བོད་རིགས་དགེ་རྒན་གྱི་ཚོགས་ཆེན་ཐེངས་དང་པོ།
ཕྱི་ཚེས་༣ ཉིན་གཏན་ཉིན་སློབ་གྲྭ་ཁག་གི་བོད་རིགས་དགེ་རྒན་ཚོགས་ཆེན་ཐེངས་དང་པོ་དེ་རྡ་ཤོད་བོད་ཁྱིམ་སློབ་གྲྭའི་ཚོགས་ཁང་དུ་དབུ་འཛུགས་གནང་ཡོད་པ་དང་། དེར་ཉིན་༣ གྱི་རིང་གཏན་ཉིན་སློབ་གྲྭ་ཁག་གི་ཤེས་ཡོན་དང་། དེ་བཞིན་ཀུན་སྤྱོད་སློབ་གསོ་དང་སྒྲིག་ལམ་ཡར་རྒྱས་གཏོང་ཐབས་སོགས་ལ་བགྲོ་གླེང་བྱེད་བཞིན་ཡོད་པ་རེད།
དེ་ཡང་ཟླ་འདིའི་ཕྱི་ཚེས་༣ ཉིན་གྱི་སྔ་དྲོ་ཆུ་ཚོད་༩ པའི་སྟེང་། དབུས་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་གོ་སྒྲིག་འོག རྡ་ཤོད་བོད་ཁྱིམ་སློབ་གྲྭའི་ཚོགས་ཁང་དུ་གཏན་ཉིན་སློབ་གྲྭ་ཁག་གི་བོད་རིགས་དགེ་རྒན་ཚོགས་ཆེན་ཐེངས་དང་པོ་དེ་དབུ་འཛུགས་གནང་ཡོད་པ་དང་།དེར་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་སྲིད་སྐྱོང་དང་ཤེས་རིག་བཀའ་བློན་གཅིག་ལྕོགས་བློ་བཟང་སེང་གེ་དང་། ཤེས་རིག་དྲུང་ཆེ་དངོས་གྲུབ་ཚེ་རིང་གཉིས་ཀྱིས་དབུས། བཙན་
ཚོགས་འདུ་དབུ་འབྱེད་ཀྱི་མཛད་སྒོིའི་སྟེང་ཤེས་རིག་དྲུང་ཆེ་དངོས་གྲུབ་ཚེ་རིང་གིས་གསུངས་བཤད་གནང་དོན། “ང་ཚོ་བོད་པའི་སྤྱི་ཚོགས་ནང་ཤེས་ཡོན་ཨང་དང་པོར་བརྩི་ཡི་ཡོད་ན་མེད་ན་བསམ་པའི་ཧ་ཅང་དོགས་པ་ཡོད། དེར་བརྟེན་ཤེས་ཡོན་གལ་ཆེ་ཤོས་སུ་བརྩི་མ་ཐུབ་པ་ཡིན་ན། མི་རིགས་དང་རྒྱལ་ཁབ་ལྷག་པར་ང་ཚོ་བཙན་བྱོལ་སྤྱི་ཚོགས་ནང་འགྲིག་ཐབས་མེད་པ་ལྟ་བུ་རེད། ༧གོང་ས་མཆོག་ལ་དགོངས་གཞི་དེ་འདྲ་སྔ་མོ་ནས་ཡོད་ཀྱང་། སྒྲིག་འཛུགས་ངོས་ནས་གཞུང་འབྲེལ་ཐོག་ཤེས་ཡོན་གལ་ཆེ་ཤོས་བརྩི་ཡི་ཡིན་ཞེས་པ་ཐེངས་དང་པོ་ཆགས་ཀྱི་ཡོད། དེར་བརྟེན་ང་ཚོ་དེའི་ཁོངས་སུ་གཏོགས་པའི་དགེ་ལས་ཡོངས་རྫོགས་ལ་ཆེ་མཐོང་ཆེན་པོ་བྱུང་བ་རེད་བསམ་གྱི་ཡོད། འཛིན་སྐྱོང་ངོས་ནས་བྱེད་དགོས་རྒྱུ་དེ་ཆ་རྐྱེན་དང་འཆར་གཞི། ལམ་སྟོན་ཞུ་རྒྱུ་རེད། སློབ་ཕྲུག་གི་ཤེས་ཡོན་གོང་ནས་གོང་དུ་ཁྲིད་ཐུབ་པ་བཟོ་རྒྱུ་དགེ་རྒན་ཚོ་ལས་གཞན་སུ་གཅིག་གིས་ཡོང་ཐབས་མེད་ཅེས་དང་།
ཡང་ཁོང་གིས་“ཤེས་ཡོན་གྱི་བྱ་གཞག་ནང་དགེ་རྒན་དབུས་སུ་བཞག་པའི་ཐོག་ནས་སྲིད་བྱུས་བཟུང་གི་ཡོད་པ་རེད་ལ་འཛིན་དགོས་ཀྱི་འདུག དགེ་རྒན་རྣམ་པས་འཛིན་གྲྭའི་ནང་སློབ་ཁྲིད་གནང་སྐབས་སློབ་ཕྲུག་དབུས་སུ་བཞག་སྟེ་སློབ་ཁྲིད་གནང་རྒྱུ་ཧ་ཅང་གལ་ཆེན་པོ་རེད། ད་རེས་ཉིན་གསུམ་རིང་གི་ཚོགས་འདུ་ཚོགས་སྐབས་དགེ་རྒན་གྱི་ཞབས་ཞུ་ཡུན་རིང་སྒྲུབ་གནང་མཁན་རྣམས་ཚོགས་འདུ་འདི་ལྟ་བུ་དང་ཟབ་སྦྱོང་མང་པོའི་ནང་ཕེབས་ཡོད་ཀྱི་རེད། དེར་བརྟེན་མཚམས་རེ་འདྲ་པོ་མང་པོའི་ནང་ཕེབས་ཡོད་སྟབས། འཆར་ཅན་ལྟ་བུ་བརྩི་རྒྱུ་ཡོང་མི་སྲིད་པ་མིན་པས། ཚོགས་འདུ་འདིར་འཆར་ཅན་རྩ་བ་ནས་མ་བརྩིས་པར་དམིགས་བསལ་ལ་བརྩི་རོགས་གནང་། གང་ལགས་ཤེ་ན། བོད་རིགས་དགེ་རྒན་གྱི་ཚོགས་ཆེན་ཐེངས་དང་པོ་ཆགས་ཡོད། དགེ་རྒན་རྣམ་པ་འཕྲུལ་འཁོར་ནང་གི་ཨ་མ་ལྟ་བུ་ཆགས་ཀྱི་ཡོད། ཉིན་གསུམ་རིང་ལ་དགོངས་འཆར་གང་གསུངས་པ་དེ་སོ་སོ་རང་ཉིད་དང་སྤྱི་པར་ཕན་ཐོགས་ཡོང་བའི་རེ་བ་ཞུ་བཞིན་ཡོད། ང་ཚོ་འཛིན་སྐྱོང་ངོས་ནས་ཁྱེད་རྣམ་པའི་དགོངས་འཆར་བྱུང་བ་དེ་གྲོས་ཆོད་ལྟ་བུར་འཇོག་རྩིས་མེད། རྩ་བ་ནས་ལག་ལེན་བྱེད་ཐབས་མེད་ན་མ་གཏོགས་ང་ཚོས་གང་ཡོང་ཅི་ཡོང་གི་འབད་བརྩོན་ཞུ་རྒྱུ་ཡིན”་ཞེས་གསུངས་ཡོདཔ་རེད།
དེ་ནས་སྲིད་སྐྱོང་དང་ཤེས་རིག་བཀའ་བློན་གཅིག་ལྕོགས་བློ་བཟང་སེང་གེས་གསུངས་བཤད་གནང་སྐབས། ད་ལྟའི་བོད་མིའི་ཤེས་ཡོན་སྤྱི་ཡོངས་ཀྱི་གནས་སྟངས་སྐོར་ངོ་སྤྲོད་དང་འབྲེལ། ཕྲུ་གུའི་ཤེས་ཡོན་ཡར་རྒྱས་གཏོང་ཐབས་དགེ་རྒན་གཅིག་པུ་མ་ཡིན་པར། ཕྲུ་གུའི་ནང་མི་དང་ཕ་མ་སྤུན་མཆེད་སོགས་ལའང་འགན་ཡོད་སྐོེཾར་དང་། ཤེས་ཡོན་ཡར་རྒྱས་གཏོང་རྒྱུ་ཟེར་བ་དེ་ལོ་གཅིག་གཉིས་སྐད་ཆ་ལྟ་བུ་མིན་པར་མཛུབ་མོ་ལྔ་ལྟར། འཛིན་སྐྱོང་དང་འགན་འཛིན། དགེ་རྒན། ཕྲུ་གུ ཕ་མ་སྤུན་མཆེད་སོགས་ཚང་མས་ཕྱར་གྲུ་མཉམ་འདེགས་གནང་བ་ཡིན་ན། ཤེས་ཡོན་ཡར་རྒྱས་འགྲོ་ངེས་ཡིན་སྐོར། དེ་འདྲ་མིན་པར་མཛུབ་མོ་གཅིག་གིས་འཐུས་ཤོར་བ་ཡིན་ན། ཤེས་ཡོན་ཉམས་ཆགས་འགྲོ་རྒྱུ་ཡིན་པ་དང་། དེར་བརྟེན་དམིགས་བསལ་དགེ་རྒན་ཚོར་ལས་འགན་ཧ་ཅང་ཆེན་པོ་ཡོད་སྐོར། ཁོ་རང་སྲིད་སྐྱོང་དུ་བདམས་རྗེས་༧གོང་ས་མཆོག་གི་གཟིམ་ཆུང་མཇལ་ཁ་བཅར་སྐབས་བཀའ་སློབ་སྩལ་བ་ལུང་འདྲེན་གྱིས་གསུངས་བཤད་གནང་ཡོད་པ་རེད།
ཡང་ཁོང་གིས་“གཞིས་རྩའི་བོད་སློབ་འཛིན་ཚོགས་ཚུར་བླངས་པའི་རྗེས་ལ་ཇི་འདྲ་ཆགས་མིན་ཚོད་དཔག་ཐུབ་རྒྱུ་ཧ་ཅང་ཁག་པོ་རེད། འོན་ཀྱང་བོད་སློབ་འཛིན་ཚོགས་ཚུར་རྩིས་བླངས་པའི་རྗེས་ཡར་རྒྱས་འགྲོ་རྒྱུའི་རེ་བ་དང་འབད་བརྩོན་ཞུ་རྒྱུ་ཡིན། བོད་སློབ་འཛིན་ཚོགས་ཀྱི་འགན་འཛིན་སྐུ་ཞབས་ཨ་པུརྦ་ཅན་དྲ་ (Apurva Chandra) ཁོང་དང་ང་རང་འདྲིས་པོ་ཡོད། ད་ལྟའི་ཆར་རྒྱ་གར་ཤེས་རིག་ལས་ཁུངས་གི་དྲུང་ཆེ་དང་སྐུ་ཞབས་ཀ་པིལ་སི་བྷལ་མཆོག (Kapil Sibal) དེ་བཞིན་ཉེ་ལམ་རྒྱ་གར་གྱི་བློན་ཆེན་གསར་པ་སྐུ་ཞབས་རཱ་ཇུ་ (Raju)མཆོག་དང་མཇལ་བ་མ་ཟད། བློན་ཆེན་གཞོན་པ་སྐུ་ཞབས་ཤ་ཤི་ཐ་རུར་ (Shashi Tharoor)མཆོག་སོགས་དང་མཇལ་སྐབས་ཚང་མས་རྒྱབ་སྐྱོར་གནང་བྱུང། མཐའ་མ་དེར་ང་ཚོའི་བོད་སློབ་འཛིན་ཚོགས་རྩིས་ལེན་རྒྱུའི་འཆར་གཞི་འཁོད་པའི་ཡིག་ཆ་དེ་རྒྱ་གར་གཞུང་གི་འཛིན་སྐྱོང་བཀའ་ཤག་ནང་སྙན་སྒྲོན་ཞུ་དགོས”་ཞེས་དང་།
མཐར་ཁོང་གིས་“སློབ་གྲྭ་ཁག་གི་ནང་ཕྲུ་གུའི་ཤེས་ཡོན་ཇི་ལྟར་ཡར་རྒྱས་གཏོང་དགོས་རེད་དམ། ཞེས་པའི་དྲི་བ་དེ་ཧ་ཅང་གནད་འགག་ཆེན་པོ་ཆགས་ཀྱི་འདུག རྣམ་པ་ཚོ་ཚང་མས་མཁྱེན་གསལ་རེད། ཨ་རིར་རྒྱ་གར་ནས་སློབ་སྦྱོང་བྱེད་དུ་འགྲོ་མཁན་ལོ་རེར་སློབ་ཕྲུག་སྟོང་ཕྲག་དགུ་བཅུ་གོ་གྲངས་འགྲོ་གི་ཡོད། རྒྱ་གར་ནང་གི་བཙན་བྱོལ་བོད་མིའི་མི་འབོར་ཡོངས་རྫོགས་ཨ་རིར་བཏང་བ་བཞིན་རྒྱ་གར་ནས་སློབ་ཕྲུག་འགྲོ་གི་ཡོད། རྒྱ་ནག་ནས་ཕལ་ཆེར་སྟོང་ཕྲག་དགུ་བཅུ་གོ་བདུན་གོ་བརྒྱད་ཙམ་ཡིན་པ་ཡོད། ངས་གོ་ཐོས་ལ་རྒྱ་གར་གྱི་གྲངས་འབོར་མཐོ་ཤོས་རེད། བལ་ཡུལ་ནས་སྟོང་ཕྲག་བརྒྱད་དགུ་ཙམ་ཨ་རིར་སློབ་སྦྱོང་བྱེད་དུ་འགྲོ་གི་ཡོད་འདུག བལ་ཡུལ་དང་རྒྱ་ནག་གི་སློབ་ཕྲུག་སོགས་ཐུག་མྱོང་ཡོད།
ཁོང་ཚོས་དཀའ་ལས་མང་པོ་བརྒྱབ་སྟེ་ཨ་རིར་སླེབས་པ་ཡིན་ཞེས་བརྗོད་བྱུང། ང་ཚོ་བོད་པའི་སློབ་ཕྲུག་ལ་ག་རེ་འདང་གི་མེད་པ་རེད། སློབ་གྲྭའི་མཐུན་རྐྱེན་ཐོག་བལྟས་ན་དེང་སང་སློབ་གྲྭ་ཁག་མང་ཆེ་བའི་ནང་ཀམ་པུ་ཊར་དང་དྲ་རྒྱ་འདུག ང་འོས་འདེམས་མ་བྱུང་གོང་སློབ་གྲྭ་ཞིག་ཏུ་འགྲོ་སྐབས་སློབ་གྲྭ་དེར་དྲ་རྒྱ་བེད་སྤྱོད་བྱེད་ཀྱི་མི་འདུག སྐབས་དེར་ངས་སློབ་སྤྱིར་ཅིའི་ཕྱིར་དྲ་རྒྱ་བེད་སྤྱོད་བྱེད་ཀྱི་མེད་དམ་བརྗོད་སྐབས། ཁོང་གིས་ཕྲུ་གུ་ཚོས་(Facebook) དང་(Chat) སོགས་མགོ་འཁོར་ཏེ་དུས་ཚོད་འཕྲོ་བརླག་བཏང་གི་འདུག་ཅེས་གསུངས་བྱུང། ཕྲུ་གུ་གཅིག་གཉིས་ཀྱི་དུས་ཚོད་འཕྲོ་བརླག་བཏང་སྟེ་ཕྲུ་གུ་ཚང་མར་དྲ་རྒྱ་བེད་སྤྱོད་བྱེད་རྒྱུ་མེད་པ་བཟོས་ན་དེ་དཀའ་ངལ་རེད། དེར་བརྟེན་དྲ་རྒྱའི་ཆ་རྐྱེན་བསྐྲུན་པ་དེ་ཕྲུ་གུ་བརྒྱ་ཆ་བརྒྱད་ཅུ་དགུ་བཅུ་ལ་མེད་པ་ཆགས་ན་གྱོང་སུར་རག་གི་ཡོད་དམ། ང་ཚོའི་དགེ་རྒན་རྣམ་པས་གཙོས་མཛད་གཙོ་རྣམ་པ་ཚོས་མང་ཚོགས་ཁྲོད་ལན་མང་གསུངས་ཡོད། ཨ་རིའི་ནང་ཇིའུ་མི་རིགས་བཞིན་ང་ཚོས་བྱེད་དགོས་ཀྱི་འདུག”་ཅེས་གསུངས་ཡོད་པ་རེད།