ཡ་ལན་ཟློས་གར་ཁོ་བོས་བསྒྱུར་ནའང་ཆོག།
ཀླུ་སྒྲུབ་ལྟ་བ་དེ་ཡོད་མེད་ལས་འདས་ཤིང་།།
སངས་རྒྱས་བྱང་སེམས་ཀུན་དགོངས་དབྱངས་གཅིག་གྱུར་སྨྲ།།
ཡིན་ངེས་ལུང་རིགས་ཀྱི་སྲང་ལ་གཞལ་བས་ན།།
ངེས་ཤེས་མི་སྐྱེ་བའི་རང་དབང་ཅི་ཡོད་ཟེར།།
བདེན་སྟོང་མེད་དགག་གི་རྒྱ་ལས་བརྒལ་སོང་ན།།
རྒྱ་ནག་ཧ་ཤང་གི་ལད་མོའི་ཆད་ལྟར་འདོད།།
ཐམས་ཅད་མཁྱེན་པ་དང་ཐར་པའི་ལམ་བཟང་ཀུན།།
ཐོབ་ཏུ་མེད་ངེས་ཏེ་ལོག་ལྟས་བསླུ་སོ་ཟེར།།
གནས་ལུགས་མཐར་ཐུག་དེ་བདེན་སྟོང་མེད་དགག་ཙམ།།
ནམ་ཡང་མི་འོས་པའི་ལུང་རིགས་ཉམས་མྱོང་གསུམ།།
མེད་འཛིན་ལྟ་བ་འདིའི་གཤེད་དུ་ཆས་པ་ལ།།
ཐོགས་བརྡུགས་མེད་པ་འདི་རང་བཟོས་ཉེས་སོ་ཟེར།།
རྙིང་རྒན་ཨ་མྱེ་ཚོ་འཇའ་ལུས་དེངས་འགྲོ་འདུག།
བཀའ་བརྒྱུད་གོང་མ་རྣམས་གྲུབ་པས་འཕུར་ཡོང་གི།
ལྟ་བ་མ་འཕྱུགས་པའི་གནད་ཅིག་མ་ཡོད་ན།།
སྒོམ་པའི་དྲོད་ཚད་འདི་ཡོང་དོན་མི་འདུག་བསམ།།
རྟོག་གེ་མགོ་མཁྲེགས་ཚོ་ལྟ་བས་མི་ཐུལ་ཡང་།།
བདག་མེད་དཔྱད་སྒོམ་གྱི་ལམ་ལ་དགྱེས་གྱུར་ན།།
བདག་འཛིན་ཉོན་མོངས་ཚོགས་མི་སྤངས་མི་སྲིད་པས།།
མེད་འཛིན་འདི་ཀོ་ཡང་ལམ་ཞིག་ཡིན་ངེས་སྙམ།།
ཞིག་དངོས་མ་སྨྲས་ན་ལས་འབྲས་མི་འཐད་པས།།
ཀླུ་སྒྲུབ་ཡབ་སྲས་ཀྱིས་དེ་ལྟར་སྨྲས་སོ་ཟེར།།
ཞིག་དངོས་མ་སྨྲས་ཀྱང་ལས་འབྲས་ཆེས་འཐད་པས།།
ཀླུ་སྒྲུབ་ཡབ་སྲས་ཀྱིས་ཞིག་དངོས་མི་འདོད་ཟེར།།
བདེན་རྫུན་ཤན་འབྱེད་ལ་བློ་མིག་མ་དོད་ཅིང་།།
གྲུབ་མཐའི་ཕྱོགས་ཞེན་ཀྱི་རླབས་ལ་གཡེངས་དྲགས་པས།།
སྔ་ཕྱིའི་འགལ་འདུ་དང་ཆགས་སྡང་རྟོག་པ་གཉིས།།
ཉིན་སྡེབ་མཚན་སྡེབ་འདིས་བསྟན་པའི་ལྷག་ཞབས་སྡུད།།
ལུང་རིགས་མི་ཤེས་པའི་དབང་ཆེན་དཔོན་པོ་དེས།།
དགག་སྒྲུབ་བཀས་བཅད་དེ་རི་གཟར་རྦ་རྡོ་འདྲ།།
སྣ་ལེན་བྱེད་ཆོག་གི་ལམ་ཞིག་ཡོད་རྒྱུ་ན།།
ཡ་ལེན་ཟློས་གར་དེ་ཁོ་བོས་བསྒྱུར་ནའང་ཆོག།