རྒྱ་ནག་གི་རྒྱལ་དར་མར་ཕབས་ནས་གཙབ་རལ་བཏང་འདུག
ཁམས་རྫ་ཆུ་ཁ་མང་དགེ་ས་ཁུལ་དུ་བོད་པ་ཁ་ཤས་ཀྱིས་ཡིག་རྨོང་སེལ་བའི་ཆེད་བཙུགས་པའི་སློབ་གྲྭ་ཆུང་ཆུང་ཞིག་ཡོད་པ་དང་། འདི་ལོ་རྒྱ་ནག་གིས་ཁོང་ཚོས་ཡར་རྒྱས་གཏོང་གི་ཡིན་ཞེས་སྐད་ཆ་བཤད་པའི་རྗེས་སུ་འདི་ལོ་ཕྱི་ཟླ་ ༣ ཚེས་༧ ཉིན་རྒྱ་ནག་གི་རྒྱལ་དར་ཞིག་བསྒྲེངས་ཡོད་འདུག དེའི་མཚན་མོ་རྒྱལ་དར་མར་ཕབས་ནས་གཙབ་རལ་བཏང་ཡོད་འདུག
འདི་ལོའི་གསུམ་བཅུ་དུས་དྲན་ཉིན་བོད་ཁམས་རྫ་ཆུ་ཁ་སེར་ཤུལ་རྫོང་ཐོག་བོད་མི་ལྔས་རྒྱ་ནག་སྲིད་གཞུང་ལ་ངོ་རྒོལ་སྐད་འབོད་བྱས་ནས་འཛིན་བཟུང་བྱས་ཡོད་པ་དང་། ད་ལྟའི་སྐབས་ཁོང་རྣམས་ཀྱི་གནས་སྟང་གང་འདྲ་ཡིན་མིན་དང་། གཞན་ཡང་མང་དགེ་དགོན་པ་དང་། འབུམ་རྙིང་དང་འབུམ་གསར་སྡེ་བ་བཅས་ཀྱི་ས་གནས་ཀྱི་གནས་སྟངས་ག་འདྲ་ཡོད་མེད་སྐོར་རྒྱ་གར་ལྷོ་ཕྱོགས་སེ་བྱེས་བྱ་བྲལ་ཁང་ཚན་དུ་བཞུགས་པའི་རྫ་ཆུ་ཁའི་དགེ་འདུན་པ་བྱམས་པ་ཡོད་ལགས་སུ་བཅར་འདྲི་བྱས།
དྲི་བ། འདི་ལོའི་གསུམ་བཅུའི་དུས་དྲན་ཉིན་བོད་ཁམས་རྫ་ཆུ་ཁ་གསེར་ཤུལ་རྫོང་ཐོག་ཏུ་རྫ་ཆུ་ཁ་མང་དགེ་དགོན་པའི་གྲྭ་བློ་བཟང་བསམ་གཏན་དང་། བསོད་ནམས་རྣམ་རྒྱལ། ཐུབ་བསྟན་དགེ་ལེགས་དང་། གཞན་ཡང་མི་སྐྱ་བློ་བཟང་སྐལ་བཟང་དང་། ངག་དབང་རྒྱ་མཚོ་གཉིས་བཅས་བོད་མི་ལྔས་རྒྱ་ནག་སྲིད་གཞུང་ལ་ངོ་རྒོལ་སྐད་འབོད་བྱས་ནས་འཛིན་བཟུང་བྱས་རྗེས་ཀྱི་ཁོང་ཚོའི་གནས་སྟངས་ག་འདྲ་ཆགས་ཡོད་མེད་སྐོར་རྒྱུས་ལོན་བྱུང་སོང་ངམ།
ལན། གྲྭ་པ་དེ་ཚོ་ད་ལྟ་གསེར་ཤུལ་རྫོང་ཐོག་ཏུ་ཉར་འདུག ཁོང་ཚོ་ནང་མི་དང་ཐུག་འཕྲད་བྱེད་བཅུག་མི་འདུག ནམ་རྒྱུན་ནས་ང་ཚོའི་བཙོན་པ་མང་ཆེ་བ་མི་ཉག་ར་རྔ་ཁ་ལ་ཁྲིད་འགྲོ་གི་ཡོད་པ་རེད། ཁོང་ཚོ་ཡང་དེ་ལ་འཁྲིད་ཀྱི་ཡིན་ལབ་ཀྱི་ཡོད་ས་རེད། དེ་ནས་བཙོན་པ་ཚོ་ས་གནས་གཞན་ལ་ཁྲིད་རན་སྐབས་ནང་མིས་ཟ་མ་དང་གྱོན་པ་དེ་འདྲ་སྐྱེལ་རྒྱུའི་ལུགས་སྲོལ་ཡོད་པ་བཞིན། ཁོང་ཚོར་ཟ་མ་དང་གྱོན་པ་བསྐྱལ་ན་འགྲིག་གི་རེད། ཡིན་ནའང་། ནང་མི་ཚོ་ཐུག་འཕྲད་བྱེད་ཆོག་གི་མ་རེད་ཅེས་བཤད་འདུག དེ་མིན་དགོན་པའི་ནང་གི་ཁོང་ཚོའི་སྡོད་ཤག་བསྔོགས་བཤེར་གཏོང་མཁན་དམག་མི་མང་པོ་ཡོང་ཡོད་ས་རེད། ཡིན་ནའང་། དགོན་པའི་བླ་མ་དང་ལས་བྱེད་དེ་ཚོས་དམག་མི་མང་པོ་དགོན་པ་དང་སྡེ་པའི་ནང་ལ་ཡོང་ནས་ཟིང་ཆ་བསླངས་པ་ཡིན་ན། སྡེ་པའི་མི་མང་གིས་ག་རེ་བྱེད་མིན་ཧ་གོ་ཡི་མ་རེད། དེ་འདྲ་ཡིན་དུས་དགོན་པ་དང་བླ་མ་ཁོང་ཚོས་འགན་ཁུར་ཐུབ་ཀྱི་མེད་ལབ་ནས་དམག་མི་མང་པོ་སླེབས་ཡོད་ས་མ་རེད། དེ་ནས་ཡུལ་ཚོའི་སྲིད་གཞུང་གི་ལས་བྱེད་དང་དམག་མི་ཁ་ཤས་ཤིག་ཡོང་ནས་འཛིན་བཟུང་བྱས་པའི་གྲྭ་པ་གསུམ་གྱི་གྲྭ་ཤག་བསྔོགས་བཤེར་བྱས་པ་དང་། ཁོང་ཚོའི་ཅ་དངོས་ཁ་ཤས་ཡང་བཙན་ཁྱེར་བྱས་ཡོད་ས་རེད། ཡིན་ནའང་། ད་ལྟའི་སྐབས་ལ་ཅ་དངོས་དེ་ཚོ་ག་རེ་ག་རེ་ཁུར་ཡོད་མེད་ཤེས་ཀྱི་མི་འདུག
དྲི་བ། ཆབ་སྲིད་ཀྱི་གནས་ཚུལ་འོག་རྒྱ་ནག་གིས་བོད་མི་འཛིན་བཟུང་བྱས་པ་ཡིན་ན། འཛིན་བཟུང་བྱས་པའི་མི་སྣ་དེའི་ནང་མི་སྤུན་མཆེད་དེ་འདྲ་ཡང་འཛིན་བཟུང་བྱེད་པ་དང་། འདྲི་གཅོག་གཏོང་བ་སོགས་དཀའ་ངལ་སྤྲོད་ཀྱི་ཡོད་པ་ལྟར་ཁོང་ཚོའི་ནང་མི་སྤུན་མཆེད་དང་། གཉེན་ཉེ་དེ་འདྲ་ལ་རྒྱ་ནག་གིས་དཀའ་ངལ་སྤྲོད་ཀྱི་འདུག་གམ།
ལན། ད་ལྟ་སྡེ་པའི་ནང་འབྲེལ་བ་ཡོད་མེད་ཀྱི་དབང་གིས་འབུམ་རྙིང་སྡེ་པ་དང་འབུམ་གསར་སྡེ་པའི་ནང་མི་དེ་གཉིས་ཀྱི་སྐོར་ལ་འབྲེལ་བ་བྱེད་ས་རག་གི་མི་འདུག དེ་མ་ཡིན་པའི་མང་དགེ་དགོན་པའི་གྲྭ་པ་དེ་ཚོའི་གྲྭ་ཤག་བསྔོགས་བཤེར་བྱས་པ་དང་། ཁོང་ཚོའི་ནང་མི་སྐད་བཏང་ནས་ཁྱེད་རང་ཚོའི་མིས་ནག་ཉེས་བསགས་ཡོད་པ་རེད། ཁོང་ཚོ་བཙོན་ཁང་ལ་འགྲོ་དགོས་ཀྱི་རེད། ཡིན་ནའང་ཁོ་ཚོ་ནང་མི་དང་ཐུག་འཕྲད་བྱེད་ཆོག་གི་མ་རེད་ཟེར་བ་དེ་འདྲ་བཤད་ཡོད་ས་རེད། དེ་མིན་དམིགས་བསལ་ནང་མི་དང་། གཉེན་ཉེ་སྤུན་མཆེད་དེ་འདྲ་ལ་ཆད་པ་བཅད་པ་དང་། དྲི་གཅོད་བྱས་པ། འཛིན་བཟུང་བྱས་པའི་གནས་ཚུལ་ཡོད་ས་མ་རེད།
དྲི་བ། དེ་ནས་རྒྱ་ནག་གི་ཆབ་སྲིད་དང་འབྲེལ་བའི་མི་ཞིག་འཛིན་བཟུང་བྱས་པ་ཡིན་ན། དེའི་སྡེ་པའི་ནང་དམ་དྲག་བྱེད་པ་དང་། དམག་མི་བཏང་བ་སོགས་ཀྱི་གནས་ཚུལ་ད་ལྟ་བར་དུ་མང་པོ་བྱུང་བཞིན་ཡོད་པ་བཞིན། ཁོང་ཚོའི་སྡེ་པའི་ནང་དེ་འདྲ་བྱུང་འདུག་གམ།
ལན། སྤྱིར་བཏང་གནས་ཚུལ་ལྷག་སྐབས་ལམ་སང་དམག་མི་གཏོང་བ་དང་། དམ་དྲག་བྱེད་པའི་གནས་ཚུལ་ཞིག་ཡོད་པ་རེད། ཡིན་ནའང་། ད་ལྟའི་སྐབས་འབུམ་རྙིང་དང་འབུམ་གསར། མང་དགེ་སྡེ་པའི་ནང་དམག་མི་མང་པོ་བཏང་འི་གནས་ཚུལ་མི་འདུག འབུམ་རྙིང་ལ་ཉེ་ཆར་སྣུམ་སྒམ་གྱི་དོན་ལ་རྙོག་གྲ་ཞིག་བྱུང་བའི་སྐབས་ལ་དམག་མི་མང་པོ་ཞིག་བཏང་བ་རེད། དེ་མིན་མང་དགེ་དེ་ཚོའི་ནང་ད་ལྟའི་སྐབས་ལ་དགོན་པ་དང་། བླ་མ་དེ་ཚོས་འབྱུང་འགྱུར་གནས་ཚུལ་མི་ལྷག་པའི་འགན་ཁུར་འདྲ་པོ་བྱས་ནས་ད་ལྟའི་སྐབས་ལ་གནས་ཚུལ་ཧ་ཅང་ཛ་དྲག་མ་ཡིན་པ་བྱས། ཡང་དམག་མི་མང་པོ་ཞིག་སླེབས་ནས་དགོན་པ་དང་སྡེ་པའི་ནང་སུན་པོ་བཟོས་པ་ཡིན་ན། མ་འོངས་པར་དགོན་པ་དང་བླ་མ་ཁོང་ཚོས་འགན་ཁུར་ཐུབ་ས་མ་རེད་ཟེར་བ་དེ་འདྲའི་སྒང་ནས་དམག་མི་དེ་ཚོ་བཀག་ཐུབ་ཀྱི་ཡོད་ས་རེད།
དྲི་བ། གཞན་ཡང་གསུམ་བཅུའི་དུས་དྲན་མ་བྱུང་བའི་སྔོན་ལ་ཁམས་རྫ་ཆུ་ཁ་མང་དགེ་ས་ཁུལ་གྱི་སློབ་གྲྭ་ཞིག་ནས་རྒྱ་ནག་གི་རྒྱལ་དར་མར་ཕབས་པའི་གནས་ཚུལ་ཞིག་འདུག་དེའི་སྐོར་ག་འདྲ་རེད་དམ།
ལན། དེ་ཁོ་རང་ཚོའི་སྡེ་པའི་ནང་དུ་བོད་པ་ཁ་ཤས་ཀྱིས་ཡིག་རྨོང་སེལ་བའི་ཆེད་བཙུགས་པའི་སློབ་གྲྭ་ཆུང་ཆུང་ཞིག་ཡོད་པ་རེད། དེ་ད་ལོ་ནས་བཟུང་རྒྱ་ནག་གིས་ཁོང་ཚོས་ཡར་རྒྱས་གཏོང་གི་ཡིན། བདག་པོ་རྒྱག་གི་ཡིན་ཟེར་ནས་ཉེ་ཆར་སྐད་ཆ་བཤད་འདུག སྐད་ཆ་བཤད་པའི་རྗེས་སུ་འདི་ལོ་ཕྱི་ཟླ་ ༣ ཚེས་༧ ཉིན་སློབ་གྲྭ་དེའི་སྟེང་ལ་རྒྱ་ནག་གི་རྒྱལ་དར་ཆེན་པོ་ཞིག་བསྒྲེངས་འདུག སྤྱིར་བཏང་རྒྱལ་དར་བསྒྲེངས་རྒྱུ་དེ་རྒྱ་ནག་གི་སྲིད་ཇུས་འདྲ་པོ་རེད། ཡིན་ནའང་། ད་ལྟ་བར་རྫ་ཆུ་ཁར་སློབ་གྲྭ་ཆུང་ཆུང་དེ་འདྲ་ལ་མ་གཏོགས་བསྒྲེངས་ཐུབ་ཡོད་པ་མ་རེད། དེའི་མཚན་མོ་རྒྱལ་དར་མར་ཕབས་ནས་གཙབ་རལ་བཏང་འདུག ཡིན་ནའང་དེའི་རྐྱེན་པས་དམིགས་བསལ་མི་འཛིན་བཟུང་བྱས་པ་སོགས་ཀྱི་གནས་ཚུལ་མི་འདུག
དྲི་བ། ད་ལོའི་གསུམ་བཅུ་དུས་དྲན་སྐབས་ཀྱི་དོན་རྐྱེན་དང་འབྲེལ་བ་མེད་པའི་གནས་ཚུལ། གསར་འགོད་བརྒྱུད་ལམ་ནང་སླེབས་མ་ཐུབ་པ། དཔེར་ན་མི་འཛིན་བཟུང་བྱས་པའམ་ཁྲིམས་ཐག་བཅད་པ། ཆབ་སྲིད་བཙོན་པ་ཀློད་གྲོལ་བཏང་བ་སོགས་ད་ལྟ་གནས་ཚུལ་དེ་འདྲ་འདུག་གམ།
ལན། ཆབ་སྲིད་དང་འབྲེལ་བའི་ཐོག་ནས་གསར་དུ་མི་འཛིན་བཟུང་བྱས་པ་དེ་འདྲ་ད་ལྟ་བྱུང་མི་འདུག སྔོན་མ་ ༢༠༠༨ ཀྱི་ལོར་ལྷ་ས་ནས་འཛིན་བཟུང་བྱས་པའི་དགེ་འདུན་ཁག་ཅིག་ཡོད་རེད། དེའི་ནང་ནས་མང་དགེ་དགོན་པའི་གྲྭ་བཟོད་པ་ལགས་དང་། དབོན་པོ་དགོན་པའི་བློ་བཟང་དངོས་གྲུབ་ཁོང་གཉིས་ལ་ལོ་ལྔའི་བཙོན་འཇུག་ཁྲིམས་ཐག་བཅད་ནས་འདི་ལོའི་གསུམ་བཅུ་དུས་དྲན་ཉིན་བཙོན་འཇུག་དུས་ཡིན་རྫོགས་ཡོད་རེད། བཙོན་འཇུག་དུས་ཚོད་ཁ་གང་ནས་སི་ཁྲོན་ཞིང་ཆེན་ལ་མར་རྩིས་སྤྲད་འདུག ཡིན་ནའང་ཟླ་འདིའི་ཚེས་ ༡༧ ཉིན་ད་དུང་བཟོད་པ་ལགས་བཏང་མི་འདུག ད་དུང་སི་ཁྲོན་ཞིང་ཆེན་ནང་བཀག་ཉར་བྱས་འདུག་ཟེར། དེ་མིན་བློ་བཟང་དངོས་གྲུབ་ཀྱི་གནས་ཚུལ་གསལ་པོ་ཧ་གོ་གི་མི་འདུག དེ་དང་མཉམ་དུ་ང་ཚོའི་དགོན་པའི་བླ་མ་ཨ་དྲིལ་རིན་པོ་ཡང་གསུམ་བཅུའི་དུས་དྲན་ཉིན་སྤྱིར་བཏང་མངགས་རྒྱུ་རེད་མོད། བསྐྱར་དུ་ཟླ་བ་གཅིག་ལ་ཕྱིར་འགྱངས་བྱས་ནས་མངགས་མི་འདུག
གཞན་ཕ་ཡུལ་དུ་ཕྲ་འཕྲིན་གྱི་བརྒྱུད་ལམ་སྔོན་མ་ཞིག་ནས་བཀག་ཟིན་པ་རེད། ད་ལྟའི་སྐབས་ལ་ཁ་པར་བརྒྱུད་ལམ་ཡང་བཀག་ནས་གནས་ཚུལ་གསར་པ་དང་། ཁ་གསལ་པོ་དེ་འདྲ་རག་ཐུབ་གྱི་མི་འདུག
མེ་སོར་གསར་འགོད་པས་བཅར་འདྲི་བྱས།
