རང་བཙན་ཚོགས་འདུ་ལ་བལྟ་བ།
རང་བཙན་ཚོགས་འདུ་ལ་བལྟ་བ།
དེ་རིང་དྷ་སར་བོད་རང་བཙན་སྐོར་གྱི་ཚོགས་འདུ་ཞིག་འཚོགས་འདུག་པའི་གནས་ཚུལ་ཞིག་བོད་ཀྱི་བང་ཆེན་བརྒྱུད་ནས་མཐོང་སོང་། གསར་འགྱུར་ནང་སྐུ་མགྲོན་གཙོ་བོ་ཁག་གི་མིང་དང་གནད་དོན་གང་གི་ཐོག་གླེང་མོལ་བྱས་ཡོད་མིན་སྐོར་ཤེས་རྟོགས་བྱུང་། དུས་ཚོད་དང་གནས་སྟངས་གང་གི་ཆ་ནས་ཚོགས་འདུ་འདི་འདྲ་བསྡུ་སྐོང་བྱ་བ་དེ་ནི་དུས་སུ་བབས་པའི་ཆར་པ་ཞིག་དང་མཚུངས། རང་བཙན་ནས་ལམ་དབུ་མ།ལམ་དབུ་མ་ནས་མིང་དོན་མཚུངས་པའི་རང་སྐྱོང་བར་བབས་ཤིང་། ཐ་ན་བཙན་བྱོལ་གཞུང་གི་མིང་ཤུན་ཡང་གཡུག་དགོས་པའི་སྐབས་ཁེལ་ཡང་ཕ་རོལ་གྱི་རྒོལ་བ་ཚང་གི་ཡ་ལན་ཅི་ཡང་མ་སྤྲད་པའི་དུས་དེར།ལོ་རྒྱུས་ཀྱི་དོན་སྙིང་ལྡན་ཞིང་སྲ་བ་ལ་སྲ་བའི་ལན་གྱི་ཚུལ་དང་མི་རབས་རྗེས་མ་ཚོས་ཀྱང་བྱང་ཆུབ་སེམས་གླེང་མི་དགོས་པའི་རྐང་ཚུགས་བཞིན་འདུག་པས་སྙིང་ནས་དགའ། དེའི་རྗེས་ངས་ཕ་ཡུལ་དྲ་བ་སོགས་ནས་ཀྱང་དེའི་སྐོར་གྱི་གནས་ཚུལ་དང་དཔར་རིས་གསལ་པོ་ཁ་ཤས་མཐོང་སོང་། འོན་ཀྱང་ཚོགས་འདུ་ནང་ཞུགས་མཁན་བརྒྱ་ཆ་༨༠ཁམས་པ་རེད་འདུག དེ་ནས་ངས་ཁམས་པས་དམིགས་བསལ་རང་བཙན་ཐོག་ངར་དགོས་དོན་ཅི་ཡིན་ནམ་བསམ་བཞིན་རྩོམ་འདི་འབྲི་འགོ་འཛུགས་པ་ཡིན།
ཁམས་པ་རང་གཤིས་དང་རང་བཙན་གླེང་བ།
ཁམས་ཞེས་པའི་ས་མཐའི་དོན་ཡིན་པ་ལྟར་བོད་ཀྱི་ཁམས་པའི་ཡུལ་དེ་བོད་ཡུལ་གྱི་མཐའ་མཚམས་ན་ཡོད་ཅིང་། ཡུལ་དེ་གནས་ཀྱི་མི་རྣམས་མཐའ་སྐོར་གྱི་རྒྱལ་ཁབ་གཞན་དང་གཞན་དག་གིས་བཙན་འཛུལ་དབང་གིས་ཡིན་ནམ་གང་ཡིན་མི་ཤེས་མོད།བོད་ཀྱི་ཆོལ་ཁ་གཞན་གཉིས་ལས་རང་བཀུར་བའི་འདུ་ཤེས་དང་རང་རྐྱ་བའི་འདུ་ཤེས་ཆེ་བ་ཡོད། གནས་སྟངས་ཆུང་ཆུང་ཞིག་གི་ཐོག་ཡིན་ནའང་རང་འགར་སྡོད་མི་ཐུབ་མཁན་ཞིག་ཡིན་ལ། བློ་ཁོག་དང་འཁྲུག་རྩོད་སོགས་གང་གི་ཆ་ནས་ཧ་ཅང་ཆེན་པོ་ཡིན། དེའི་ཆ་ནས་ཁོ་ཚོས་ལམ་དབུ་མ་དེ་རྒྱའི་རྐང་འོག་མགོ་འཇོག་དགོས་པའི་གནས་སྟངས་ཤིག་ཡིན་པའི་འདུ་ཤེས་དབང་གིས་བློ་ཁ་གཏན་ནས་མི་ཁེངས་པར་རང་ཉིད་རང་གཙོ་བྱ་འདུན་དེའི་དབང་གིས་རང་བཙན་ལ་མོས་པ་བྱས་ཀྱི་ཡོད།
དེ་བཞིན་ཁོ་ཚོའི་ཕ་མེས་ཀྱི་སྐབས་མང་པོ་ཞིག་རང་བཙན་གྱི་དོན་དུ་ཤི་ཡོད་པས་དེ་དག་གི་ལ་རྒྱ་བསམས་ནས་རང་བཙན་ཟེར་དུས་ཁོ་ཚོས་མེ་འབར་འབར་རེད་འདུག
ཁམས་པ་གླེང་ཞོར་དུ་འཇམ་དབྱངས་ནོར་བུ་སོགས་གླེང་བ།
འོན་ཀྱང་རང་བཙན་རྩོད་མཁན་ནང་གོང་ཞུས་ཀྱི་ཁམས་པའི་བརྒྱ་ཆ་དག་གི་སྟེང་དུ་ཤེས་འཇོན་ལྷག་བསམ་རབ་ཏུ་ཕྱུག་ཅིང་རང་དབང་བདེན་པའི་དོན་དུ་གང་ལའང་གདོང་ལེན་ཐུབ་པའི་སྟོད་མངའ་རིས་སྐོར་གསུམ་གྱི་ནང་ཁོངས་གཏོགས་ཚོགས་གཙོ་ཟུར་པ་སྐུ་ངོ་རྐརྨ་ཆོས་འཕེལ་མཆོག་དང་། ལྷ་བཟང་ཚེ་རིང་།སྤྱི་འཐུས་ཀརྨ་ཡེ་ཤེས། དབུས་གཙང་གི་རྩོམ་པ་པོ་མཁས་དབང་འཇམ་དབྱངས་ནོར་བུ་སོགས་ཁ་ཤས་ཡོད་ཅིང་། ཁོང་ཚོར་རང་དང་སྡེ་ཁག་གཅིག་པའི་མི་ཚོས་ཕྱི་ནང་གཉིས་ནས་གནོན་ཤུགས་ཅི་ལྟར་སྤྲད་ཀྱང་བོད་མི་རིགས་ཀྱི་བདེན་པ་དང་རང་ཉིད་ཀྱི་རྣམ་དཔྱོད་ལ་བརྟེན་ནས་སུས་ཀྱང་སྒུལ་མི་ནུས་པར་རང་བཙན་ལ་ཤི་འཐབ་རོ་འཐབ་བྱེད་མཁན་དག་རེད། ད་དུང་ཨ་མདོའི་རྩོམ་པ་པོ་ཕོད་པ་གསུམ་ལྡན་ཀླུ་མཁར་བྱམས་ཀྱང་ཁོང་ཚོར་མྱོང་བའི་དཀའ་སྡུག་ཚང་མ་མྱོང་ཡོད། འོན་ཀྱང་རང་བཙན་གྱི་དོན་དག་ལ་ཐུག་ཚེ་ཅི་ཡང་བློས་བཏང་བྱ་ཐུབ་མཁན་དག་རེད།
དངོས་གནས་བྱས་ན་མི་ཁོ་ཚོའི་གྲས་དེ་དག་ནི་བོད་མི་རིགས་ཀྱི་ནམ་ཡང་གཙུག་ཏུ་བཀུར་བར་འོས་པའི་རླབས་ཆེན་གྱི་མི་རབས་ཤིག་ཡིན་ནའང་ཡ་མཚན་པ་ཞིག་ལ་བཙན་བྱོལ་གྱི་སྤྱི་ཚོགས་ཁྲོད་ནམ་ཡང་ལྟ་ཁྱད་མཚར་ཞིག་འཛིན་གྱི་ཡོད། དེ་ནི་ཁ་ཅིག་ནི་དད་སྟོབས་དངོས་དང་དད་སྟོབས་རྫུན་མ། གོ་སའི་གོ་སྐབས། ཁ་ཕོར་བ་། ཁྱིའི་རྔ་མ་རོགས་གནས་སྟངས་འདྲ་མིན་ཞིག་གི་འོག་ནས་རང་བཙན་འཐབ་རྩོད་པ་ཚོའིསྲོག་ལ་འཇིག་སྐུལ་བྱས་མྱོང་ཡོད་།
འཕྲོས་མུ་མཐུད་ནས་འབྲི་རྒྱུ་ཡིན།
