བདག་གི་བླ་མ།
བདག་གི་བླ་མ། འཇིག་རྟེན་གྱི་འདྲེན་མཆོག
རྟེན་འབྱུང་གི་ལྟ་བ་ཐུགས་ལ་མཛེས།།
འཚེ་མེད་ཀྱི་གདམས་པ་གསུང་ལ་མཛེས།།
ངུར་སྨྲིག་གི་ན་བཟའ་སྐུ་ལ་མཛེས།།
ཐུབ་བསྟན་གྱི་མཛེས་རྒྱན་༸གོང་ས་མཆོག།།
ཟླུམ་གཟུགས་ཀྱི་གོ་ལ་ཆེན་པོ་འདིར།།
ཆོས་ལུགས་ཀྱི་བླ་མ་མང་ན་ཡང་།།
སྐྱེས་རྒུ་ལ་ཞི་བདེ་སྐྲུན་པའི་གཉེན།།
གངས་ཅན་གྱི་མགོན་པོ་སྤྱན་རས་གཟིགས།།
ཚན་རྩལ་གྱི་བསྟན་པ་རྟས་པའི་དུས།།
རྫས་སྦྱོར་གྱི་མཁས་པ་མང་ན་ཡང་།།
སེམས་ཉིད་ཀྱི་གནད་ལུགས་ཀུན་མཁྱེན་མཁན།།
གངས་ཅན་གྱི་མགོན་པོ་སྤྱན་རས་གཟིགས།།
དམངས་གཙོ་དང་རང་དབང་འདྲ་མཉམ་ཞེས།།
ཆབ་སྲིད་ཀྱི་ལམ་སྟོན་མང་ན་ཡང་།།
དོན་དངོས་དང་མཐུན་པའི་ལམ་སྟོན་པ།།
མཉམ་མེད་ཀྱི་བླ་མ་༸གོང་ས་མཆོག།།
འཐབ་རྩོད་དང་དམག་འཁྲུག་ཞི་བའི་སླད།།
ཆིག་སྒྲིལ་གྱི་གཏམ་བཟང་སྒྲོག་དུས་འདིར།།
འགྲོ་བ་རྣམས་བྱམས་བརྩེས་སྐྱོང་བའི་གཉེན།།
ཆིག་སྒྲིལ་གྱི་བྱེད་པོ་༸གོང་ས་མཆོག།།
༸གོང་ས་མཆོག་གིས་འཛམ་གླིང་ཞི་བདེའི་གཟེངས་རྟགས་བཞེས་པའི་དུས་ཆེན་ལ་འཚམས་འདྲིའི་ཆེད་འཕགས་ཡུལ་འབྲས་སྤུངས་ཆོས་སྒར་དུ་བྲིས་པ་དགེའོ།།