བོད་དོན་ལས་འགུལ་བར་རྒྱབ་སྐྱོར་ཆེད་རྐྱང་ཕྱག་འཚལ་བ་ཡིན།
ཟླ་འདིའི་ཚེས་༡༣ གཟའ་ཉི་མའི་ཉིན་དྷ་ས་མེག་གྷན་དུ་སོང་སྟེ། ཕྱི་དྲོ་ཆུ་ཚོད་༤ པའི་ཐོག་ནང་ལ་ཡོང་སྐབས། གངས་སྐྱིད་སྒོ་འགྲམ་དེར་སྐྱེས་དམན་རྒན་པ་ཞིག་གིས་མགོར་བོད་ཀྱི་རྒྱལ་དར་ཞིག་བཙུགས་སྟེ། བརྐྱང་ཕྱག་འཚལ་ནས་ཡོང་གི་འདུག ཁོང་གི་ཉེ་འཁྲིས་སུ་བཅར་སྐབས།
ལོ་སྔོན་མར་བོད་དོན་ཆེད་མ་བུ་གསུམ་གྱིས་གོམ་བགྲོད་བྱས་ཏེ། དྷ་ས་ནས་བལ་ཡུལ་བར་བསྐྱོད་མཁན་གླིང་ཚ་ཚེ་བསྟན་རྡོ་རྗེའི་ཨ་མ་ལྡོམ་པ་སྐྱིད་རེད།
ཁོང་ལ་ཕྱག་འཚལ་བའི་ལས་འགུལ་དེ་སྤེལ་དགོས་དོན་སྐོར་དྲིས་པར། ཁོང་གིས་“ཚེས་༡༢ ཉིན་ཀང་ར་རྫོང་ཁོངས་ཀྱི་ས་རཱ་མཐོ་སློབ་ཉེ་འཁྲིས་ནས་འགོ་བཙུགས་ཏེ། ཕྱག་འཚལ་ནས་ཡོང་བ་ཡིན། སང་ཉིན་དྷ་ས་ཐེག་ཆེན་ཆོས་གླིང་གཙུག་ལག་ཁང་ནས་མཚམས་འཇོག་རྒྱུ་ཡིན་”ཞེས་གསུངས་སོང་།
ཁོང་གིས་ལས་འགུལ་དེ་སྤེལ་དགོས་དོན་སྐོར་གསུང་དོན། “ད་སྔ་བར་དུ་བོད་དོན་ཆེད་རང་ལུས་མེར་སྲེག་གིས་རྒྱ་གཞུང་ལ་ངོ་རྒོལ་བྱེད་མཁན་ཚོར་གདུང་སེམས་མཉམ་བསྐྱེད་དང་། རྒྱབ་སྐྱོར་མཚོན་ཆེད་དང་། གཉིས་པ་བོད་ཀྱི་ཆབ་སྲིད་བཙོན་པ་ཚོར་རྒྱབ་སྐྱོར་མཚོན་ཆེད། གསུམ་པ་ངའི་བུ་གླིང་ཚ་ཚེ་བསྟན་རྡོ་རྗེ་ད་ལྟ་བལ་ཡུལ་བཙོན་ཁང་དུ་ངག་བཅད་ངོ་རྒོལ་བྱས་ནས་བསྡད་ཡོད་པས། དེར་རྒྱབ་སྐྱོར་མཚོན་ཆེད་དུ་ཡིན་”ཞེས་གསུངས་སོང་།
དེ་བཞིན་ཁོང་གིས་“ངའི་བུ་གླིང་ཚ་ཚེ་བསྟན་རྡོ་རྗེར་ཐུག་འཕྲད་བྱེད་དུ་འགྲོ་བསམ་ཡོང་། སྐྱབས་བཅོལ་དེབ་(RC) དུས་འགྱངས་དེབ་སྐྱེལ་ཐུབ་ཀྱི་མེད་པས། བུ་ལ་ཐུག་འཕྲད་བྱེད་དུ་འགྲོ་ཐུབ་ཀྱི་མི་འདུག་ཅེས་”གསུངས་སོང་།
ལྡོམ་པ་སྐྱིད་དང་ཁོང་གི་བུ་གླིང་ཚ་ཚེ་བསྟན་རྡོ་རྗེ། བུ་མོ་ལྷ་མོ་མཚོ་བཅས་ཀྱིས་༢༠༡༢ ལོའི་ཕྱི་ཟླ་༣ པའི་ཚེས་༡༠ བོད་ཀྱི་གསུམ་བཅུའི་དུས་དྲན་ཉིན་དྷ་སར་ནས་གོམ་བགྲོད་འགོ་བཙུགས་སྟེ། བོད་དུ་བསྐྱོད་རྒྱུ་བྱས་ནའང་། རྒྱ་གར་དང་བལ་ཡུལ་ས་མཚམས་ནས་སྐོར་སྲུང་ཉེན་རྟོག་པས་བཀག་སྟེ། འགྲོ་བཅུག་མེད་པ་རེད། རྗེས་སུ་གླིང་ཚ་ཚེ་བསྟན་རྡོ་རྗེ་གསང་བའི་ཐོག་ས་མཚམས་བརྒལ་ཏེ་བསྐྱོད་སྐབས། བལ་ཡུལ་ཉེན་རྟོག་པས་འཇུས་ཏེ། བཙོན་འཇུག་བྱས་ཡོད་པ་རེད།།
