འདས་པོའི་ཞལ་ཆེམས་དང་གསོན་པོའི་རེ་བ་མུ་འགོད་བཞི་པ།
ཉེ་སྔོན་རང་ལུས་མེར་སྲེག་གནང་མཁན་ ༦༩ རྒྱལ་གཅེས་དཔའ་བོ་སྐལ་བཟང་སྦྱིན་པ་ལགས་ཀྱི་བར། ཁོང་རྣམས་ཀྱི་འབོད་ཚིག་དང་ཞལ་ཆེམས་རྙེད་སོན་བྱུང་བ་ངོ་དེབ་དང་ཟིན་བྲིས་བཅས་ཀྱི་ནང་བཏང་ཟིན། དེ་རིང་རང་ལུས་མེར་སྲེག་གནང་མཁན་ ༧༠ ནས་དུས་དེ་རིང་ ༧༢ བར་ཁོང་རྣམས་ཀྱི་ཞལ་ཆེམས་དང་འབོད་ཚིག་གང་རྙེད་སོན་བྱུང་བ་ཁག འདས་པོའི་ཞལ་ཆེམས་དང་གསོན་པོའི་རེ་བ་མུ་འགོད་བཞི་པ་ཞུ་རྒྱུ་ཡིན།
ཕྱི་ལོ་ ༢༠༡༢ ཟླ་ ༡༡ ཚེས་ ༡༠ ཉིན་གྱི་ཕྱི་དྲོ་བོད་ནང་ཆུ་ཚོད་ ༢ དང་སྐར་མ་ ༢༠ ཙམ་གྱི་སྟེང་། མདོ་སྨད་ཨ་མཆོག་སྨད་དམ་ཀླུ་ཤོད་སྐེད་སྡེ་བ་ནས་ཡིན་པ་རང་ལོ་ ༡༩ ལ་སོན་པའི་མགོན་པོ་ཚེ་རིང་ལགས་ཀྱིས། “མི་རིགས་ལ་རང་དབང་དགོས། སྐད་ཡིག་རང་དབང་དགོས། ༸རྒྱལ་བ་རིན་པོ་ཆེ་གདན་འདྲེན་ཞུ་དགོས” ཞེས་སྐད་འབོད་གནང་ཡོད།
ཕྱི་ལོ་༢༠༡༢ ཟླ༡༡ ཚེས༡༢ ཉིན། རེབ་གོང་མདོ་བ་འབྲོག་སྒྲོ་རོང་པོའི་གད་དམར་ཐང་གི་སློབ་གྲྭའི་ནང་། རང་ལོ་༢༤ ཡིན་པའི་རྒྱལ་གཅེས་དཔའ་བོ་སྙིང་དཀར་བཀྲ་ཤིས་ལགས་ཀྱིས་”། “རྒྱལ་བ་རིན་པོ་ཆེ་སྐུ་ཚེ་བརྟན་པར་ཤོག” ”བོད་ལ་རང་དབང་དགོས”ཞེས་སྐད་འབོད་གནང་ཡོད་པ་དང་། ཡང་ཁོང་གིས་ཁ་ཆེམས་ཡི་གེ་ཞིག་བཞག་འདུག་པ་དེའི་ནང། “རྒྱལ་བ་པཎ་ཆེན་རྣམ་གཉིས་གཙོར་མཛད་པའི་བོད་མི་ས་ཡ་དྲུག་ལ། བོད་རང་དབང་དགོས། བོད་རང་བཙན་དགོས། བོད་ཡིག་སློབ་རྒྱུའི་རང་དབང་དགོས། ཕ་སྐད་བཤད་རྒྱུའི་རང་དབང་དགོས། པཎ་ཆེན་རིན་པོ་ཆེ་བཙོན་གྲོལ་བྱེད་དགོས། རྒྱལ་བ་བསྟན་འཛིན་རྒྱ་མཚོ་བོད་ལ་ཕེབས་སུ་འཇུག་དགོས། རང་ལུས་མེར་བསྲེགས་བྱས་ནས་རྒྱ་གཞུང་ལ་ངོ་རྒོལ་བྱེད་པ་ཡིན། ཕ་བཀྲ་ཤིས་རྣམ་རྒྱལ་གཙོར་མཛད་པའི་བཟའ་མི་ཡོངས་ཀྱིས་སེམས་ཁུར་དང་སྡུག་བསྔལ་བྱེད་མི་དགོས། དཀར་པོ་ཆོས་ལ་དད་རྒྱུ། དགེ་བའི་ལམ་ལ་ཞུགས་རྒྱུ་མཁྱེན། བདག་གི་རེ་བ་ནི། བོད་མི་ས་ཡ་དྲུག་གིས་བོད་ཡིག་སློབ་རྒྱུ། ཕ་སྐད་བཤད་རྒྱུ། བོད་ལྭ་གོན་པ། མཐུན་སྒྲིལ་དང་རྡོག་རྩ་གཅིག་སྒྲིལ་བྱེད་རྒྱུ་མཁྱེན་ཞེས་སྙིང་དཀར་བཀྲ་ཤིས་ནས། ”ཞེས་བཀོད་ཡོད།
ཕྱི་ལོ་ ༢༠༡༢ ཟླ་༡༡ ཚེས༡༢ ཉིན། བོད་ནང་གི་དགོང་དྲོ་ཆུ་ཚོད་ ༧། ༡༨ སྟེང་། རེབ་གོང་མདོ་བ་འབྲོག་ཡོ་ལག་ར་རྒན་སྡེ་བ་ནས་ཡིན་པ་རང་ལོ་༢༠ སོན་པ་རྒྱལ་གཅེས་དཔའ་བོ་སྙིང་ལྕགས་འབུམ་ལགས་ཀྱིས་མདོ་བ་གཡག་ལུང་ངམ་མདོ་བ་ཡུལ་ཚོའི་སྲིད་གཞུང་གི་སྒོ་ཁ་ནས་རྒྱ་གཞུང་གི་གདུག་རྩུབ་སྲིད་བྱུས་ལ་ངོ་རྒོལ་གྱིས་རང་ལུས་མེར་བསྲེགས་བཏང་སྟེ་འདས་གྲོངས་སུ་ཕྱིན་ཡོད། ཕྱི་ལོ་༢༠༠༩ ལོ་ནས་ཕྱི་ལོ་༢༠༡༢ ཟླ ༡༡ ཚེས༡༢ བར་བོད་ནང་དུ་ར་འཕྲོད་གསལ་བོ་བྱུང་བ་རང་ལུས་མེར་བསྲེགས་གནང་མཁན་ ༧༢དང་། དེའི་ནང་ནས་འདས་གྲོངས་སུ་གྱུར་བ་༥༨ ཆགས་ཡོད།