སྟག་རྒོད་ཀྱི་ཟིན་རྩོམ་ཡོངས་བརླགས་སོང་།

ད་ལོ་འདི་དང་ལོ་གསུམ་ཡིན། །

ཕ་ངོ་ཤེས་པའི་བུ་ཞིག་ཡིན། །

དགྲ་ཤ་གཟན་རིག་ན་ངར་མི་ཡིན། །

 

ད་ལོ་བཟང་རྒྱུ་དེ་ཙམ་མེད། །

དགྲ་རི་ལ་ཤོར་བའི་དུས་ཚིགས་རེད། །

སྤུན་མེ་ལ་འཚིག་པའི་ཉི་ནག་རེད། །

གཟེར་རྒོད་ཀྱིས་ཁོག་པ་ཁེངས་དུས་རེད། །

 

མདོང་དགོང་ཉལ་བའི་རྨི་ལམ་དུ། །

ཤར་གྱི་རི་ནས་ཉི་མ་ཤར། །

ཉི་ཟེར་གངས་ཅན་བོད་ལ་འཕྲོས། །

སེམས་ཀྱི་ལང་ཚོ་དེ་ནས་རྒྱས། །

 

དེ་རིང་ཡོང་པའི་ཉིན་མོ་ལ། །

བུ་སྟག་རྒོད་ཕ་གཞིས་སྟོང་པ་རེད། །

སྤུན་ཕུ་ནུའི་གདན་ས་ནག་ཁུངས་རེད། །

ཚུལ་འདི་ཚོ་རིག་ན་སྙིང་རླུང་ལངས། །

 

ད་མ་འདུག་བང་ཆེན་བུ་རྒོད་ཚོ། །

དགྲ་བོ་གང་འདུག་སོ་ཉུལ་གྱིས། །

གྲ་སྒྲིག་གི་རུ་དཔུང་ཤར་ཤར་གྱིས། །

བློ་རྩལ་གྱི་གློག་མ་ཇེ་འཁྱུག་གྱིས། །

 

ང་དང་ང་ངོ་མ་ཤེས་ན། །

སྟག་རྒོད་བུ་རྒོད་ཁེར་སྐྱེས་ཡིན། །

གོ་ན་རྣ་བའི་བུ་རམ་གྱིས། །

མ་གོ་གླུ་ལ་འགྲེལ་བཤད་མེད། །