མི་ཡུལ་གྱི་མྱོང་བའི་ལོ་ཟླ།
རེ་བའི་གསོན་སྐེ་ཧོབ་ཀྱིས་བཅད།
འདི་སྣང་གི་ཡོད་ཚོད་རྡོག་རིལ་བཏང་།
ཁྲག་གི་ཤག་སྒྲ་ཁད་ཀྱིས་བཞུར།། ད་དུང་ངོ་མི་གནོང་པར་ཧབ་བཤད་གང་མང་ལབ།
མི་ཡུལ་གྱི་གསོན་འདྲེ་ཟེར་བ་འདི་འདྲ་ཡིན་པར་སྙམ།
འདི་སྣང་གི་འོད་སྣང་རེ་རེ་མུན་ནག་གིས་ཕ་མཐར་བསྐྱལ།
བཅོས་མིན་གྱི་སུན་སྣང་སྙིང་ཁམས་ནས་བར་མེད་ལྡང་།
ལོ་ཟླའི་ཁུགས་སོ་ན་ཡ་ང་བའི་གཏམ་རྒྱུད་སྐྱུར་མོ་ཞིག།
རྫོགས་མ་ཚར་བའི་གྲང་རེག་གི་ལས་དབང་ཞིག།
བརྗོད་མ་ཚར་བའི་སྙིང་ནད་ཀྱི་གྱོད་གཞི་ནག་པོ་རེ།
སུན་སྣང་དང་འཇིགས་སྐྲག་གིས་སེམས་པ་དགུན་ཆུ་ལ་བསྐྱལ།
འོད་སྣང་ཡལ་བའི་ལོ་དེར་རང་སེམས་སྡུག་ལ་སྦྱར།
དེ་ནས་བཟུང་ཁེར་རྐྱང་གི་ཡུལ་ལུང་གང་མང་མགྲིམས་དགོས་བྱུང་།
དབྱིད་ཀའི་གྲང་རླུང་བར་མེད་ལྡང་བའི་ལོ་དེར།
སེམས་པའི་ཁ་མདོག་གཞན་ཞིག་ལ་འགྱུར།
མི་སེམས་ལ་རྣག་ཁྲག་གིས་ལོ་རྒྱུས་བཟོས།
འཛེམ་དོག་མེད་པར་སྐྱི་གཡའ་བའི་ནག་ཟླའི་རླུང་བུ་ཡང་ཡང་གཡུགས།
སྙིང་ཁོང་ནས་མཆེད་པའི་ཤུགས་རིང་དྲག་ཏུ་ཤོར། མི་ཡུལ་ལ་བཞག་པའི་ལོ་ཟླའི་གྱིས་སྡོམ་ཚིག་རེད །
ལོ་ཟླ་དེ་འཁྱག་རུ་འཁྱག་རུ།། སེམས་པ་བུ་ཡུག་གིས་རི་གྲོང་གང་མང་ལ་ཁུར།
གསེར་རྟ་བསོད་ནམས་ཕུན་ཚོགས་སམ་དཔལ་ཤུལ་འབྲོང་སྲས་སུ་འབོད་པས་
བོད་ཀྱི་རོལ་དབྱངས་ཁང་གི་ཉེ་འཁྲིས་ནས་སུག་བྲིས་བགྱིས་སོ། ༢༠༡༢ ༡༠ ༡༥