ཞི་བདེའི་གཟེངས་རྟགས་ཀྱི་ཉིན་མོ་སྲུང་བརྩི།
༧གོང་ས་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་ཞུས་མཛད་ནས་མི་ལོ་ཧྲིལ་པོ་༢༣ འཁོར་བ་དང་། རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོ་དྷ་ས་ཐེག་ཆེན་ཆོས་གླིང་གཙུག་ལག་ཁང་དུ་སྲུང་བརྩི་ཞུས་ཏེ། ཕྱི་ཟླ་ ༥ ཚེས་ ༡༧ གྱི་ཉིན་དེ་བཞིན་བོད་ལ་གདུང་སེམས་མཉམ་བསྐྱེད་ཀྱི་ཉིན་མོར་ལོ་ལྟར་སྲུང་བརྩི་ཞུ་རྒྱུ་ཡིན་ཞེས་བཀའ་ཤག་གིས་གསུངས་སོང་།
དུས་དྲན་མཛད་སྒོའི་ཐོག་ཆེས་མཐོའི་ཁྲིམས་ཞིབ་པ་ཆེ་བ་ངག་དབང་འཕེལ་རྒྱས་དང་། ཁྲིམས་ཞིབ་པ་རྣམ་གཉིས། སྲིད་ཚབ་ཀྱི་སྐུ་ཚབ་ཆོས་རིགས་བཀའ་བློན་ཀྱིས་དབུས་བཀའ་བློན་རྣམ་པ། སྤྱི་འཐུས་ཚོགས་གཙོ་སྤེན་པ་ཚེ་རིང་གིས་དབུས་ཚོགས་གཞོན་དང་སྤྱི་འཐུས་རྣམ་པ། ལྷན་ཁང་ཁག་གི་དྲུང་ཆེ་ཆུང་རྣམ་པ། གཞུང་འབྲེལ་དང་གཞུང་འབྲེལ་མིན་པའི་ཚོགས་སྐྱིད་ཁག་གི་སྐུ་ཚབ། དེ་བཞིན་གཉུག་མར་གནས་པ་དང་གློ་བུར་དུ་ལྷག་པའི་བོད་མི་སེར་སྐྱ་རྒན་དར་གཞོན་གསུམ་སོགས་ཚང་འཛོམས་ཀྱིས་ཐོག་མར་བོད་ཀྱི་ཟློས་གར་ཚོགས་པས་རྔ་རོལ་དང་བཅས་བོད་རྒྱལ་ཁབ་ཆེན་པོའི་རྒྱལ་གླུ་འབུལ་བཞིན་པར་སྲིད་ཚབ་ཀྱིས་བོད་རྒྱལ་ཁབ་ཆེན་པོའི་རྒྱལ་དར་མཁའ་དབྱིངས་སུ་སྒྲེངས་འཛུགས་གནང་ཡོད། དེ་རྗེས་བོད་ཕྱི་ནང་གཉིས་སུ་རང་ལུས་མེར་སྲེག་བཏང་བའི་རྒྱལ་གཅེས་པ་ཕོ་མོ་ རྣམས་ལ་མྱ་ངན་གུས་འདུད་མཚོན་ཆེད་ངག་བཅད་སྐར་མ་གཅིག་ཞུས་གྲུབ་མཚམས། བོད་ཀྱི་ཟློས་གར་ཚོགས་པས་ནོ་སྦེལ་ཞི་བདེའི་གཟེངས་རྟགས་ཀྱི་བསྟོད་དབྱངས་མཉམ་གཞས་ཕུལ་ཡོད་པ་རེད།
དེ་རྗེས་བོད་མིའི་སྒྲིག་འཛུགས་ཀྱི་ལས་བྱེད་འདེམས་བསྐོ་ལྷན་ཁང་ནས་ལས་བྱེད་བགྲེས་ཡོལ་ཐོན་པ་བཞི་དང་། འཕྲོད་བསྟེན་ལས་ཁུངས་ནས་འཕྲོད་བསྟེན་ཁྱབ་ཁོངས་ལས་བྱེད་པས་གཙོས་བོད་མིའི་སྤྱི་ཚོགས་ནང་འཕྲོད་བསྟེན་དང་འབྲེལ་བའི་སྲི་ཞུ་གནང་མཁན་ཞབས་ལོ་ ༢༥ འཁོར་བའི་ལས་བྱེད་ཁག་གཅིག་ལ་འཕྲོད་བསྟེན་ལས་ཁུངས་ཀྱིས་དོ་དག་ལས་བྱེད་རྣམ་པ་ངོ་སྤྲོད་གནང་བ་དང་འབྲེལ་སྲིད་ཚབ་མཆོག་གིས་ལེགས་མཚོན་བྱ་དགའ་གནང་།
དེ་རྗེས་སྲིད་ཚབ་ཆོས་རིགས་བཀའ་བློན་པདྨ་ཆོས་འབྱོར་གྱིས་བཀའ་ཤག་གི་གཏམ་བཤད་སྒྲོགས་སྦྱང་སྐབས། བོད་མིའི་ལས་འགུལ་སྤེལ་ཕྱོགས་སྐོར་གསུང་དོན། “ང་ཚོས་ཕྱི་ཟླ་ ༥ ཚེས་ ༡༧ གྱི་ཉིན་དེ་བཞིན་བོད་ལ་གདུང་སེམས་མཉམ་བསྐྱེད་ཅེས་པའི་ཉིན་མོར་ལོ་ལྟར་སྲུང་བརྩི་ཞུ་རྒྱུའི་གསལ་བསྒྲགས་ཞུ་རྒྱུ་ཡིན། ཕྱི་ལོ་ ༡༩༩༥ ཟླ་ ༥ ཚེས་ ༡༧ ཉིན་ྋགོང་ས་ྋསྐྱབས་མགོན་ཆེན་པོ་མཆོག་གིས་ངོས་འཛིན་གནང་བའི་དགུང་ལོ་ ༦ ལས་མ་སོན་པའི་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་རྒྱ་ནག་ གཞུང་གིས་བཙན་འཁྲིད་བྱས་པ་ནས་བཟུང་ད་བར་གར་ཡོད་ཤེས་རྟོགས་བྱུང་མེད། དེ་མཚུངས་ཕྱི་ལོ་ ༢༠༡༣ ཟླ་ ༡ ཚེས་ ༣༠ ནས་ཟླ་ ༢ ཚེས་ ༢ བར་ཉིན་བཞིའི་རིང་ལྡི་ལིར་བཀའ་སྤྱི་ཐུན་མོང་གི་གོ་སྒྲིག་འོག་མང་ཚོགས་འདུ་ འཛོམས་དང་གཏམ་བཤད་སོགས་གདུང་སེམས་མཉམ་བསྐྱེད་ཀྱི་ལས་འགུལ་སྤེལ་རྒྱུ་ཡིན། དེ་སྐབས་བཀའ་བློན་རྣམ་པ་དང༌། གྲོས་ཚོགས་ཀྱི་འཐུས་མི་རྣམ་པ། དེ་བཞིན་བོད་མིའི་གཞིས་སྒར་ཁག་གི་སྐུ་ཚབ་བཅས་མཉམ་ཞུགས་གནང་རྒྱུ་ཡིན་”ཞེས་གསུངས་སོང་།
“རང་ལུས་མེར་བསྲེགས་མུ་མཐུད་འབྱུང་བཞིན་ཡོད་པ་ནི་བོད་མི་ཚོས་རྒྱ་ནག་གཞུང་གིས་བོད་བཙན་བཟུང་དང་བོད་མིར་དྲག་གནོན་བྱས་པ་ལ་ཞི་བའི་རྒོལ་ཟླ་བྱས་པ་ཞིག་ རེད། ཁྱད་པར་གནས་ཚུལ་དེ་དག་གིས་བོད་མི་རྣམས་ཀྱི་འུ་ཐུག་དང་ཞེ་འཁོན་གྱི་སྒོ་མཚམས་གསར་པ་ཞིག་ཏུ་སླེབས་པ་དང༌། ཟིང་ཆ་དང་དྲག་གནོན། སྔར་ལས་ཆེ་བའི་ཟིང་ཆ་བཅས་ཀྱི་འཁོར་ལོའི་ནང་ཚུད་དེ་གནས་སྟངས་ཇེ་ཞན་ཇེ་སྡུག་ཏུ་འགྲོ་བ་མཚོན་གྱི་ཡོད། རང་ལུས་མེར་བསྲེགས་བྱུང་དགོས་པའི་རྒྱུ་མཚན་རྒྱ་ནག་གཞུང་གི་དྲག་གནོན་གྱི སྲིད་བྱུས་དང༌། ཆབ་སྲིད་དམ་བསྒྲགས། ཆོས་དད་རང་དབང་བརྡལ་བཤིག སྤྱི་ཚོགས་དང་དཔལ་འབྱོར་དབྱེ་འབྱེད། རིག་གཞུང་དང་ཁོར་ཡུག་རྩ་གཏོར་བཅས་ལ་བརྟེན་ནས་བྱུང་བར་ངོས་འཛིན་བྱེད་ཀྱི་ཡོད་”ཅེས་གསུངས་སོང་།
བོད་ནང་གི་གནས་སྟངས་སྐོར་གསུང་དོན། བོད་མིའི་སྒྲིག་འཛུགས་ཀྱིས་ཚབས་ཆེ་བའི་ལས་འགུལ་རིགས་མ་སྤེལ་རོགས་ཞེས་འབོད་སྐུལ་ལན་མང་ཞུས་ཡོད་ཀྱང་མུ་མཐུད་འབྱུང་བཞིན་པ་རེད། རང་ལུས་མེར་བསྲེགས་གཏོང་མཁན་ཚོའི་ཡོངས་གྲགས་ཀྱི་མངོན་འདོད་ནི་ྋགོང་ས་མཆོག་ བོད་ལ་གདན་འདྲེན་ཞུ་རྒྱུ་དང༌། བོད་མིར་རང་དབང་དགོས་པ་གཉིས་ཡིན། འདི་གཉིས་ཁོང་ཚོའི་སྙིང་དུ་བརྣག་པའི་འདོད་དོན་ཡིན་སྟབས། ཁོང་ཚོའི་མངོན་འདོད་འགྲུབ་ཐབས་བྱ་རྒྱུ་དེ་ང་ཚོ་རང་དབང་ལུང་པར་གནས་པ་ཚོའི་ ལས་འགན་ཡིན། དེར་བརྟེན་ཁོ་ཚོའི་འབོད་སྒྲ་འཛམ་གླིང་ཡོངས་ལ་ཁྱབ་ཐུབ་པ་བྱེད་རྒྱུ་ང་ཚོའི་ རྩ་ཆེའི་ལས་འགན་ཞིག་ལ་ངོས་འཛིན་ཞུ་གི་ཡོད། འོན་ཀྱང་རྒྱ་ནག་དམར་ཤོག་ཚོགས་པས་དངོས་ཡོད་གནས་ཚུལ་ལས་ཡོངས་སུ་ལྡོག་སྟེ། རང་ལུས་མེར་བསྲེགས་བྱུང་བའི་ཁག་དཀྲི་བཙན་བྱོལ་བོད་མིའི་དབུ་འཁྲིད་ལ་འགེལ་ བཞིན་ཡོད། བོད་མིའི་སྒྲིག་འཛུགས་དང་ྋགོང་ས་མཆོག་ལ་དེ་འདྲའི་ཁག་དཀྲི་བྱེད་པ་ནི། རྒྱ་ནག་གཞུང་གིས་ལོ་ལྔ་བཅུ་ལྷག་རིང་བོད་བཙན་བཟུང་བྱས་ཀྱང་བོད་མིའི་བློ་ སེམས་འགུག་ཐུབ་མེད་པར་དངོས་སུ་ངོས་ལེན་བྱས་པ་ཞིག་དང༌། པེ་ཅིང་ནས་ཁྲིམས་མཐུན་སྲིད་བྱུས་ལག་བསྟར་བྱེད་རྒྱུའི་ཚབ་ཏུ་ཁག་དཀྲིའི་གཡོ་ ཐབས་ལ་མུ་མཐུད་རྒྱབ་རྟེན་བཅོལ་བ་བསྟན་གྱི་ཡོད་”ཅེས་འཁོད་འདུག
བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་གིས་སྤྱི་འཐུས་ཀྱི་གསུང་བཤད་སྐབས། “དེ་རིང་ནི་རྒྱལ་སྤྱིའི་འགྲོ་བ་མིའི་ཐོབ་ཐང་ལ་སྲུང་བརྩི་ཞུ་བའི་ཉིན་མོ་ཡིན་ པ་ཙམ་དུ་མ་ཟད་མཉམ་འབྲེལ་རྒྱལ་ཚོགས་ཀྱིས་འགྲོ་བ་མིའི་ཐོབ་ཐང་གི་ཡོངས་ཁྱབ་ གསལ་བསྒྲགས་གནང་ནས་མི་ལོ་ ༦༤ ཟིན་པའི་དུས་ཚིགས་འདིར་ཕྲན་ནས་བོད་མི་མང་སྤྱི་འཐུས་ལྷན་ཚོགས་ཀྱི་ཚབ་ཞུས་ཏེ་ ཉེ་ལམ་འཕོ་འགྱུར་བྱུང་བའི་རྒྱ་ནག་གི་འགོ་ཁྲིད་གསར་པ་ཚོར་འབོད་སྐུལ་ཞུ་ རྒྱུར། གནའ་ནས་བོད་རྒྱ་གཉིས་ལོ་རྒྱུས་ཡུན་རིང་ལྡན་པའི་ཁྱིམ་མཚེས་རྒྱལ་ཁབ་ཡིན་པ་ རྩོད་མེད་ཡིན་རུང་རྒྱ་ནག་གུང་ཁྲན་ཚོགས་པས་རྒྱ་ནག་ལ་དབང་བསྒྱུར་བྱས་རྗེས་ བོད་ས་ཡོངས་རྫོགས་བཙན་འཕྲོག་བྱས་ཏེ། བོད་མི་རིགས་ཀྱི་ངོ་བོ་རྩ་མེད་གཏོང་རྒྱུའི་རེ་ངན་བཅངས་ཏེ་བོད་ས་བདག་བཟུང་ དང་བོད་མིར་རྡུང་རྡེག་གཏོང་བའི་ལོག་ལམ་ནོར་འཁྲུལ་ཅན་གྱི་སྲིད་བྱུས་ལག་བསྟར་ བྱས་དང་བྱེད་བཞིན་པར་བརྟེན། བོད་ནང་གི་བོད་མི་ཚོས་འགྲོ་བ་མིའི་ཐོབ་ཐང་དང་ཡོངས་སུ་འགལ་བའི་རྒྱ་ནག་གཞུང་ གི་སྲིད་བྱུས་དེ་དག་ལ་དང་ལེན་བྱ་ཐབས་བྲལ་ཏེ་ཞི་རྒོལ་འདྲ་མིན་སྣ་ཚོགས་སྤེལ་ དགོས་བྱུང་བ་དང་ཏང་གི་འགོ་ཁྲིད་རྙིང་པ་ཚོས་དངོས་ཐོག་བདེན་འཚོལ་ཞེས་རྟག་ཏུ་ བཤད་བཞིན་ཡོད་ནའང། བོད་ནང་གི་དངོས་ཡོད་ཀྱི་དཀའ་ངལ་སེལ་རྒྱུའི་ཚབ་ཏུ་སྲིད་གཞུང་ཞིག་གིས་རང་གི་ ཆབ་འབངས་ལ་ལྟ་ཚུལ་ལྟར་མེད་ཐོག བོད་མིར་སྤུན་ཟླ་མི་རིགས་ཀྱི་འདུ་ཤེས་ཙམ་ཡང་མི་འཛིན་པར་ད་དུང་མེས་རྒྱལ་ཁ་ བྲལ་ཟེར་བའི་ཞྭ་མོ་གཡོགས་ཏེ་འགྲོ་བ་མིའི་ཐོབ་ཐང་དང་ཡོངས་སུ་འགལ་བའི་རྡུང་ རྡེག་ཚ་ནན་ཞེས་པའི་དྲག་གནོན་བྱས་རྐྱེན་བོད་མིའི་ཞི་རྒོལ་མཚམས་ཆད་མེད་ལ། ད་བར་བོད་མི་སེར་སྐྱ་ཕོ་མོ་ཁྱོན་ ༩༡ དང་དེའི་ནང་ནས་འདས་མ་ཐག་པའི་ཕྱི་ཟླ་ ༡༡ པ་གཅིག་པུའི་ནང་བོད་མི་གྲངས་ ༢༨ ཀྱིས་ཚོར་ཤུགས་ཧ་ཅང་ཆེན་པོའི་ངང་རང་ལུས་མེར་བསྲེགས་ཀྱིས་ཞི་རྒོལ་གནང་ཡོད། འོན་ཀྱང་རྒྱ་ནག་གི་འགོ་ཁྲིད་ཚོས་ཕྱིའི་རྒྱལ་ཁབ་ཁག་ཏུ་མེས་རྒྱལ་བརྟན་ལྷིང་ ཡིན་ཚུལ་སོགས་རྫུན་གཏམ་བཤད་དེ་བོད་ནང་གི་དངོས་ཡོད་ཀྱི་གནས་ཚུལ་ངོ་མ་རྣམས་ འགེབ་སྲུང་ཁོ་ནའི་ཆེད། ཕྱིའི་རྒྱལ་ཁབ་དང་རང་དབང་ཅན་གྱི་གསར་འགོད་པ་བོད་ནང་དུ་འགྲོ་སྐྱོད་མི་ཆོག་ པར་གསར་འགོད་ཀྱི་རང་དབང་མེད་ཁར། དེང་རབས་འཛམ་གླིང་ནང་སྐྱེ་བོ་ཀུན་གྱིས་སྤྱོད་བཞིན་པའི་དྲྭ་རྒྱ་དང་ཁ་པར་གྱི་ བརྒྱུད་ལམ་ཁག་ཡན་ལ་སྟངས་འཛིན་གྱིས་བོད་མི་ཚོའི་འགྲོ་བ་མིའི་སྨྲ་བརྗོད་ཀྱི་ རང་དབང་ཡོངས་རྫོགས་འཕྲོགས་ནསབོད་ས་གང་སར་དྲག་པོའི་དམག་ཤུགས་ཀྱིས་ཉེས་མེད་ བོད་མི་མང་པོ་འཛིན་བཟུང་བྱས་ཏེ་སྲོག་ཁྲིམས་དང་དུས་བཀག་བཙོན་འཇུག གར་འཁྲིད་ཆ་མེད་དུ་གྱུར་པ་སོགས་བྱས་དང་བྱེད་བཞིན་པ་འགྲོ་བ་མིའི་བྱ་སྤྱོད་ ལས་འདས་པའི་གདུག་རྩུབ་ཀྱི་སྲིད་བྱུས་དེ་དག་འཕྲལ་དུ་མཚམས་འཇོག་གནང་རྒྱུར་ འབོད་སྐུལ་ཞུ་རྒྱུ་ཡིན་”ཞེས་གསུངས་སོང་།
བཙན་བྱོལ་བོད་མིའི་ལས་འགུལ་སྤེལ་ཕྱོགས་སྐོར་གསུང་དོན། “བཙན་བྱོལ་བོད་མིའི་བཅའ་ཁྲིམས་དོན་ཚན་ ༥༩ པའི་འོག་དམིགས་བསལ་ཚོགས་ཆེན་ཐེངས་གཉིས་པ་ཕྱི་ལོ་ ༢༠༡༢ ཟླ་བ་ ༩ པའི་ཚེས་ ༢༥ ནས་ཚེས་ ༢༨ བར་བསྐོང་ཚོགས་གནང་བའི་རྒྱབ་གཉེར་སྙན་ཐོ་ཁག་ཕྱག་ལེན་མཇུག་སྐྱོང་གནང་ཕྱོགས་ སྐོར་ལ་བཀའ་སྤྱི་སོ་སོ་དང་། བཀའ་སྤྱི་ལྷན་ཚོགས་བཅས་ཐེངས་འགའ་གནང་སྟེ་བཀའ་བསྡུར་ཞིབ་ལྷུག་གིས་ཐག་གཅོད་ རྣམས་ཡོངས་ཁྱབ་གསལ་བསྒྲགས་གནང་ཟིན་པ་ལྟར་གཞུང་སྒེར་འབྲེལ་ཆགས་ཡོངས་ནས་ཞུ་སྒོ་མཐའ་དག་ལྷོད་མེད་བསྒྲུབ་དགོས་པའི་གསལ་འདེབས་ཞུ་རྒྱུ་ཡིན་”ཞེས་གསུངས་སོང་།
ཧིན་བོད་མཛའ་འབྲེལ་ཚོགས་པའི་གོ་སྒྲིག་འོག ཧིན་དྷི་ཆོས་ཀྱི་ལུགས་ཀྱི་སྒོ་ནས། བོད་དོན་ཐོག་གདུང་སེམས་མཉམ་བསྐྱེད་མཚོན་ཆེད་བོད་ཕྱི་ནང་གཉིས་ཀྱི་ནང་ད་བར་བོད་བསྟན་སྲིད་དང་མི་རིགས། རང་དབང་གི་དོན་དུ་ལུས་སྲོག་ལོངས་སྤྱོད་བློས་གཏོང་གནང་མཁན་གྱི་རྒྱལ་གཅེས་པ་ཕོ་མོ་འདས་གསོན་ཡོངས་ཀྱི་ཆེད་མཆོད་འབུལ་སྨོན་ལམ་གསུངས་ཡོད་པ་རེད།
མཇུག་ཏུ་རྟེན་འབྲེལ་མཚོན་ཆེད་དུ། བོད་ཀྱི་ཟློས་གར་ཚོགས་པ་དང་། དཔེ་སྟོན་སློབ་གྲྭ། བོད་ཁྱིམ་ཉིན་སློབ། ཡོངས་གླིང་སློབ་གྲྭ་ནས་གཞས་སྣ་འཁྲབ་སྟོན་བྱས་ཡོད་པ་རེད།།
