རྡོ་གྲུབ་ཆེན་ལ་བརྟན་བཞུགས་ཕུལ་འདུག
ཟླ་འདིའི་ཕྱི་ཚེས་༡༣ ཉིན་ཏེ། བོད་རབ་རྒྱན་མེ་སྤྲེལ་ལོའི་སྤྲེལ་ཟླའི་ཚེས་༡༠ ཉིན་རྒྱ་གར་ཤི་རི་གྷི་རི་རྡོ་གྲུབ་ཆེན་ཆོས་ཚོགས་སུ་༧སྐྱབས་རྗེ་རྡོ་གྲུབ་ཆེན་སྐུ་འཕྲེང་བཞི་པ་འཇིགས་མེད་འཕྲིན་ལས་མཆོག་ལ་བརྟན་བཞུགས་རྒྱས་པ་ཞིག་གྲུབ་ཐོབ་པདྨ་རིག་འཛིན་རྫོགས་ཆེན་རིན་པོ་ཆེ་མཆོག་གིས་དབུས་འབྲེལ་ཡོད་རྫོགས་ཆེན་སློབ་འབངས་ནས་ཕུལ་ཡོད་འདུག
དེ་ཡང་བོད་ཟླ་དྲུག་པའི་ཚེས་༤ ཆོས་འཁོར་དུས་ཆེན་ནས་བཟུང་དཀོན་མཆོག་སྤྱི་འདུས་ཀྱི་ཞལ་ཕྱེས་ཏེ་ཚེ་སྒྲུབ་ཉིན་བདུན་ལ་དགེ་འདུན་འདུས་མང་ནས་འཚོགས་ཡོད་པ་དང་། དེ་བཞིན་རྡོ་གྲུབ་ཆེན་དགོན་ནས་ཀྱང་དགེ་འདུན་པ་ཞལ་གྲངས་༢༡ གིས་རིག་འཛིན་འདུས་པའི་ཚེ་སྒྲུབ་ཚེས་༨ ནས་ཉིན་གསུམ་རིང་འཚོགས་ཏེ། ཚེས་༡༠ ཞོགས་པ་སྐྱ་རེངས་ཤར་སྐབས་དངོས་གྲུབ་ལེན་པ་བཅས་བྱས་ཡོད་འདུག ཉེ་ཆར་སྐྱབས་རྗེ་མཆོག་ཨ་རི་དང་། ཧོང་ཀོང་། ཐེ་ལན་སོགས་སུ་བསྟན་དོན་ལ་ཕྱོགས་ཕེབས་ཀྱིས་སྐུ་གཟུགས་ངལ་གསོའི་ཆེད་ཤྲི་རུ་གུ་རི་གཟིམ་ལྗོངས་སུ་རྫོགས་ཆེན་རིན་པོ་ཆེ་སྐུ་འཁོར་ཆེད་བཅར་གྱིས་སྤྲེལ་ཟླའི་ཚེས་བཅུའི་ཞོགས་པ་དུས་གསུམ་རྒྱལ་བའི་སྤྱི་གཟུགས་ཨོ་རྒྱན་སངས་རྒྱས་གཉིས་པ་སློབ་དཔོན་རིན་པོ་ཆེ་ལྷོ་ནུབ་འོ་མ་ཅན་གྱི་རྒྱ་མཚོར་རང་བྱུང་རིག་པ་ཐོལ་སྐྱེས་སུ་སྐུ་འཁྲུངས་བའི་ཉིན་མོ་གནས་དུས་སྟོན་འཁོར་ཕུན་ཚོགས་ལྔ་ལྡན་ཀྱི་སྒོ་ནས་བརྟན་བཞུགས་རྒྱས་པ་ཕུལ། རྗེས་སོར་དེར་ཕེབས་ཡོངས་ལ་ཆོས་འབྲེལ་དང་། སྐྱབས་རྗེ་མཆོག་དང་རྫོགས་ཆེན་རིན་པོ་ཆེ་རྣམ་གཉིས་ལྷོད་བཞུགས་ཀྱི་གསུང་གླེང་གནང་། བརྟན་བཞུགས་ལེགས་པར་གྲུབ་རྗེས་རྫོགས་ཆེན་རིན་པོ་ཆེ་སྐུ་འཁོར་རྣམས་སྦས་ཡུལ་འབྲས་མོ་ལྗོངས་ཀྱི་གུ་རུའི་གནས་ཆེན་བྲག་དཀར་བཀྲ་ཤིས་སྡིང་སོགས་སུ་གནས་མཇལ་ལ་ཕེབས་ཏེ་ཚོགས་མཆོད་ཀྱང་ཕུལ་ཡོད་འདུག །
གསར་འགོད་པ་ཆོས་ཉིད་ཟེར།
