ཏཱ་ལའི་བླ་མས་བློ་བཟང་སེང་གེ་“རྩིས་མེད་”བཏང་ནས་རང་ཉིད་ཀྱི་དབུ་ཁྲིད་གོ་གནས་གླེང་བ།

         ཏཱ་ལའི་བླ་མ་སྐུ་ཕྲེང་བཅུ་བཞི་པས་ཕྱི་ཟླ་༦ པའི་ཚེས་༡༥ ཉིན་ཨོ་སི་ཁྲུ་ལི་ཡར་བོད་མི་དང་ཧི་མ་ལ་ཡའི་དད་ལྡན་མང་ཚོགས་སྟོང་ཕྲག་བརྒལ་བར་མཇལ་ཁ་གནང་ཡོད་ཅིང་། བཙན་བྱོལ་བོད་པའི་སྤྱི་ཚོགས་ནང་རང་བཙན་གྱི་དགོས་འདུན་འདོན་མཁན་མི་ཉུང་བ་ཞིག་ཡོང་གི་ཡོད་པ་དང་། བཙན་བྱོལ་བོད་མིའི་སྒྲིག་འཛུགས་ཀྱི་ལངས་ཕྱོགས་ཀྱང་རང་བཙན་དུ་བསྒྱུར་དགོས་པའི་རེ་འདུན་འདོན་མཁན་གྱི་ཚོགས་པའང་ཡོད་པའི་སྐོར་༧གོང་ས་མཆོག་གིས་བཀའ་གནང་དོན།

བོད་མི་ས་ཡ་དྲུག་གི་སྐུ་ཚབ་མཚོན་མཁན་དེ་ཁོང་ཉིད་གཅིག་པུ་ཡིན་ཞེས་དང་། (“ཚོགས་གཙོས་བོད་མི་ས་དྲུག་གི་ཚབ་བྱེད་ཐུབ་ཀྱི་མ་རེད། སྲིད་སྐྱོང་བློ་བཟང་སེང་གེ་ལགས་བཙན་བྱོལ་དུ་ཡོད་པ་ཚོས་འོས་བསྡུ་བྱས་པ་རེད་མ་གཏོགས། ཁྱེད་རང་གིས་ཕལ་ཆེར་བོད་མི་ས་ཡ་དྲུག་གི་ཚབ་བྱེད་ཐུབ་ཀྱི་མ་རེད་དཱ། ངས་ཕལ་ཆེར་བྱེད་ཐུབ་པའི་བཟོ་འདྲ་ཞིག་ཡོད་པ་རེད་ཅེས་ལབ་རྒྱུ་བྱུང།” ༧གོང་ས་མཆོག་གི་བཀའ་སློབ་ཇི་བཞིན་སྒྲ་ཕབ་ཞུས། སྒྱུར་མཁན་གྱི་མཆན།) ཐད་ཀར་མིང་བཏོན་ནས་བོད་ཀྱི་གྲོས་ཚོགས་ཀྱི་ཚོགས་གཙོ་སྤེན་པ་ཚེ་རིང་དང། སྲིད་སྐྱོང་བློ་བཟང་སེང་གཉིས་ཀྱིས་བོད་ནང་གི་བོད་མི་ཚོའི་སྐུ་ཚབ་མཚོན་ཐུབ་ཀྱི་མེད་སྐོར་གསུངས་ཡོད་པ་རེད། གནད་དོན་དབྱེ་ཞིབ་པས་བརྗོད་པ་ལྟར་ན། བཙན་བྱོལ་བོད་པའི་སྤྱི་ཚོགས་ནང་ཏཱ་ལའི་བླ་མའི་དབུ་མའི་ལམ་ལ་ཡིད་ཆེས་མེད་པར། བཙན་བྱོལ་བོད་མིའི་ནང་ཁུལ་ཁ་བྲལ་འབྱུང་ཉེན་ཡོད་པའི་དུས་སྐབས་འདིར། ཏཱ་ལའི་བླ་མ་མཆོག་གིས་བསྐྱར་དུ་ཁོང་ཉིད་ཀྱིས་ད་གཟོད་བོད་མི་ས་ཡ་དྲུག་གི་སྐུ་ཚབ་མཚོན་ཐུབ་པ་དང་། བོད་ཕྱི་ནང་གཉིས་ཀྱི་དབུ་ཁྲིད་དངོས་གནས་དེ་ཁོང་ཉིད་ཡིན་པ་དང་། དབུ་མའི་ལམ་ཤུགས་ཆེན་པོས་གསུངས་པ་ནི། ལངས་ཕྱོགས་ཀྱི་འཐབ་རྩོད་འབྱུང་ཉེན་ཡོད་པར་མངོན་པ་མ་ཟད། ཏཱ་ལའི་བླ་མས་བློ་བཟང་སེང་གེ་ལ་ཡིད་ཆེས་མེད་པར་བསྟན་པ་རེད།

ཏ་ལཱའི་བླ་མ། ཁོང་ཉིད་གཅིག་པུས་བོད་མི་ཡོངས་ཀྱི་སྐུ་ཚབ་མཚོན་ཐུབ།

ནོར་ཝེ་བོད་ཀྱི་རླུང་འཕྲིན་ཁང་གིས་ཕྱི་ཟླ་༦ པའི་ཚེས་༡༥ ཉིན་གནས་ཚུལ་སྤེལ་བ་ལྟར་ན། ཏཱ་ལའི་བླ་མ་མཆོག་གིས་ཟླ་འདིའི་ཕྱི་ཚེས་༡༥ ཉིན་ཨོ་སི་ཁྲུ་ལི་ཡའི་སི་ཌི་ནི་ཡི་སྤྲོ་གསེང་ལྟེ་གནས་སུ་འཛམ་གླིང་ས་ཕྱོགས་གང་ས་ནས་ཕེབས་པའི་དད་ལྡན་རྣམས་ལ་ཆོས་འབྲེལ་གནང་སྐབས། བོད་མི་དང་འབྲུག་པ། སོག་པོ་སོགས་ཀྱི་དད་ལྡན་སྟོང་ཕྲག་བརྒལ་བར་དམིགས་བསལ་མཇལ་ཁ་གནང་ཡོད་པ་མ་ཟད་བཀའ་སློབ་ཀྱང་གནང་ཡོད་པ་རེད།

དབུ་མའི་ལམ་གྱི་འཐབ་རྩོད་སྐོར་ངོ་སྤྲོད་གནང་སྐབས་༧གོང་ས་མཆོག་གིས་གསུངས་དོན། ལོ་རབས་༧༠ པའི་ནང་བོད་མི་ཚོས་མཉམ་འབྲེལ་རྒྱལ་ཚོགས་གཙོས་པའི་རྒྱལ་ཁབ་ཁག་ལ་ཐབས་ཤེས་འདྲ་མིན་སྣ་ཚོགས་བརྒྱུད་དེ་འབོད་སྐུལ་བྱས་ཀྱང་། རྒྱབ་སྐྱོར་མ་རག་པའི་རྗེས། མཇུག་མཐར་བོད་ཆོལ་ཁ་གསུམ་གཅིག་ཏུ་སྒྲིལ་བའི་མིང་དོན་མཚུངས་པའི་རང་སྲིད་རང་སྐྱོང་གི་ཐོབ་ཐང་རྩོད་པའི་དབུ་མའི་ལམ་གཏན་ལ་ཕབ་པ་དང་། རྒྱ་ཆེའི་མང་ཚོགས་ཀྱི་རྒྱབ་སྐྱོར་ཐོབ་ཡོད། ཏཱ་ལའི་བླ་མ་མཆོག་གིས་གསུངས་དོན། བོད་ནང་གི་བོད་མི་ཚོས་དབུ་མའི་ལམ་ལ་རྒྱབ་སྐྱོར་བྱེད་པ་ནི་དངོས་ཡོད་གནས་ཚུལ་དང་མཐུན་པ་ཞིག་རེད་ལ། བོད་དོན་ཐག་གཅོད་བྱེད་པའི་ཐབས་ལམ་ཡག་ཤོས་དེ་རེད།

བཙན་བྱོལ་བོད་པའི་སྤྱི་ཚོགས་ནང་དུ་རང་བཙན་གྱི་ལྟ་བ་འཛིན་མཁན་ཡོད་པ་དང་། དབུས་བཙན་བྱོལ་བོད་མིའི་སྒྲིག་འཛུགས་ཀྱི་དབུ་མའི་ལམ་གྱི་ལངས་ཕྱོགས་བསྒྱུར་དགོས་པའི་དགོས་འདུན་འདོན་མཁན་གྱི་ཚོགས་པ་དང་སྒྲིག་འཛུགས་ཡོང་གི་ཡོད་པ་དེའི་སྐོར་༧གོང་ས་མཆོག་གིས་བཀའ་གནང་དོན། ཚང་མས་ངེས་པར་དུ་བསམ་བློ་ནན་ཏན་གཏོང་དགོས། ཏཱ་ལའི་བླ་མ་མཆོག་གིས་གསུང་དོན། བོད་མི་ས་ཡ་དྲུག་གི་སྐུ་ཚབ་མཚོན་ཐུབ་མཁན་དེ་ཁོང་ཉིད་གཅིག་པུ་ཡིན་ཞེས་དང་། ཁོང་ཉིད་ཀྱི་འཁྲིས་སུ་ཡོད་པའི་སྤྱི་མཐུས་ཚོགས་གཙོ་སྤེན་པ་ཚེ་རིང་ལ་བརྡ་བསྟན་ནས། ཁོང་དང་སྲིད་སྐྱོང་བློ་བཟང་སེང་གེ་སུས་ཀྱང་བོད་ནང་གི་བོད་མི་ཚོའི་སྐུ་ཚབ་མཚོན་ཐབས་མེད། ཁོང་གིས་གསུངས་དོན། ངོས་རང་དགུང་ལོ་༡༦ ནས་བོད་ཀྱི་ཆོས་སྲིད་གཉིས་ཀྱི་དབུ་ཁྲིད་ཀྱི་འགན་བཞེས་པ་ནས་བཟུང། དགུང་ལོ་༧༨ ལ་མ་སླེབས་བར་དུ་ཉམས་མྱོང་བསགས་ཡོད། དེའི་ཁར་བོད་ནང་གི་བོད་མི་ཚོས་ཡིད་ཆེས་བློ་གཏད་བྱེད་བཞིན་པས། གནས་སྟངས་འདི་འདྲ་ཞིག་གི་འོག་བཏོན་པའི་དབུ་མའི་ལམ་གྱི་ལངས་ཕྱོགས། གློ་བུར་དུ་བསྒྱུར་དགོས་ན་དེ་ནི་རྣམ་དཔྱོད་དང་ལྡན་པ་ཞིག་མ་རེད།

ཏཱ་ལའི་བླ་མ་མཆོག་གིས་བོད་རིགས་གཞོན་སྐྱེས་ཚོར་སློབ་སྟོན་གནང་དོན། མི་རེ་ཟུང་གིས་བསམ་བློ་མ་བཏང་བ་དང་དངོས་ཡོད་གནས་ཚུལ་ལ་མ་ལྟོས་པའི་རྫུན་གཏམ་གྱིས་ཤུགས་རྐྱེན་ཐེབས་མི་རུང་ལ། མི་གཅིག་གཉིས་ཤིག་གི་རྗེས་སུ་གཡམ་རྒྱུགས་མི་བྱེད་པར། ཚང་མས་ངེས་པར་དུ་གཟབ་གཟབ་བྱེད་དགོས་པ་དང་། མགོ་སྐོར་མ་ཐེབས་པར་དགོས་པ་རེད་ཅེས་བཀའ་གནང་ཡོད། གནད་དོན་དབྱེ་ཞིབ་པས་བརྗོད་པ་ལྟར་ན། ཏཱ་ལའི་བླ་མ་མཆོག་གི་བཀའ་སློབ་དེས་བོད་མི་ཚོར། བཙན་བྱོལ་བོད་མིའི་དབུ་ཁྲིད་དངོས་གནས་དེ་ཁོང་ཉིད་ཡིན་པར་བསྟན་པ་རེད།

ཏཱ་ལའི་བླ་མ་མཆོག་གིས་ཕྱི་ཟླ་༣ པའི་ཚེས་༢༩ ཉིན་ངྷ་རམ་ས་ལར་གསུང་ཆོས་ཤིག་གི་ཐོག་ཏུ་དབུ་མའི་ལམ་གྱི་སྲིད་བྱུས་སྐོར་ཞིབ་ཕྲའི་འགྲེལ་བཤད་བསྐྱོན་གནང་སྐབས་དམིགས་བསལ་གྱིས་གསུངས་དོན། “གཙོ་བོ་དེ་བོད་ནང་གི་བོད་མི་ཚོས་སྔར་བཞིན་ང་ལ་ཡིད་ཆེས་བློ་འགེལ་བྱེད་ཀྱི་ཡོད་པ་དང་། ཁོང་ཚོས་ང་ལ་དད་གུས་བྱེད་བཞིན་ཡོད། དེ་བཞིན། བཙན་བྱོལ་བོད་མི་ཚོས་ཀྱང་ཡིད་ཆེས་བློ་འགེལ་དང་དད་གུས་བྱེད་བཞིན་ཡོད། དེར་བརྟེན། ང་ལ་ད་དུང་འགན་ཁུར་ཆེན་པོ་ཡོད།” གནད་དོན་དབྱེ་ཞིབ་པས་བརྗོད་པ་ལྟར་ན། ཏཱ་ལའི་བླ་མ་མཆོག་གིས་ཐེངས་ཁ་ཤས་ཀྱི་གསུང་བཤད་ལས་བསྟན་པ་ནི། སྤྱིར་ཕྱི་ལོ་༢༠༡༡ ལོར་ཆབ་སྲིད་ཀྱི་སྐུ་དབང་རྩིས་སྤྲོད་བྱས་ཟིན་ཀྱང་། དོན་དངོས་སུ་ད་དུང་རྒས་ཡོལ་བྱས་མེད་པར། བློ་བཟང་སེང་གེ་ནི་ཁོང་གི་བཀོལ་སྤྱོད་བྱེད་པའི་མི་ཙམ་ཞིག་ཡིན་པ་དང་། བོད་མིའི་དབུ་ཁྲིད་དངོས་གནས་དེ་ད་དུང་ཏཱ་ལའི་བླ་མ་མཆོག་ཡིན་པ་རེད། དེའི་ཁྲོད་ཀྱི་རྒྱུ་རྐྱེན་གཙོ་བོ་དེ་བློ་བཟང་སེང་གེ་སོགས་ཀྱིས་དབུ་མའི་ལམ་གྱི་ལངས་ཕྱོགས་མུ་མཐུད་དུ་རྒྱུན་འཛིན་ཐུབ་པར་ཡིད་ཆེས་མེད་པ་དེ་རེད། ཐེངས་འདིར་བློ་བཟང་སེང་གེ་སོགས་ལ་ཐད་ཀར་བོད་མི་ཡོངས་ཀྱི་ཚབ་མཚོན་ཐུབ་ཀྱི་མ་རེད་ཅེས་གསུངས་པ་ལས་ཀྱང་ཧ་ཅང་གསལ་པོ་ཤེས་ཐུབ། མ་འོངས་པར་ཉིན་ཞིག་བོད་རང་བཙན་གྱི་ཤུགས་རྐྱེན་གྱིས་ནང་ཁུལ་ཁ་བྲལ་བྱུང་བ་དང་མཉམ་དུ་བློ་བཟང་སེང་གེ་བཙན་གྱིས་ཕྱོགས་གཅིག་ཏུ་འདེད་པའི་སྔ་ལྟས་ཀྱང་ཡིན།

ཁ་ཞེ་མི་མཚུངས་པའི་བོད་ཀྱི་གཞོན་ནུའི་ཚོགས་གཙོ།

རྒྱ་ནག་སྲིད་གཞུང་གིས་འཇིགས་སྐུལ་རིང་ལུགས་པར་བསྒྲགས་པའི་བོད་ཀྱི་གཞོན་ནུ་ཚོགས་གཙོ་ཚེ་དབང་རིག་འཛིན་གྱིས་ཏཱ་ལའི་བླ་མས་བཏོན་པའི་དབུ་མའི་ལམ་གྱི་ལངས་ཕྱོགས་ཐད།  ཕྱོགས་ངོས་གཉིས་ཀྱི་རྣམ་འགྱུར་མངོན་ཡོད། ཕྱི་ཟླ་༥ པའི་ཚེས་༢༧ ཉིན་ཁོང་གིས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་ཆེན་སྟེང་། ཏཱ་ལའི་བླ་མ་མཆོག་གི་བཀའ་དགོངས་དང་འགལ་བའི་བྱ་སྤྱོད་རིགས་ལ་དགོངས་སེལ་ཞུས་ཡོད་པ་དང་། ཁོང་གིས། “གལ་སྲིད་བོད་ཀྱི་གཞོན་ནུ་ལྷན་ཚོགས་ཀྱི་ངོས་ནས་ཏཱ་ལའི་བླ་མ་མཆོག་དང་དབུས་བོད་མིའི་སྒྲིག་འཛུགས་ཀྱི་བཀའ་དགོངས་དང་འགལ་བའི་ལས་ཀ་བྱས་ཡོད་ན། སྙིང་ཁོང་རུས་པའི་གཏིང་ནས་དགོངས་སེལ་ཞུ་རྒྱུ་ཡིན། ཚེ་དབང་རིག་འཛིན་གྱིས་ད་དུང་ཁས་ལེན་བྱས་དོན། བོད་ཀྱི་གཞོན་ནུ་ལྷན་ཚོགས་ཀྱིས་གོང་ས་ཏཱ་ལའི་བླ་མ་མཆོག་གི་ཅི་གསུང་བཀའ་བཞིན་བསྒྲུབ་རྒྱུ་དང་། བཙན་བྱོལ་བོད་མིའི་སྒྲིག་འཛུགས་དང་མཉམ་འབྲེལ་བྱེད་རྒྱུ་ཡིན་པ་མ་ཟད་ལས་དོན་ཁག་ལ་རྒྱབ་སྐྱོར་ཞུ་རྒྱུ་ཡིན་ཟེར། ཡིན་ནའང་དེ་དང་མཉམ་དུ་བརྗོད་རྒྱུར། བོད་ཀྱི་གཞོན་ནུ་ལྷན་ཚོགས་ཀྱི་ཆབ་སྲིད་ཀྱི་ལངས་ཕྱོགས་མུ་མཐུད་དུ་རང་བཙན་གྱི་ལམ་དུ་བསྐྱོད་རྒྱུ་ཡིན་ཞེས་བརྗོད།  ཕྱི་ཟླ་༦ པའི་ཚེས་༢ ཉིན་བཏོན་པའི་<<ཨེ་ཤི་ཡའི་བདུན་རེའི་དུས་དེབ་>>ཀྱི་སྟེང་དུ་འཁོད་པ་ལྟར་ན། བོད་རང་བཙན་གྱི་སྒྲིག་འཛུགས་ཁག་གིས་སྔར་ལས་ལྷག་པའི་སྟོབས་ཤུགས་ལྡན་པའི་འཐབ་རྩོད་ཀྱི་ནུས་པ་འདོན་ཐབས་ཀྱི་གྲ་སྒྲིག་བྱེད་བཞིན་པ་དང་། ཁོང་ཚོས་བོད་རང་བཙན་མཉམ་འབྲེལ་སྒྲིག་འཛུགས་ཤིག་འཛུགས་རྒྱུའི་ཇུས་འདོན་བཞིན་ཡོད་པ་རེད། གནས་ཚུལ་དེའི་ནང་འཁོད་དོན། དེ་སྔོན་བོད་ཀྱི་གཞོན་ནུ་ལྷན་ཚོགས་གཙོས་པའི་དགུ་བཅུ་གསུམ་ལས་འགུལ་ཚོགས་པ་དང་། བོད་རྒྱལ་ཡོངས་མང་གཙོ་ཚོགས་པ་སོགས་བཙན་བྱོལ་བོད་མིའི་རང་བཙན་གྱི་སྒྲིག་འཛུགས་ཁག་གིས་བགྲོ་གླེང་ཚོགས་འདུ་ཐེངས་མང་འཚོགས་ཡོད་ཅིང་། དེའི་ཁྲོད་ཀྱི་ཕྱི་ཟླ་༩ པའི་ནང་སྒྲིག་འཛུགས་དང་ཤོག་ཁག་ལས་བརྒལ་བའི་རྒྱལ་སྤྱིའི་ནང་གི་བོད་རང་བཙན་གྱི་སྟོབས་ཤུགས་ཕྱོགས་གཅིག་ཏུ་སྤུངས་ཏེ། བོད་རང་བཙན་སླར་གསོའི་“བོད་རང་བཙན་གནའ་འབྲེལ་”འཐུས་མི་ཚོགས་ཆེན་འཚོགས་ཡོད། (དོན་དངོས་ཐོག་ཚོགས་འདུ་དེ་འདྲ་ཞིག་འཚོགས་པ་གོ་ཐོས་མེད་ཀྱང། མ་རྩོམ་དུ་ཡོད་པ་སོར་བཞག་གིས་བསྒྱུར་ཡོད། སྒྱུར་མཁན་གྱི་མཆན།)

ཚེ་དབང་རིག་འཛིན་གྱིས་ཁ་གསལ་ངང་བརྗོད་དོན། ཁོང་རང་ཉིད་ཀྱིས་ཏཱ་ལའི་བླ་མ་མཆོག་གི་དབུ་མའི་ལམ་ལ་རྒྱབ་སྐྱོར་མེད། “བོད་ཀྱི་གཞོན་ནུ་ལྷན་ཚོགས་ངོས་ནས་བོད་རང་བཙན་ཕུད་པའི་གཞན་གྲོས་མོལ་ཅི་འདྲ་ཞིག་ཡིན་ནའང་རྩིས་མེད་ཡིན།” གནད་དོན་དབྱེ་ཞིབ་པས་དཔྱད་བརྗོད་བྱས་པ་ལྟར་ན། ཐེངས་འདིའི་ཚོགས་ཆེན་དེ་ནི་བོད་ཀྱི་ལོ་རྒྱུས་ཐོག་ཆེས་གཞི་རྒྱ་ཆེ་བའི་བོད་རང་བཙན་གྱི་ཚོགས་ཆེན་ཞིག་ལ་ངོས་འཛིན་བྱས་ཡོད་པ་རེད།

ཏཱ་ལའི་བླ་མ་དང་བོད་ཀྱི་གཞོན་ནུ་ལྷན་ཚོགས་ཀྱི་ལངས་ཕྱོགས་ཀྱི་འགལ་ཟླ་ནི་སྔོན་ནས་ཡོད་པ་ཞིག་ཡིན་པ་དང་། ཏཱ་ལའི་བླ་མ་མཆོག་གིས་ཐེངས་ཁ་ཤས་ཤིག་ལ་གསུང་དོན། “ཕལ་ཆེར་ཕྱི་ལོ་༡༩༧༤ ལོར་ཡིན། ང་ཚོས་ཐག་གཅོད་བྱས་ཟིན་པ་རེད། ང་ཚོ་དུས་ཚོད་སྔ་ཕྱི་ཞིག་མ་གཏོགས་རྒྱ་ནག་དབུས་གཞུང་གི་འོག་ཏུ་ལོག་རྒྱུ་རེད། བྱས་ཙང་“རང་བཙན་”ནི་ང་ཚོའི་བསམ་བློ་གཏོང་དགོས་པའི་གནད་དོན་ཞིག་རྩ་བ་ནས་མིན་པར། ངེས་པར་དུ་ཕྱོགས་སུ་མ་ལྷུང་བར་གཉིས་ཕན་དབུ་མའི་ལམ་ཞིག་གི་ཐོག་ཏུ་བསྐྱོད་དགོས། ཡིན་ནའང་བོད་ཀྱི་གཞོན་ནུ་ལྷན་ཚོགས་ཀྱིས་ག་ལེར་ང་ཚོས་རང་བཙན་རྩོད་ལེན་མི་བྱེད་པའི་ལངས་ཕྱོགས་ལ་སྐྱོན་བརྗོད་བྱེད་ཡོང་གི་འདུག ”དེ་བཞིན་ཁོང་གིས་མུ་མཐུད་དུ་གསུང་དོན། ཁོང་གིས་རྒྱུན་དུ་བོད་ཀྱི་གཞོན་ནུ་ལྷན་ཚོགས་ཀྱི་ལངས་ཕྱོགས་དངོས་ཡོད་གནས་ཚུལ་མིི་མཐུན་པ་རེད་ཅེས་སྐྱོན་བརྗོད་བྱེད་བཞིན་ཡོད་ཅེས་གསུངས།

བློ་བཟང་སེང་གེའི་ཆབ་སྲིད་ལངས་ཕྱོགས་དངོས་ལ་ཉམས་ཚོད་ལེན་པ།

ད་ལྟའི་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་སྔོན་མ་བོད་ཀྱི་གཞོན་ནུ་ལྷན་ཚོགས་དབུས་སྤྱི་ཁྱབ་རྒྱུན་ལས་ཡིན་པ་དང་། ལོ་གཉིས་ཙམ་རིང་ལས་གནས་དེའི་ཐོག་ཕྱག་ལས་གནང་མྱོང་ཡོད། འོན་ཀྱང་། ཁོང་ད་ལྟ་བཙན་བྱོལ་བོད་མིའི་སྲིད་སྐྱོང་ཡིན་པའི་ཆ་ནས། ཁོང་གིས་བོད་ཀྱི་གཞོན་ནུ་ལྷན་ཚོགས་ཀྱི་ལངས་ཕྱོགས་དང་ས་མཚམས་གསལ་པོར་བཅད་ཡོད།

གསར་འགྱུར་བརྒྱུད་ལམ་ཁ་ཤས་ཀྱི་ནང་དུ་ངོས་འཛིན་བྱས་པ་ལྟར་ན། བཙན་བྱོལ་བོད་གཞུང་གི་ཆབ་སྲིད་དབུ་ཁྲིད་ཀྱི་འགན་བཞེས་པ་ནས་བཟུང་། བློ་བཟང་སེང་གེས་བཙན་བྱོལ་བོད་མི་ཚོའི་དབུ་ཁྲིད་ནས་ཏཱ་ལའི་བླ་མ་མཆོག་གི་བཏོན་པའི་དབུ་མའི་ལམ་རྒྱ་ཡན་དུ་གཏོང་བཞིན་པ་དང་། དེའི་ཁར་ཏཱ་ལའི་བླ་མ་མཆོག་གིས་སྐུ་ན་ཕྲ་དུས་ནས་ནང་ཆོས་ལ་སློབ་སྦྱོང་བྱས་པའི་ཤུགས་རྐྱེན་གྱིས་བྱམས་བརྩེ་དང་ཉམས་ཆུང་རང་བཞིན་གྱི་ཆ་མཆིས་པས། ཕྱོགས་ཁ་ཤས་ཤིག་དང་ཐ་ན་བློ་བཟང་སེང་གེས་ཏཱ་ལའི་བླ་མ་མཆོག་“བཙན་ཁྲིད་”བྱེད་པ་ཞིག་རེད། ཏཱ་ལའི་བླ་མ་མཆོག་ལ་སྔོན་ནས་བཙན་བྱོལ་བོད་མིའི་སྒྲིག་འཛུགས་དྲག་པོའི་ལམ་ཏུ་བསྐྱོད་པར་སྟངས་འཛིན་བྱེད་ཐབས་མེད་པར་གྱུར་ཟིན་པ་དང་། བོད་མི་དང་བོད་དོན་ལ་སེམས་ཁུར་བྱེད་པའི་མི་སྣའི་ཁྲོད་ཀྱི་མི་ཉུང་བ་ཞིག་གིས། བློ་བཟང་སེང་གེའི་སེམས་གཏིང་གི་ཆབ་སྲིད་ཀྱི་ལངས་ཕྱོགས་དེ་སྔར་བཞིན་བོད་རང་བཙན་ཡིན་པའི་ཡིད་ཆེས་བྱེད་བཞིན་པ་རེད།

ཡིན་ནའང་བློ་བཟང་སེང་གེས་ཉེ་ཆར་ཨ་རིར་སྤེལ་བའི་གཏམ་བཤད་ལས་མངོན་པ་ལྟར་ན། ཏཱ་ལའི་བླ་མ་མཆོག་གི་གཟི་བརྗིད་ལ་བརྟེན་ནས་རང་ཉིད་སྲུང་སྐྱོབ་བྱེད་བཞིན་པ་དང་། ཁོང་གིས་བརྗོད་དོན། དབུས་བོད་མིའི་སྒྲིག་འཛུགས་ཀྱིས་བཤད་པའི་བོད་ཀྱི་“མིང་དོན་མཚུངས་པའི་རང་སྲིད་རང་སྐྱོང་”གིས་རྒྱ་ནག་གི་བདག་དབང་དང་མངའ་ཁོངས་གཅིག་གྱུར་ལ་རྩོད་པ་­­­བྱེད་ཀྱི་མེད་པར། “རྒྱ་ནག་གི་རྩ་ཁྲིམས་སྒྲོམ་གཞིའི་ནང་དུ་མིང་དོན་མཚུངས་པའི་རང་སྲིད་རང་སྐྱོང་མངོན་འགྱུར་ཡོང་ཐབས་”དེ་ཡིན་ཞེས་དང་། ཁོང་གིས། འདི་ལྟ་བུའི་དབུ་མའི་ལམ་ནི་“ཞི་དུལ་དང་རྒྱུ་མཚན་ལྡན་པའི་ཐབས་ལམ་”ཞིག་རེད་ལ། རྒྱ་ནག་སྲིད་གཞུང་དང་བོད་མི་ཕྱོགས་གཉིས་ཀྱི་ངོས་ནས་བཤད་ན་“གཉིས་ཕན་”གྱི་གྲོས་འཆར་ཞིག་རེད་ཅེས་བརྗོད།།

མ་རྩོམ་དེ་གསར་འགོད་པ་མན་ཅེ་ཡིས་བྲིས་པ་ཏོ་ཝེ་སོགས་རྒྱ་ཡིག་དྲ་རྒྱ་ཁག་གི་སྟེང་དུ་སྤེལ་འདུག་པ་ཏྲེ་ཧོར་ཐུབ་བསྟན་གྱིས་རྒྱ་ཡིག་ལས་བོད་བསྒྱུར་བྱས།

མ་རྩོམ་འབྲེལ་ཐག http://china.dwnews.co/news/2013-06-20/59236950-all.html