དྷ་སའི་གནམ་གཤིས་དང་བདག་གི་ངོ་གདོང་།
སྐྱོ་གར་དབྱངས་ལ་འཐེན་པའི་མི་ཚོགས་ཀྱི་ཁྲོད་ནས།།
དགུན་གསུམ་ཙག་གི་འཁྱག་ཤད་ལ་ཐོད་ལ་བབས་སོང་།།
མ་མཇལ་འཚམས་འདྲིའི་གླུ་སྐད་ཕན་ཚུན་ལ་གྱེར་དུས།།
ཡ་ཆུང་འགྲིན་པ་དཀར་པོའི་འཕྲུལ་འཁོར་དེ་འཐོར་སོང་།།
ཡོད་ཚད་རྒྱང་ནས་བསྐྱུར་བའི་ཆོད་སེམས་ཀྱི་འོག་ནས།།
ངེས་མེེད་ཡུལ་གྱར་སེམས་པ་རི་གྲོང་ལ་ཆགས་འདུག།།
སྣ་ཚོགས་མི་རིགས་འདྲེས་པའི་’མེག་གྷན’གྱི་མངལ་ནས།།
ཡབ་མེད་བྱིས་ཕྲུག་ཅི་འདྲའི་མང་དག་ཅིག་སླེབས་འདུག།
སྐྲ་སེར་དམར་ནག་སུམ་འཛོམས་མི་ཡུལ་གྱི་ཁྱད་ཆོས།།
དཀའ་སྤྱད་འཚོ་བའི་རྨི་ལམ་འཇིག་རྟེན་གྱི་ཆོས་ཉིད།།
རྒན་གཞོན་བར་གསུམ་སྨྱོས་པ་དྷ་ས་ཡི་རང་གཤིས།།
དགེ་བཤེས་སྒང་ནས་འབབ་པ་དེང་སང་གི་ཁ་ཕྱོགས།།
ལུས་ཟུངས་གོས་ཀྱིས་མ་སྐྱོབ་དེ་རིང་གི་གནམ་གཤིས།།
ཁ་ཕོར་ལག་ནས་མ་ཐུབ་གཏམ་རྒྱུད་ཀྱི་ཐོག་མ།།
ཞལ་ལྕེའི་འདབ་མ་མ་ལྡོབ་ཙག་རླུང་གི་ཤུགས་རྐྱེན།།
ངོ་མཚར་སྟོང་གི་ལྟད་མོར་འདི་ལྟར་རང་འཕྲད་སོང་།།
སྲང་ལམ་དོག་པའི་ལ་ཁར་རླངས་འཁོར་གྱིས་འཚང་ཁ།།
གནས་གཤིས་གྲང་བའི་ལ་ཁར་སྣ་ཆུ་ཡིས་འགྲམ་ལྕག།
གང་གིས་བསྒྱུར་དུ་མེད་པའི་ཨ་རོགས་ཀྱི་ངོ་གདོང་།།
ལམ་འཕྲིན་ཁེར་རྒྱུག་བར་ནས་སྟོན་དགོས་ཀྱང་ཐུག་སོང་།།
ཆགས་ཞེན་སེམས་ཀྱི་མྱོང་བ་ཤི་ཡུལ་ནས་མི་བརྗེད།།
‘མེག་གྷན’་འཁོར་ཡུག་སྐྱོ་བོ་སྣང་ཡུལ་ལ་མི་ལེན།།
དེ་རིང་དོན་གྱིས་མྱངས་པའི་འཁྱག་ལྟོགས་ཀྱི་རི་མོ།།
དྲན་འཛིན་སེམས་ཀྱི་ཁམས་ལ་བརྗེད་བྱང་དུ་བསྐོས་ཡོད།།