༄༅ མིག་ཆུའི་ཁྲོད་ནས་ཤུགས་རིང་།
སྐྱོ་ཤས་ཐང་ཆེན་རིང་མོའི་ལྷོ་ལམ་ན།།
ཀུན་རྟོག་ངོས་སུ་རྡུར་རླུང་ནག་པོ་འཁྲིགས།།
དུས་བཞིའི་འགྱུར་ལྡོག་སྟོང་གི་ཁུགས་སོ་ན།།
དཀའ་སྡུག་ལོ་རྒྱུས་འཁྲེགས་པོས་སེམས་ཁམས་དཀྲུགས།།
གངས་རིའི་ལས་དབང་འཐོར་བའི་ང་དགུའི་ལོ།།
སྤུན་ཟླའི་ཁྱིམ་གཞི་ལྷགས་པས་ཡང་ཡང་ཟོས།།
མིག་ཆུའི་ཆིག་ཤད་བྲིས་པའི་ལོ་རྒྱུས་ཁྲོད།།
འདས་སོང་ཕྱི་མིག་ནག་པོ་སེམས་ལ་ལྷུང་།།
བརྩེ་བའི་དཔུང་རྡང་བུ་ཡུག་ནག་པོས་ཟོས།།
དྲང་བདེན་གསལ་བའི་རི་མོ་ཧོབ་ཀྱིས་བསུབས།།
འཆི་གསོན་བར་ན་ཁྲག་གིས་ལེ་ཚན་བསྐྲུན།།
འཇིགས་རུང་རྔམ་ཁའི་ཀློང་ན་སེམས་ཚོར་ལྕི།།
སྒྲོན་མེ་མེད་པའི་མུན་པའི་འོག་རིམ་ན།།
ཉི་ཟླ་བཞུར་བའི་ཤུལ་ལམ་སྐྱ་མོ་ན།།
ང་དགུའི་གསོན་ཁྲག་བཞུར་བའི་སྣང་བརྙན་དེ།།
དབུས་ཕྱོགས་གཙང་བོའི་འགྲམ་ན་ད་དུང་གསལ།།
མེས་པོའི་ཁ་ཆེམས་ལོ་རྒྱུས་ཁྲོད་ན་གསལ།།
དཔའ་བོའི་སྙིང་སྟོབས་གཙང་བོའི་གཞུང་ནས་བཞུར།།
ལོ་རྒྱུས་གསར་རྙིང་གཉིས་ཀྱི་ཁུགས་སོ་ན།།
སྐྱོ་ཤས་འཚོ་བའི་ཁྲོད་ནས་རེ་སྒུག་བརྩེགས།།
བཞུགས་སྒར་རྡ་རམ་ས་ནས་གསེར་རྟ་བསོད་ནམས་ཕུན་ཚོགས་སམ་
དཔལ་ཤུལ་འབྲོང་སྲས་སུ་འབོད་པས་སུག་བྲིས་སོ།། ༢༠༡༢ ༡༡ ༢