ཚོར་བའི་བཟི་ཁ།
ཚོར་བའི་བཟི་ཁ།
_____མིག་མདུན་གྱི་སྲིད་ཁམས་ལ་སླར་ཡང་སྨྲས་པ། [སྙན་ཚོམ།]
མདུན་དུ་གདའ་བའི་ས་གཞི་ནི།།
རྐང་ཆུང་སྤོ་ས་ཡིན་སོང་ན།།
རྗེས་སུ་ལུས་པའི་ང་རང་ཡང་།།
ནམ་ཞིག་འདི་ན་བརྟོལ་བར་ངེས།།
ལྷམ་ཀོག་རལ་བའི་སྟངས་ཀ་འདིས།།
རྐང་ལ་ཟུག་གཟེར་བརྒྱབ་སོང་ན།།
སུ་ཞིག་དྲན་པའི་ན་ཟུག་ཀྱང་།།
མིག་ཆུ་རྐང་གཅིག་ཡིན་པར་ངེས།།
གློག་སྙིང་གསེབ་ཀྱི་ཚ་ཤག་འདི།།
ངུ་འབོད་བྱ་སའི་གཞི་ཡིན་ན།།
ལྷ་མོ་དྲན་པའི་སྐྱོ་བ་ཡང་།།
མྱ་ངན་ཁྲོད་ཀྱི་རོལ་དབྱངས་ཉིད།།
ཁ་ངོ་འདར་བའི་སྙན་ངག་པ།།
ཚོར་བ་ཆང་ལྟར་མངར་བཞག་ན།།
དུ་འཐེན་རྒན་པོའི་ངོ་གདོང་ཡང་།།
རབ་རིབ་ཁྲོད་ཀྱི་ན་བུན་ཡིན།།
སྐྲ་ལོ་ནག་པའི་རྒྱབ་གཟུགས་དེ།།
སྨན་ཆུང་བུ་མོ་ཡིན་ཟེར་ན།།
གདོང་ན་བསྐོས་བའི་མིག་ཤེལ་ཡང་།།
འོད་ཀྱིས་འཁྱུད་པའི་མེ་ལོང་ཡིན།།
སྣང་བར་འཁྲུལ་བའི་རྟོགས་པ་དེ།།
སངས་ཀྱི་ཆ་ཤས་ཡིན་ཙ་ན།།
རྨི་ལམ་ནང་གི་ཀེང་རུས་ཀྱང་།།
ཁྱེད་ཀྱི་ཚིག་རྐང་ཡིན་པར་ངེས།།
བསླུ་བྲིད་འཛུམ་པའི་བརྙན་རིས་དེ།།
རང་གི་ངོས་ནས་གྲུབ་བཞག་ན།།
གདོང་འབག་གྱོན་པའི་ཨ་མ་ཡང་།།
གང་ཉིད་མདུན་ན་སྲས་མོ་ཡིན།།
___༢༠༡༣་་་༦་་༡་ཉིན་ཆར་བ་ཤག་ཤག་ཏུ་འབབ་བཞིན་པའི་དབྱར་གཞུང་ཞིག་སྟེ་འདུ་ཁང་གི་ནང་རོལ་ན་བླ་མའི་ངན་ངག་རྣ་རུ་ཉན་ཞོར་རྣམ་ཤེས་ཡོད་ཚད་སྲིད་ཁམས་ལ་ཕྱོགས་ཀྱིན་སྙན་ངག་མ་ཡིན་པའི་ཚིགས་སུ་བཅད་པ་འགའ་འདི་ལྟར་ཐོལ་གྱིས་བཞུར་རོ།
