གྲོལ་བའི་སྙན་ངག་དུམ་བུ་དགུ་པ།
རང་བྱུང་སེམས་ཀྱི་གསང་བ་ས་ལེ་སྦྲམ།།
སྦས་པའི་སྐྲ་ལ་བལ་དཀར་ཆུ་རིས་གདོང་།།
རྒས་ཤིང་འཁོགས་པའི་སྣང་བརྙན་གསོན་པ་ཞིག།
ཚོར་འདུ་རགས་པའི་ཀློང་དུ་མེར་གྱིས་ཐིམ།།
སྟོང་ཆེན་ཆོས་དབྱིངས་དགའ་མའི་གུར་ཁང་ནས།།
མ་བཅོས་ཡེ་ཤེས་སྣང་བ་དུང་ཟླའི་གཟུགས།།
ངེས་དོན་གནས་ལུགས་འཕྲོད་པའི་རྟེན་འབྲེལ་ཞིག།
རྒྱ་ཆེན་སྒྱུ་མའི་གྲོང་ནས་རྙེད་པར་སྨོན།།
རྣམ་ཤེས་ལྷ་ལས་སྤྱང་བའི་རྒན་པོ་ཞིག།
འདྲེ་དང་འབྱུང་པོ་འདུལ་བའི་ལས་ལ་བྲེལ།།
བགྲང་ཕྲེང་གཉེར་བའི་གཟུངས་སྔགས་བྱིན་རླབས་རེ།།
ཞལ་གྱིས་འདབས་ནས་བདུད་རྩི་གོང་དུ་འགྲིལ།།
རི་སྐྱེས་བུ་མོ་སྟོང་གི་བག་ཡངས་དང་།།
ཆུ་སྐྱེས་མེ་ཏོག་འབུམ་གྱི་དྭངས་ཤ་ལ།།
ལྷན་སྐྱེས་དུང་བའི་ཤེར་རྟོག་ཡན་གར་བ།།
རིང་མོ་ཞིག་ནས་སེམས་ཀྱི་ཀློང་དུ་འཁྱུད།།
རྒན་པོའི་སྐྲ་དང་ཁ་སྤུའི་ཚོས་ཀ་དང་།།
གཞོན་པའི་སེམས་དང་ལུས་ཀྱི་སྟངས་ཀ་ལ།།
ཕན་ཚུན་སྐྱུག་མེར་ལང་བའི་བྱད་བཞིན་རེ།།
མི་མཐུན་ཡིད་ཀྱི་འཛིན་སྟངས་ཐ་དད་རེ།།
རྙིང་ཧྲུལ་ལྭ་བ་ཐེད་པོའི་བུག་སྒོ་ན།།
གཙག་རླུང་བྱེ་བས་གཙེས་ཀྱང་ཇི་མི་སྙམ།།
ཚོར་བ་རྒྱ་ཡན་བསྒོང་བའི་མར་སྣེ་ན།།
སག་པའི་དཔུང་ཤུགས་འདི་ཀོ་ཆ་མ་ཆོད།།
མངར་སྐྱུར་སིལ་མ་མྱོང་བའི་བྲོ་བ་ཞིག།
ཞིམ་མངར་བལྡག་གིན་རེག་གིན་འགྲམ་ཆུ་འཆོར།།
བསྟུད་ནས་མྱང་ན་སུན་པ་རྫུན་གྱི་གཏམ།།
མི་བདེན་རྣ་བའི་ཟེ་ནས་གཡང་ལ་བརྫངས།།
མི་མངོན་སྲིད་དོན་ཞགས་ནག་འདོམ་དགུ་མ།།
རྣམ་ཤེས་ཕྲ་མོའི་རྐང་ལ་སྙི་ཞིག་བཞག།
ལ་ཡན་ལུང་ཡན་བྱིང་བའི་འཆོལ་ཉོག་པ།།
རྣམ་དཔྱོད་སྟ་རེས་མི་གསེས་བཟོད་མ་ཡིན།།
ཆོག་ཤེས་སྲབ་མདའ་ནང་དུ་མ་དཀྱུས་བར།།
དྲན་ཤེས་སྨྱོན་པ་གཡང་ལ་མི་ཁོལ་ཞིང་།།
ལྷིང་འཇགས་ཟིལ་གྱིས་སློང་བའི་སུན་སྣང་རེས།།
ཁྱི་རྒན་རྒྱ་བོ་མལ་ནས་ཟིང་ཆ་བཀོལ།།
གྲུ་ཤན་སྐྱ་བས་འཕུལ་བའི་ཉ་པ་ཞིག།
འདམ་རྩའི་གསེང་ནས་གླུ་ངག་ཟི་རི་རི།།
གསེར་མིག་ཉ་མོའི་འགྱུར་ལ་མི་རྟོན་པ།།
མདུན་གྱི་ཕྱོགས་ལ་དམིགས་པ་ཆ་མ་ཆོད།།
བས་མཐའི་ཚལ་ན་ཤ་ཕོ་ཁེར་འགྲོས་ཤིག།
ཡུ་མོའི་རྐང་རྗེས་འཚོལ་བའི་སྣ་བཤུ་རེ།།
སུར་རློང་སྲིབ་ན་གཞིས་ཁྱིམ་མི་འཛུགས་པར།།
སྒང་ཟེ་དེད་ནས་རྫ་རིའི་ཕྱོགས་ལ་ཆས།།
ཤང་ཤང་ཆུ་མོ་བཞུར་བའི་ཚུར་འདབས་ཏེ།།
སྔོ་ལྗང་གཞུ་ལོ་འཐིབ་པའི་སྤང་ལྗོངས་ན།།
གཡང་དཀར་ལུ་གུ་རྩེད་བྲོ་འཁྲབ་བཞིན་དུ།།
བག་ཡངས་གཟན་ལ་རོལ་བའི་ཚུལ་ལ་ལྟོས།།
ཐང་ཤིང་ཡལ་ག་གྱེས་པའི་བསིལ་འོག་ན།།
སུམ་ཚུ་རྡོ་ལ་བསྔས་པ་རྫི་བོའི་ཇ།།
ཁོལ་ནས་ཞིམ་མངར་རྩམ་པའི་བྲོ་བ་ཞིག།།
མྱོང་བའི་མེ་ལོང་སེམས་ཀྱི་དཀྱིལ་ན་འཛུམ།།
དྭངས་གཙང་རྫིང་བུར་ཁྱིམ་གཞིས་བསྐྱ་བའི་བྱ།།
ཁྱོ་ཤུག་ངང་མོའི་དུང་བ་ནམ་མཁའི་མཐའ།།
མ་གཤེགས་དངོས་སུ་འཕོས་པའི་ལས་དབང་འདི།།
ཐོད་པའི་རི་མོ་ཞིག་ལས་འགྲེལ་ཐབས་དབེན།།
དཀོན་མཆོག་ལྷ་ཡིས་བསྐོས་པའི་ཡིད་ཆེས་ལ།།
ལས་འཕྲོས་བཅོས་ཀ་བྱས་པའི་རྒྱས་བསྟབས་ན།།
ཆུང་ཚག་ཉེས་པ་བསུབ་ལ་མཆོག་ཏུ་ཞེས།།
ཉམས་མྱོང་རྒན་པོའི་བསླབ་བྱ་ཚིག་གསུམ་ཡིན།།
༢༠༡༢།༡༠།༢༢།སཱ་ར་ནས།