ཨ་མ་དྲན་པའི་གདུང་བ།
སྐར་ཚོགས་མཁའ་རུ་ཤར་བའི་མཚན་མོ་དེར།།
བསིལ་བསིལ་རླུང་བུ་གདོང་ལ་ཕོག་པའི་དུས།།
དྲན་གདུང་མཆི་མ་བསྐྱིལ་བའི་མཚེའུ་ངོགས་སུ།།
ཨ་མའི་ཞལ་རས་ཟླ་གཟུགས་བཞིན་དུ་སྐྱོམས།།
རྒྱང་ཟུག་ཁྱི་སྐད་འཇགས་པའི་མཚན་མོ་དེར།།
རྣམ་ཤེས་རྨི་ལམ་ཞིང་ལ་འགྲིམ་པའི་དུས།།
བྱམས་ལྡན་ཨ་མ་ཐེངས་གཅིག་མཇལ་བ་རྨིས།།
དགའ་སྐྱོའི་ཟུག་རྔུ་མ་བཟོད་མགུལ་ལ་འཁྱུད།།
ཨ་མས་མ་ལོ་ཟེར་བཞིན་ཕྱག་ཟུང་གིས།།
བུ་ངའི་མགོ་ལ་བྱིལ་བྱིལ་བྱས་པ་ན།།
དགའ་སྤྲོའི་སེམས་པ་ཁེངས་བཞིན་ཨ་མ་ཡི།།
པང་ལ་མགོ་བོ་བཞག་ནས་ངལ་ཞིག་གསོས།།
སྐར་ཆེན་མཁའ་ནས་ཤར་བའི་ཐོ་རེངས་དེར།།
དེ་ཕོས་ལངས་བརྡའི་ཅོང་སྒྲ་སྒྲོག་པའི་དུས།།
སྐྱིད་པའི་རྨི་ལམ་བར་ཆད་དབང་དུ་ཤོར།།
ཨ་མ་དྲན་པའི་གདུང་བས་སླར་ཡང་མནར།། ༢༠༠༨།༩།༣༠