༄།། ཡབ་ཆེན་གྱི་ཉི་མ་བཟང་། །
ཕ་རྒོད་པོ་ཞིག་གི་ལག་རྟེན་ཡིན།
མ་མཛངས་མ་ཞིག་གི་སེམས་རྟེན་ཡིན།
བུ་དཔའ་བོ་ཞིག་གི་འདུན་ལམ་ཡིན།
སྐྱིད་འཚོ་བ་ཞིག་གི་ལོ་རྒྱུས་ཡིན། །
ཕ་བརྩེ་ལྡན་ཞིག་ལ་དྲན་གསོས་བྱེད།
མ་བྱམས་ལྡན་ཞིག་ལ་དྲིན་ལན་འཇལ།
བུ་འཁྱམས་པོ་ཞིག་གི་ལས་དབང་ལ།
ལས་སྨོན་ལམ་ཞིག་གི་མདུད་པ་ཐེབས། །
ཕ་བླ་མ་ཞིག་གི་སློབ་སྟོན་ཡོད།
མ་མཁའ་འགྲོ་ཞིག་གི་ལས་གྲོགས་ཡོད།
བུ་དམ་ཚིགས་ཅན་གྱི་ཉམས་ལེན་ཡོད།
ཚེ་འདི་ཕྱི་སྐྱིད་པའི་གཞི་མ་ཡོད། །
ཕ་དྲན་པའི་ཉི་མ་ཐེངས་གཅིག་མིན།
མ་སེམས་པའི་དུས་ཚིགས་ལན་གཅིག་མིན།
བུ་སྐྱེས་ནས་མ་ཤིའི་བར་ཉིད་ལ།
དྲིན་ཕ་མ་གཉིས་དང་འབྲལ་འདོད་མེད། །
ཕ་ཁུ་བོའི་ཁྱིམ་རྒྱུད་མ་ཟིན་ཡང་།
ཕ་བླ་མའི་ཐུགས་རྒྱུད་ཟིན་ནས་ཡོད།
ཕ་བཟང་བོ་བུ་ཡི་རྗེས་འབྲངས་དང་།
ཕ་བླ་མའི་དྲུང་ལ་མཉམ་འགྲོ་བྱེད། །
ཕ་བླ་མ་དུས་གསུམ་སངས་རྒྱས་ལ།
ཕ་ངེད་ཅག་འདྲེན་པའི་ལམ་སྟོན་ཡོད།
ཕ་ཁྱེད་དང་མ་ལོ་དྲིན་ཅན་གཉིས།
ཕ་བླ་མ་བཟང་པོའི་འཁོར་དུ་འདྲེན། །
༦༠/༡༦/༢༠༡༣ ཕ་ཡབ་ཀྱི་ཉིན་མོ་ལ་བྲིས།