༄༅།།ཁ་སང་གི་གཏམ་རྒྱུད་།།
ཁ་སང་མཚན་མོ་གཏམ་རྒྱུད་གོ་དུས་།།
ལུས་ཟུངས་ཡོངས་ལ་ཚ་གྲོས་རྒྱས་།།
ངོ་གདོང་ལེབ་མོ་མིག་ཆུས་བརླན་དུས་།།
སྙིང་ཆུང་དམར་པོ་ཡང་ཡང་འདར་།།
ཨ་ཕ་རྒན་པོས་མེ་ལྕེའི་ཁྲོད་ནས་།།
ཀུན་གྱིས་མ་ནུས་ཀི་སྒྲ་བསྒྲགས་།།
ལག་ཟུང་ཐེལ་མོ་སྙིང་ཀར་སྦྱར་ནས་།།
རྩ་བའི་བླ་མའི་མཚན་ནས་འབོད་།།
ཤུལ་ལུས་ཟ་ཟླས་ངུ་འབོད་བྱེད་བཞིན་།།
གྲོང་གི་སྟོད་སྨད་གང་སར་བརྒྱུགས་།།
གཅེས་ཕྲུག་ཆུང་ཆུང་ལག་དུ་ཁྲིད་དེ་།།
སྡེ་བ་ཡོངས་ལ་སྐྱོ་ལུགས་བཤད་།།
ལོ་ཆུང་གཞོན་་ནུས་རིགས་ཀྱི་ལྟ་བ་།།
སྙིང་གི་དབུས་སུ་བཅང་མཛད་དེ་།།
ས་ཡ་དྲུག་ལ་ཞལ་ཆེམས་བཞག་སྟེ་།།
རང་གི་ཚེ་སྲོག་མེ་ལྕེས་བསྲེགས་།།
སྡེ་བ་ཡོངས་ཀྱི་རྒྱབ་ནས་ལངས་ཏེ་།།
རིགས་ཀྱི་བདེ་སྡུག་ངག་ནས་འབོད་།།
དམར་པོ་རྒྱ་ཡི་སྲིད་གཞུང་འགྲམ་ནས་།།
ཞི་བའི་ངོ་རྒོལ་རྒྱ་ཆེར་བྱས་།།
ཕྱི་གླིང་ཡུལ་གྱི་སྤུན་ཟླའི་ཚོགས་ནས་།།
ཁ་བའི་ལས་དབང་གོ་ལར་བསྒྲགས་།།
གནས་ལུགས་དུ་མས་རྒྱབ་བརྟན་མཛད་དེ་།།
དམར་པོ་རྒྱ་ལ་ཁ་འཛིང་བྱས་།།
དེ་ལྟར་ཁ་སང་ཁ་བའི་གཏམ་རྒྱུད་།།
དེ་རིང་དྲན་ཚེ་ཡིད་སེམས་གདུང་།།
གཞི་ལུས་སྤུན་ཟླའི་སྙིང་སྟོབས་དྲན་དུས་།།
སླར་ཡང་སྐྱོད་པའི་སྤོབས་སེམས་སྐྱེས་།།
བློ་སེམས་མ་ཞུམ་བདག་གི་སྤུན་ཟླ་།།
བདེན་པ་གསལ་བའི་དུས་ཤིག་འོང་།།
སྲོག་ལ་ཐུག་ཀྱང་རྒྱ་ལ་མ་གུས་།།
འཆི་བ་དོན་ལྡན་མཛད་དུ་གསོལ་།།
ཅིས་པ་འདི་ནི་སྟག་ཚང་རིགས་རྒོད་ཀྱིས་སྤྱི་ལོ་༢༠༡༢ཟླ་བ་༡༡ཚེས་༡༤ཉིན་ཤ་ཁྲག་གཅིག་པ་ཡོངས་ལ་ཕུལ་།།