༄༅།། ཁྱེད་ཀྱི་སྙིང་གཏམ།
ཕར་ཕྱོགས་གཙང་བོའི་འགྲམ་ནས།།
ལྷད་མེད་སེམས་ཀྱི་གསེར་ཉ།།
གཙང་ཆུའི་བཞུར་རྒྱུན་ཁྲོད་ནས།།
འགྱུར་མེད་གཏན་ཚིགས་གང་ཡིན།།
སྐྱིད་ཆུའི་མིག་ཆུ་བཞུར་ས།།
ཁྱེད་ཀྱི་སྙིང་གཏམ་བཤད་ས།།
ང་ཡི་རེ་སྒུག་བྱེད་ས།།
ཐུགས་ཀྱི་དཀྱིལ་ཏུ་བཞུགས་སམ།།
དབུ་ཕྱོགས་ཇོ་བོའི་མདུན་ནས།།
སྐྱིད་སྡུག་སེམས་ཀྱི་གླེང་རོགས།།
ཐུགས་ལ་བརྗེད་པ་མེད་ན།།
མཚན་གྱི་རྣམ་གྲངས་གང་ངམ།།
གཡའ་མ་ལུང་གི་ཕུག་ནས།།
མི་བརྗེད་སེམས་ཀྱི་དྲན་བརྟེན།།
དྲན་པའི་གདོང་གི་ངོས་སུ།།
སྐོས་པའི་རི་མི་གང་ངམ།།
ཡུམ་བུ་བརླ་མཁར་ཕྱོགས་སུ།།
ལྗོངས་རྒྱུར་ཕེབས་པའི་ལམ་ཡིག།
ཉིན་ཐོའི་ནང་དུ་ཡོད་དམ།།
ཕྱི་དྲན་ཤོར་ས་གང་ཡིན།།
གསེར་རྟ་བསོད་ནམས་ཕུན་ཚོགས་སམ་
དཔལ་ཤུལ་འབྲོང་སྲས་སུ་འབོད་པས་སུག་བྲིས་སོ།། ༢༠༡ ༡༡ ༥