འུ་གཉིས་མ་གཏོགས་སུ་ཡང་མི་ལུས་པའི་བོད་ཁམས་ལ་ལྟ་བ།
ཚེ་སྲོག་མེ་ཞགས་ཀྱི་གུང་བུར་འཐིམ་ཐིམ་རེད།།
ཚར་གཅོད་དྲག་དཔུང་གི་གླུ་སྒྲ་ལེན་ལེན་རེད།།
མཇུག་འབྲས་ཏིལ་འབྲུ་བཞིན་ད་ནས་ཆུང་ཆུང་རེད།།
འཆི་གསོན་གྲངས་འབོར་གྱི་གཤིབ་སྡུར་བྱེད་རན་རེད།།
འཁྱོག་བཤད་རྫུན་གཏམ་གྱི་མཛུམ་མོ་གེར་གེར་རེད།།
རེ་སྒུག་རྨི་ལམ་གྱི་འཇའ་ཚོན་ཕར་ཕར་རེད།།
གཉིས་ཕན་བྱམས་སེམས་ཀྱི་ལམ་ཁ་དོག་དོག་རེད།།
གསོན་ཤུགས་གསར་བ་ཞིག་གང་ནས་འཚོལ་རན་རེད།།
མེར་སྲེག་ལས་འགུལ་གྱི་གསིར་དྲི་འཐུལ་འཐུལ་འཐུལ་རེད།།
མ་བུ་མཉམ་འཛོམས་ཀྱི་འདི་སྣང་འབྲལ་འབྲལ་རེད།།
ཚུར་ཕྱོགས་སྒྲིག་འཛུགས་ཀྱི་ལས་ཀ་ཉུང་ཉུང་རེད།།
ཟས་བཅད་ངོ་རྒོལ་དེ་ནང་ལ་བྱེད་རན་རེད།།
འདས་སོང་ཞལ་ཆེམས་རྣམས་ཁ་བ་འབབ་འབབ་རེད།།
དད་འདུན་རེ་འབོད་ཀྱི་ཨག་སྐད་གཅིག་གཅིག་རེད།།
མཁྲེགས་འཛིན་ལོག་སྤྱོད་ཀྱི་རྒོལ་གཏམ་གཏན་གཏན་རེད།།
འཚོ་ཐབས་གསར་བ་ཡི་ལམ་ལ་ཆས་རན་རེད།།
སྔོ་སྨོན་མཆོད་འབུལ་གྱི་ཆབ་སྲིད་འཁྲབ་འཁྲབ་རེད།།
འཕོ་འགྱུར་གསར་བ་ཞིག་རྟག་ཏུ་སྒུག་སྒུག་རེད།།
ཡིད་ཆེས་བརྫུན་མ་དེ་རྒྱུན་དུ་སྒོམ་སྒོམ་ལས།།
དོན་ལྡན་སྔོ་སྨོན་གྱི་ལམ་རྒྱགས་གནང་རན་རེད།།
ནུས་མེད་དྲིལ་བསྒྲས་ཤིག་གང་སར་བཤད་བཤད་རེད།།
འཇོན་མེད་འགྲོ་སོང་ཞིག་གང་དུ་བཏང་བཏང་རེད།།
ཡ་ལན་ཚོར་མེད་ཅིག་རྒྱ་ལ་བསྟན་བསྟན་ལས།།
བཙན་པོའི་དཔུང་ཚོགས་ཤིག་གྲ་སྒྲིག་བྱེད་རན་རེད།།