མི་ལོ་བཅུ་གཅིག་ཚིག་རྐང་གཉིས་ལ་བསླབས།
<<སྙན་ངག>>
ཇི་སྲིད་འཁོར་བའི་གྲོང་འདི་མ་སྟོང་བར།།
དེ་སྲིད་སྙན་ཚིག་རིག་པའི་སྲད་བུ་ནི།།
ཕན་ཚུན་མཛའ་བའི་རྒྱུན་ལམ་ཉག་གཅིག་སྟེ།།
ས་སྟེང་འདི་ཡི་རིན་ཆེན་དང་པོ་ཡིན།།
མི་ལོ་བཅུ་གཅིག་ཚིག་རྐང་གཉིས་ལ་བསླབས།།
ད་དུང་ཤེས་བྱའི་ཕ་མཐའ་མ་ཆོད་པས།།
ཞོར་དང་ཡུད་ཀྱིས་ཚིམས་པའི་བྱིས་པ་ལ།།
ཡིད་རྟོན་འཆའ་བའི་ཡུལ་ལས་རིང་དུ་འདས།།
དུས་ཀྱི་ཆུ་བོ་ཤུགས་དང་རླབས་ཀྱིས་བདས།།
བརྩོན་འགྲུས་འཕྲུལ་གྱིས་བསྐོར་བའི་གྲུ་ཟུར་ན།།
འཇག་མའི་ཤུགས་གླུ་ཉན་བཞིན་ཆས་པ་ཡི།།
སྙན་ངག་མཁན་པོ་འདི་ཀོ་ཉམས་རེ་དགའ།།
ཡིད་འོང་ཉམས་ཀྱིས་ཁྱད་པ་བཏོན་པ་ལ།།
སྙན་འཇེབས་དབྱངས་དང་འགྲོགས་པའི་ཁུ་བྱུག་ངག།།
བདར་ཤ་ཡང་ནས་ཡང་དུ་བཅད་པ་ལས།།
བླ་བརྡོལ་གླུ་ཞིག་མིན་པ་ཁོ་བོས་ཤེས།།
ལང་ཚོ་བཅད་ལྷུག་སྤེལ་མས་མཛེས་པ་རེས།།
ཡང་དག་དོན་གྱི་འཛུམ་ཞལ་ལྷང་ངེར་མངོན།།
མ་བཅོས་ཚིག་གི་སྦྱོར་བའི་རིན་ཐང་ལ།།
ཡོད་ཚད་དངོས་པོ་ཟླུམ་ཡང་དོ་ཟླ་ཅི།།
མཚར་སྡུག་བཅུ་ཕྲག་རིག་གཞུང་ལུས་ཕྲ་མར།།
ཐོས་བསམ་སྒོམ་པའི་ཟ་འོག་མཛེས་གྱུར་ཀྱང་།།
དབྱངས་སྙན་ཚིག་གི་རྒྱན་ཆར་མི་ལྡན་ན།།
དཔྱོད་ལྡན་སྲེད་པའི་ཡུལ་ཞིག་མིན་པར་གོ།
༢༠༡༣།༡།༩།