ཉེ་སྔོན་གོང་ས་མཆོག་གིས་ཡོ་རོབ་ཁུལ་ཨེ་ཐ་ལེ’’italy’’དང་ལ་དྭགས་ཕྱོགས་སུ་བསྩལ་བའི་བཀའ་སློབ་ཁག་གཉིས་ཀྱིས་དབུས་བོད་མིའི་སྒྲིག་འཛུགས་ནས་ཚོགས་པ་ཆེ་ཁག་དང་སྐྱིད་སྡུག་འདྲ་མིན། མི་སྒེར་སོ་སོ་ལ་སྐད་ཆ་སྣ་ཚོགས་བྱུང་ཞིང་གསར་འགྱུར་བརྒྱུད་ལམ་ཁག་གིས་ཀྱང་བཀའ་སློབ་དེ་ཡང་ནས་བསྐྱར་དུ་རྒྱངས་སྒྲོག་བྱེད་ཀྱིན་འདུག   མ་གཞིར་ད་རེབ་ཀྱི་བཀའ་སློབ་དེ་གལ་ཆེ་དང་དོན་ཆེ་ཞིག་ཡིན་པར་ལྟ་ཅི་སྨྲོས་ཏེ། དེ་སྔོན་དོལ་རྒྱལ་སྐོར་དང་བགྲེས་ཡོལ་སྐོར་ལ་གནང་བའི་བཀའ་སློབ་དེ་དག་ལ་དེ་ཙམ་གྱིས་ཐུགས་མཉམ་པ་གཞག་མ་མྱོང་བའི་ཚོགས་སྒེར་སྣ་ཚོགས་ཤིག་གིས་འུར་སྒྲོགས་ཀྱིས་གོང་ས་མཆོག་གི་ད་རེབ་ཀྱི་བཀའ་དེ་སྐུ་ཕྱྭ་དང་འབྲེལ་བ་ཡོད་པ་སྔོན་དཔོག་བྱས་ནས་སྐད་མགོ་ཅི་མཐོ་ཡིས་བྱ་བ་སྣ་ཚོགས་ཤིག་གི་འཁྲབ་ཚན་བཤམ་པར་མགོ་རྩོམ་བྱུང་།

  བདག་གིས་བསམ་ཚུལ་ནོར་མེད་ན་གོང་ས་མཆོག་གི་བཀའ་དེའི་ཉིང་དགོས་ནི་གཞོན་ནུ་དང་མི་སྒེར་རམ་གཞུང་ཞབས་པ་སྐོར་ཞིག་གིས་’’བོད་གཞུང་བསྡུ་གསོག་བརྒྱབ་སོང་’’ཟེར་བའི་སྐད་ངན་དང་དགའ་ལྡན་ཕོ་བྲང་སྲིད་དབང་དང་ཁ་གྱེས་ནས་བོད་མི་ཁ་བྲལ་འགྲོ་དོགས་ཀྱི་འཁྲུལ་སྣང་གི་ལྟ་ཚུལ་དེ་དག་ལྡོག་ནས་གཞུག་ཕྱོགས་སུ་རྡ་སར་གནས་ཆགས་པའི་དབུས་བོད་མིའི་སྒྲིག་འཛུགས་ལ་མི་མང་དང་ཚོགས་སྡེ་ཁག་གིས་ཡིད་ཆེས་དང་གུས་བརྩི་བྱ་རྒྱུ་དེ་ཁོ་ན་རེད་སྙམ་ལས་འུར་ཟིང་དང་རྙོག་གླེང་ལ་དགའ་བའི་ཚོགས་པ་སྐོར་ཞིག་གི་བསམ་ཚུལ་བཞིན་དུ་བཙན་བྱོལ་ནང་གི་ནུས་སྟོབས་ཆེ་ཤོས་དང་ཚོགས་མི་མང་གྲས། སྒྲིག་འཛུགས་བརྟན་བརླིང་གི་རྣམ་པ་མངོན་པའི་གཞོན་ནུ་ལྷན་ཚོགས་དེ་ཉིད་ཁ་ཐོར་དགུ་ཐོར་དུ་གཏང་རྒྱུ་དེ་ག་ལ་ཡིན་ནོ། །གལ་ཏེ་ད་རེབ་ཀྱི་བཀའ་དེ་གནང་མེད་ཚེ་གཞོན་ལྷན་དང་མི་སྒེར་ལ་ན་ཟུག་འདི་ལྟར་ཁེལ་གྱིན་མེད་ལ་ད་ལྟར་བཀའ་དེ་ཕེབས་ཟིན་ནས་གཞོན་ལྷན་དང་མི་སྒེར་དག་ལ་ན་ཟུག་ཆེན་པོ་ཞིག་ཁེལ་ཡོད་སྟབས་ད་ནས་དེ་དག་གིས་གཞི་མེད་ཀྱི་འཁྱོག་གཏམ་དེ་དག་མི་གནང་བའི་ཡིད་ཆེས་ཡོད་ལ་གནང་ཡང་མི་སྲིད་པ་ཉིད་དོ།  །ཉིང་དགོས་གྲུབ་ཟིན་པ་དེའི་གཞུག་ནས་གོང་ས་མཆོག་ལ་དད་གུས་ཆེ་མདོག་དང་བཙན་བྱོལ་བོད་གཞུང་ལ་ཤ་ཞེན་མངའ་མདོག་གིས་སྤྱི་ཚོགས་ཁ་བྲལ་གཏོང་བྱེད་ཀྱི་གླེང་གཞི་སྣ་ཚོགས་ཤིག་སྤེལ་བ་ནི་ཆབ་སྲིད་དང་སྤྱིར་བཏང་བའི་ཤེས་ཡོན་གྱིས་དབུལ་བའི་ཅོལ་ཆུང་དག་གི་སྤྱོད་ཚུལ་ལས་ཅི་ཡང་མིན།  སྤྱིར་བཏང་ནས་བོད་མི་སུ་ཡིན་ཡང་ཟུར་བལྟས་ལེབ་མཐོང་གིས་གཞོན་ནུ་ལྷན་ཚོགས་ཀྱི་བྱས་རྗེས་དང་བླ་མེད་ཀྱི་འགན་ཁུར་ནི་མངོན་གསལ་དོད་པོ་ཡིན་ནའང་ཀླད་མེད་སྐོར་ཞིག་གིས་གཞོན་ནུ་སྒོ་རྒྱག་རྒྱུ་ཡིན་ཟེར་བ་དང་གཞོན་ནུ་རྩ་གཏོར་གཏོང་རྒྱུ་ཡིན་ཟེར་བའི་སྐད་ཆ་འཇིགས་རྔམ་ཆེ་བ་དག་གིས་ད་ལྟའི་བོད་ནང་གི་ཚབས་ཆེན་གྱི་ལས་འགུལ་དག་ལ་སྣང་མེད་དང་རང་སྲེག་གི་རྔམ་སྟོན་དག་ལ་བརྩི་འཇོག་བྱེད་མ་སོང་ལ་དེ་ལས་དགྲ་རྒན་རྒྱ་ནག་གིས་ཀྱང་བསམ་མི་སྲིད་པར་གྲི་དང་སྟ་རེ་འཁྱེར་ཏེ་གཞོན་ནུའི་ལས་ཁུངས་ན་འཇིབ་རྒོལ་གྱི་སྐད་ཆ་གླེང་གིན་པའི་ཚུལ་དེས་བཙན་བྱོལ་བའི་སྐྱུག་དྲི་བྲོ་བའི་ངོ་གདོང་ཞིག་ཀྱང་མཐོང་འོང་།  སྐབས་འཚོལ་བ་འགའ་ཞིག་ལ་འདྲི་རྒྱུར་།  གཞོན་ནུས་རང་བཙན་རྩོད་པར་ཁྱེད་མ་འཐད་ན་ཁྱེད་ཀྱིས་བོད་རང་བཙན་སློབ་ཕྲུག་ཚོགས་པ་དང་། དགུ་བཅུ་གསུམ་ཚོགས་པ།  དེ་བཞིན་ཆུ་སྒང་སོགས་བཙན་བྱོལ་ནང་གི་ཚོགས་སྡེ་རེ་རེ་ལ་ཁྱེད་ཀྱིས་ཁུངས་དང་རིགས་པ་དེད་དེ་ཁ་གཏད་གཅོག་དང་ང་ཚོས་ཁྱེད་ཀྱི་ངང་རྒྱུན་ལ་ལྟད་མོ་བལྟ་ཆོག དེ་མིན་བཤད་ནོར་ཐེབས་པའི་ཚིག་འགའ་ཤས་ཀྱི་གཞུག་ན་ཁྱེད་ཀྱིས་ཧ་ལས་མདོག་དང་ཉེས་ཆེ་མདོག་གིས་ཡར་མཐུད་མར་མཐུད་སྣ་ཚོགས་ཀྱིས་ར་མདའ་དེ་ལྟར་གཏོང་དགོས་ན་སྐུ་ལུས་མེ་ལ་སྲེག་པའི་སྤུན་ཟླ་ལྔ་བཅུ་ལྷག་དང་སྡུག་གྱོང་དང་མུ་གེ་ཡིས་བསད་པའི་སྤུན་ཟླ་ས་ཡ་གཅིག་གི་རྗེས་ན་ཁྱེད་ཀྱིས་ཅི་ཞིག་ར་མདའ་གཏང་རྒྱུ་ཡིན་ནམ།དགྲ་བོའི་སྔུན་ན་ཁྱེད་ཀྱིས་ཀི་སྒྲ་ཚ་པོ་ཞིག་ཀྱང་རྒྱག་མྱོང་ཡོད་དམ་སྙམ་ནས་ངས་ནི་ཁྱེད་ཀྱི་བསམ་བློ་ལ་འགྲེལ་བ་རྒྱག་གིན་ཡོད་ལ་གལ་ཏེ་ཁྱེད་ཀྱིས་ངེས་པར་ཚོགས་མི་ཁྲི་གསུམ་གྱི་བདག་ཉིད་གཞོན་ནུ་ཚོགས་པ་སྒོ་རྒྱག་དགོས་ཟེར་བའི་དབང་དུ་གཏོང་ན་བཙན་བྱོལ་བའི་ལས་འགུལ་དེ་ནས་བཟུང་ཚར་རྒྱུ་མ་རེད་དམ། ཡང་ན་སྐབས་རེར་ཡོད་ལ་སྐབས་རེར་མེད་པའི་ཁྱེད་ཚོས་བོད་ཀྱི་རྩ་དོན་རྩོད་ཀྱིན་རེད།  རྡ་ས་དང་ས་གནས་འགའ་ཞིག་ལ་སྤྲོ་སྐྱིད་དང་བག་མེད་ཀྱི་བྱ་བ་སྒྲུབ་དུས་ལུང་ཚན་ག་གེ་མོའི་སྐྱིད་སྡུག་ཡིན་ཟེར་བ་དང་ཚོགས་པ་ཆེ་གེ་མོའི་འགོ་གཙོ་ཡིན་ཟེར་བའི་ཀླད་སྟོང་གསར་བུ་སྐོར་ཞིག་དང་ཀླད་རྙིང་མཁྲེགས་འཛིན་གྱི་རྒན་པོ་སྐོར་ཞིག་ལས་དེ་སྔོན་ནས་ད་ལྟར་བར་བྱང་ཨ་མི་རི་ཁ་ནས་ཚུར་བརྩི་སྟེ་རྡ་ས་བར་གྱི་ལས་འགུལ་དང་མགོ་ནག་བོད་མི་རྒྱ་གར་ན་བྲོས་བྱོལ་ཡོང་བ་ནས་མར་བརྩི་སྟེ་དེ་རིང་གི་དུས་ཚོད་བར་རང་ལས་གཞན་གཅེས་ཀྱི་སྤྱི་ཚོགས་ཞབས་ཞུའི་ཁྲོད་ན་སྟོད་གོས་སེར་པོ་གོན་པའི་གཞོན་ནུ་ལྷན་ཚོགས་ཟེར་བ་ལས་སྤྲོ་སྐྱིད་ཀྱི་སྡིངས་ཆ་ནས་རིག་པའི་ཚོགས་པ་ག་གེ་མོའི་ཚོགས་གཙོ་མི་འདུག་ལ་ཆང་རག་གི་བཟི་གཏམ་ནས་ཤེས་པའི་ཚོགས་པ་ཆེ་གེ་མོའི་ཚོགས་མི་ཡང་མི་འདུག སུན་སྣང་ཅན་གྱི་སྐད་ཆ་འདི་དག་བཤད་འདོད་ཡེ་ནས་མེད་ནའང་སྐབས་འཚོལ་བ་དང་ཅོལ་ཆུང་ཀླད་མེད་འགའ་ཡི་བྱ་སྤྱོད་ལ་ཡིད་མ་རང་ནས་ཟུར་ཙམ་སྒྲོགས་པ་ཡིན།