་ལ་ཟླ་འདིའི་ཕྱི་ཚེས་༢༤ ཉིན་རྒྱ་གར་དུ་ཕེབས་ཡོད་པ་རེད་འདུག

དེ་ཡང་བོད་མིའི་སྒྲིག་འཛུགས་ཀྱི་དྲ་རྒྱར་གནས་ཚུལ་སྤེལ་གསལ་ལྟར་ན། ཟླ་འདིའི་ཕྱི་ཚེས་༢༣ ཉིན་༧གོང་ས་མཆོག་གིས་ཨ་རིའི་ཁུལ་གྱི་མཛད་འཕྲིན་རྣམས་ལེགས་པར་གྲུབ་སྟེ། དབྱིན་ཡུལ་གྱི་རྒྱལ་ས་ལོན་ཌོན་དུ་ལེ་གྷ་ཊམ་(legatum Institute) བསྟི་གནས་ཁང་གི་ཚོགས་ཁང་དུ་ཆིབས་སྒྱུར་བསྐྱངས་ཏེ། བཟང་སྤྱོད་བརྒྱུད་འཛམ་གླིང་གི་གནས་སྟངས་བཟང་དུ་གཏོང་ཐབས། (Ethics for a More Prosperous World) ཞེས་པའི་བརྗོད་གཞིའི་ཐོག་བཀའ་སློབ་གནང་སྐབས། ང་ཚོ་ཚང་མ་འགྲོ་བ་མིའི་རིགས་གཅིག་མཚུངས་ཆགས་ཡོད། ང་ཚོར་དེང་སྐབས་འཕྲད་བཞིན་པའི་འཛམས་གླིང་གི་དཀའ་ངལ་ཉུང་དུ་གཏོང་དགོས་པ་དེ་དག་འཛམ་གླིང་ནང་གི་འགྲོ་བ་མི་རིགས་ཚང་མར་གཅིགས་མཚུངས་སུ་འཕྲད་བཞིན་པའི་དཀའ་ངལ་ཞིག་ཡིན་པར་བརྟེན། ང་ཚོས་མི་དང་མི་ཕན་ཚུན་གོ་རྟོགས་སྤེལ་བ་བརྒྱུད་དཀའ་ངལ་དེ་དག་སེལ་ཐབས་བྱེད་དགོས། གང་ཡིན་བརྗོད་ན་ང་ཚོ་སྤྱི་ཚོགས་ལ་བསྟེན་པའི་སེམས་ཅན་ཞིག་ཡིན་སྟབས། ཕན་ཚུན་གོ་རྟོགས་སྤེལ་བ་བརྒྱུད་ཕྱར་གྲུ་མཉམ་འདེགས་ཐོག་ནས་ལས་དོན་བསྒྲུབ་རྒྱུ་ཡིན་པ་དེ་ཆོས་ཉིད་ལྟ་བུ་ཡིན་ཞེས་དང་།

ཡང་ཁོང་གིས་མུ་མཐུད་དུ་ང་ཚོས་རང་དོན་ཙམ་མ་ཟད། གཞན་དོན་ཆེད་བསམ་བློ་གཏོང་དགོས། ངོས་རང་ད་ལྟ་ལོ་༧༧ ལ་བསླེབས་ཡོད། ངོས་རང་ལོ་༡༦ སྐབས་རང་དབང་བརླགས་སོང། དེ་ནས་རང་ལོ་༢༤ སོན་སྐབས་ལུང་པ་ཤོར་བ་རེད། ངོས་རང་སྐྱེས་ནས་མི་རིང་བར་རྒྱ་ནག་དང་ཉི་ཧོང་དབར་དམག་འཐབ་བྱུང་བ་དང། དམག་ཆེན་གཉིས་པའི་དུས་སྐབས་ཁེལ་ཏེ་ཀོ་རི་ཡ་དང་ཝེ་ཐི་ནམ་དམག རྒྱ་གར་དང་པ་ཀི་སི་ཐན་དུམ་བུར་བགོས་པའི་རྩོད་རྙོག་སོགས་ངོས་ཀྱི་མི་ཚེའི་ནང་དྲག་སྤྱོད་ཤུགས་ཆེ་དངོས་སུ་མཐོང་ཡོད། དུས་རབས་༢༠ ནང་ཚན་རིག་དང་འཕྲུལ་རིག་ཐོག་ཡར་རྒྱས་ཧ་ལས་པ་བྱུང་ཡོད་ནའང། དུས་རབས་དེ་མི་གསོད་ཁྲག་སྦྱོར་གྱི་དུས་རབས་ཤིག་ཀྱང་ཆགས་ཡོད།

དེར་བརྟེན་དུས་རབས་༢༡ དེ་བཞིན་མི་འདྲ་བ་ཞིག་དགོས་ཚེ་དཀའ་ངལ་སེལ་རྒྱུའི་ཐབས་ལམ་ལ་འགྱུར་བ་བཏང་སྟེ་བཟང་སྤྱོད་ཀྱི་ཐབས་ལམ་ལ་གཞི་བཅོལ་རྒྱུ་ཧ་ཅང་གལ་ཆེན་པོ་ཆགས་ཡོད། དེ་འདྲ་ཞིག་ཡོང་བར་ཤེས་ཡོན་དེ་ཧ་ཅང་གལ་ཆེན་པོ་ཆགས་ཡོད། དེང་སྐབས་ང་ཚོས་རྣམ་དཔྱོད་བེད་སྤྱོད་ཐོག་འགྲོ་བ་མིའི་གཞི་རིམ་གྱི་བཟང་སྤྱོད་གོང་མཐོར་གཏོང་དགོས་པའི་དུས་ལ་བབ་ཡོད། དེ་འདྲ་ཞིག་བྱུང་ཚེ་འཛམ་གླིང་བདེ་སྐྱིད་ལྡན་པ་ཞིག་ཆགས་རྒྱུ་ཡིན་སྐོར་སོགས་བཀའ་སློབ་གནང་ཡོད་པ་རེད།