རི་གྲོང་གི་གདུང་ཡུས་ཀྱིས་འབོད་པས་ཆོས་རྗེ་མཆོག་ལ་རྗེས་དྲན་ཞུ།
ཆོས་རྗེ་ཡི་བཞིན་ནོར་བུ་འཇིགས་མེད་ཕུན་ཚོགས་འབྱུང་གནས་
དཔལ་བཟང་པོ་རྗེས་སུ་དྲན་པའི་གདུང་འབོད་བཞུགས་སོ།།
༡རྡུལ་བྲལ་བདེ་བ་ཆེན་པོ་མངོན་དུ་མཛད་ཅིང་།།
སྤྲོས་བྲལ་ཡེ་ཤེས་ཆེན་པོ་ས་ལེར་གཟིགས་ཤིང་།།
ཟླ་བྲལ་ས་མཆོག་ཆེན་པོ་རིང་ནས་ཐོབ་ཅིང་།།
འཇིགས་བྲལ་བསྟན་འཛིན་ཆེན་པོ་སྙིང་ནས་དྲན་ཞིང་།།
༢ལེིགས་ཚོགས་ཆར་པ་འབེབས་པའི་ཆོས་ཀྱི་ར་བར། །
བོད་ཟླ་དགུ་པའི་ཚེས་པ་བཅོ་བརྒྱད་ཉིན་མོ། །
ལྷར་བཅས་འགྲོ་བ་འདྲེན་པའི་དེད་དཔོན་ཆེན་པོས། །
ཐ་མའི་ལྷན་འཛོམས་ཡིན་པར་གསུང་པ་དྲན་བྱུང་། །
༣ད་དུང་རང་ཉིད་ཚུགས་ཐུབ་རང་གིས་དགོས་ཤིང་། །
གཞན་ལ་འཚེ་བ་མཐའ་དག་རིང་དུ་སྤོངས་དང་། །
ཆོས་སྲིད་གཉིས་ཀྱི་གལ་འགག་འདི་ཉིད་ཡིན་ཞེས། །
བཀའ་ཡི་ཕྱག་རྒྱས་བཏབ་པ་ལྷག་ཏུ་དྲན་ནོ། །
༤བསོད་ནམས་ཡེ་ཤེས་དཔལ་གྱི་ཡོངས་སུ་གཏམས་ཤིང་།།
ཤེས་རབ་ཏིང་འཛིན་དཔལ་ལ་མངའ་དབང་འབྱོར་ན། །
ནམ་ཞིག་འོད་མཚན་སྟོང་འབར་གསུང་གིས་བསྐུལ་ཚེ།།
ཡང་བསྐྱར་འདི་རུ་འཛོམས་ཞེས་གསུང་པ་དྲན་བྱུང་། །
༥ཟླ་ཕྲག་གཉིས་ཀྱི་དུས་ཚོད་རིམས་གྱིས་འདའ་ཞིང་། །
ཉི་མའི་འོད་མོག་ནམ་ཟླའི་གྲང་ངར་རྒོད་སྐབས། །
སེམས་པ་སྡུག་ལ་བསྐུལ་བའི་གཏམ་ངན་ཞིག་གིས། །
བྱམས་བརྩེས་འཚོ་བའི་ལྗོངས་འདི་ཁད་ཀྱིས་དཀྲོགས་སོང་། །
༦རེ་ཞིག་འགྲོ་དོན་རྫོགས་པའི་ངང་ཚུལ་བསྟན་སོང་།།
སྐུ་མཆོག་མྱ་ངན་འདས་པའི་མཛད་པ་བསྐྱངས་སོང་།།
ཞིང་ཁམས་གཞན་དུ་གཤེགས་པའི་འདུན་པ་གཏད་སོང་།།
ཟེར་བའི་གཏམ་དེ་ཁ་པར་བརྒྱུད་ནས་གོ་སོང་།།
༧རྣམ་བཞིའི་འཁོར་གྱིས་སྐྱོ་བའི་གདུང་འབོད་རེ་རེ། །
ཡིད་སེམས་སྡུག་གིས་ཕམ་པའི་མིག་ཆུ་རེ་རེ། །
ཤུལ་ལུས་གདུང་བས་མནར་བའི་སྨྲེ་སྔགས་རེ་རེ། །
སེམས་ཀྱི་ཨ་ཐང་ཆད་པ་དྲན་ཤིང་གྱུར་སོང་། །
༨ཆོས་ཀྱི་ཞིང་དེ་སྐྱོ་བའི་གྲོང་དུ་གྱུར་སོང་།།
བྱམས་བརྩེའི་འཚོ་བ་ཐལ་བའི་རླུང་དང་འདྲེས་སོང་།།
དགོད་པའི་འཛུམ་བག་སྡུག་གི་སེམས་ནས་ཡལ་སོང་།།
དྲན་པའི་སེམས་ཀྱིས་གདུང་བ་ད་དུང་བརྗེད་མེད།།
༩དགའ་སྦྱིན་ཉིན་མ་ཆེན་པོ་ནུབ་རིར་ཕེབས་སོང་། །
མྱ་ངན་མུན་པ་ནག་པོ་ཐོལ་གྱིས་སླེབས་སོང་། །
ངུས་པའི་མཆི་མ་མཁུར་གོང་བརྒྱུད་ནས་བཞུར་སོང་། །
གདུང་བའི་འབོད་པ་བྱས་པ་ཡང་བསྐྱར་དྲན་སོང་།།
༡༠ངུས་པའི་མཆི་མ་འཁོལ་བའི་བོད་འབངས་ཡོངས་ཀྱིས།།
གདུང་བས་སྨྲེ་སྔགས་སྟོང་གིས་འབོད་པ་རེ་རེ།།
བདེ་ཆེན་དག་པ་ལྷ་ཡི་ཞིང་མཆོག་དེ་ནས།།
རྒྱལ་སྲས་སེམས་དཔའ་ཆེན་པོས་གསན་པ་ཨེ་བྱུང་།།
༡༡དེ་ལྟར་དྲན་པས་གདུང་བའི་སེམས་ཀྱི་རི་མོ།།
ཡི་གེ་རིས་སུ་ཕབས་པའི་དགེ་ཚོགས་མཆིས་ན།།
སླར་ཡང་ཉི་གཞོན་ཤར་ནས་འཛུམ་པའི་བྱམས་བརྩེས།།
རིང་མིན་ང་ཅག་འཚོ་བའི་རྒྱུ་རུ་གྱུར་ཅིག །།
སརྦ་མངྒཾ་ལཾ།། བསོད་ནམས་ཆོས་རྒྱལ་ནས་བྲིས་པ་དགེ་བར་གྱུར་ཅིག །།