སྤྱན་འདྲེན་གསོལ་འདེབས་གསར་མ།
རྒྱལ་མཚམས་དུ་མའི་ཆོད་པའི་ཕར་ཤེད་ནས།།
མཁའ་ལམ་སྤྲིན་པ་དཀར་པོའི་ཡང་གོང་ནས།།
མགྱོགས་ཚད་གློག་ལས་མྱུར་བའི་གནམ་གྲུ་ནས།།
དེང་དུས་སྤྲུལ་སྐུ་གནས་འདིར་སྤྱན་འདྲེན་ནོ།
རིན་ཆེན་ཀུ་ཤུ་འཕྲུལ་ཆས་ཕྱག་ལ་བསྣོམ།།
འདྲུད་འཐེན་ལྟོ་ཕེད་རྫིག་པོ་རྒྱབ་ནས་འཁྲིད།།
འཁོར་དུ་ཡོན་བདག་འབྱོར་ལྡན་ཚོགས་ཀྱིས་བསྐོར།།།
འདིར་བྱོན་བཅོལ་བའི་ཕྲིན་ལས་བསྒྲུབ་པར་མཛོད།།
མདུན་གྱི་འབོལ་གདན་བརྩེགས་པའི་ཡང་ཐོག་ཏུ།།
འོད་འབར་ཅོག་ཙེ་སྒྲིག་པའི་ཕར་ནང་དུ།།
སྐུ་མདོག་དུང་ལས་དཀར་བའི་སྤྲུལ་པའི་སྐུ།།
ཕྱག་མཆོད་བཀུར་སྟིའི་མགོན་དུ་བཞུགས་སུ་གསོལ།།
མདུན་དུ་རྒྱ་མོ་མཛེས་མས་ཐལ་སྦྱར་ཞིང་།།
ལག་ཏུ་ཡིག་ཁུ་དམར་པོ་འཛིན་བཞིན་དུ།།
སྐལ་ལྡན་བུ་སློབ་བསོད་ནམས་རྫོགས་པའི་ཕྱིར།།
དངོས་བྱོར་དངུལ་གྱི་མཆོད་པ་ཁྱེད་ལ་འབུལ།།
ནང་དུ་བཞུགས་ཁྲི་གཙང་མའི་གྲ་སྒྲིག་དང་།།
ཕྱི་རུ་རིན་ཆེན་ཆིབས་འཁོར་སྐྱེལ་འདྲེན་བཅས།།
བདག་ལ་དབང་བའི་འབྱོར་བ་མ་ལུས་པ།།
སྐྱབས་གསུམ་ཀུན་འདུས་སྤྲུལ་བའི་སྐུ་ལ་འབུལ།།
ཚེ་ལ་བར་ཆད་མེད་པའི་ཚེ་དབང་དང་།།
ནོར་ལ་ལོངས་སྤྱོད་འཕེལ་བའི་ནོར་དབང་དང་།།
ཁྱོ་ག་བཟང་པོ་རག་པའི་སྒྲོལ་དབང་སོགས།།
ཅི་འདོད་དབང་གི་དངོས་གྲུབ་བརྩལ་དུ་གསོལ།།
ཡིད་འོང་གྲུང་ཤ་དོད་པའི་སྤྲུལ་བའི་སྐུ།།
ཤ་མདངས་དཀར་རྩིས་བྱུགས་པའི་རིན་པོ་ཆེ།།
ཞལ་ལ་འཛུམ་གྱིས་ཁེངས་པའི་བརྩེ་བ་ཅན།།
སྐལ་ལྡན་སློབ་མ་རྗེས་འཛིན་མཛད་དུ་གསོལ།།
ཞལ་ཟས་རོ་བརྒྱ་བཅུད་ལྡན་ཟས་ཀྱིས་མཆོད།།
འདོད་ཡོན་སྣ་ལྔ་བདུད་རྩི་ཆང་གིས་མཆོད།།
གཉིས་སྦྱོར་བདེ་བ་ཆེན་པོ་ཡེ་ཤེས་ཀྱི།།
དམར་ཁྲིད་མྱོང་ཁྲིད་གནང་བའི་ཕྲིས་ལས་མཛོད།།
ལས་ཀྱི་ཕྱག་རྒྱ་ཐབས་ལ་མི་མཁས་ཤིང་།།
རྩ་བའི་དམ་ཚིག་ཆེན་པོར་འགལ་གྱུར་ན།།
གཉིས་མེད་སྟོང་པ་ཉིད་ཀྱི་ཀློངས་ཡངས་སུ།།
འཁོར་འདས་རོ་སྙོམས་ངང་ནས་བཟོད་པར་གསོལ།།
མཁའ་ནས་འཇའ་ལམ་སྣེ་མོ་མར་ལ་ཟུག
ཁོག་ནས་ཡིག་གེ་དྲུག་མའི་སྒྲ་དབྱངས་ལེན།།
རིགས་སྲས་སྐྱེས་བུ་དམ་པའི་ཡང་སྲིད་ཅིག།
དམ་ཚིག་སྒྲོལ་མའི་ལྷུམས་སུ་དངོས་གྲུབ་རྩོལ།།
༢༠༡༢་སྤྱི་ཟླ་༡༠་པའི་ཚེ་༣༠་ཞོགས་པར་བྲིས།