ཁྱོད་ཀྱི་ཚེ་ཚད་དང་ངའི་ཞལ་ཆེམས།
ཁྱོད་ཀྱི་ཚེ་ཚད་དང་ངའི་ཞལ་ཆེམས།
ངས་འཇིག་རྟེན་གྱི་སྒོ་ཆེན་འདི་ནས་རྒྱས་སྤྲོས་ཀྱི་གསོལ་སྟོན་མ་བཤམས་ལ
ངུ་འབོད་ཀྱི་ཧྲག་དབར་འདི་ནས་དོན་མེད་ཀྱི་ཅ་ཅོ་ཡང་མ་བསྒྲགས
རེད་དེ་་་་་ཁུ་སིམ་གྱི་དབྱར་དུས་དེ་འཁྱག་སིབ་སིབ་ཀྱི་དགུན་དུས་སུ་རླན་དུས
ཚོར་མ་མྱོང་བའི་འཇིགས་སྐྲག་གི་འུར་སྒྲ་འདི་གང་ནས་སླེབས།
ཅི་ཡང་མི་འབྱུང་བའི་སྨོན་སེམས་ཀྱི་རེ་བ་དཀར་བོ་དྲན་འཛིན་ལ་དཔར་ཏེ
སྲང་ལམ་གྱི་སྐད་ཆ་ཕྲ་མོ་དག་ཡིད་ཡུལ་ལ་སྒོམ་བཞིན་
ཨེ་བདེན་མི་བདེན་གྱི་རླུང་སྒྲ་ལ་སོམ་ཉི་བྱེད་དུས
ངའི་དྲན་པ་དང་གློ་བ་ཡོངས་རྫོགས་ས་རྡོ་དང་བྱེ་མའི་རང་གཟིགས་སུ་གྲུབ།
ནམ་འཆི་ཆ་མེད་དང་འཆི་རྐྱེན་ངེས་མེད་ཀྱི་སྒྲུང་རིང་ལ་མོས་པ་བྱེད་ཞོར
མཆོང་ཆོག་ཆོག་གི་དཔང་གདངས་རང་ཉིད་ནས་བརྩམས་ཏེ
གང་ནས་འོང་མི་ཤེས་པའི་འུར་སྒྲ་ཆེན་པོ་དེར་སྟོང་སྒྲུག་བྱེད་དུས
བདག་ནི་སྟོང་སྒོམ་གྱི་རླངས་པ་སྙིང་ཁར་བརྒྱབ་ཏེ་དངངས་སྐྲག་གིས་གྲོངས།
ཅོ་གསེང་གི་སྐྲ་ཉག་རེ་རེ་རླུང་བུ་དག་གི་བཞུར་རྒྱུན་ལ་བརྒྱུས་ཤིང
ཞོས་འདབས་ཀྱི་ལྕགས་རི་ཚུན་ཆད་ཡོམ་ཡོམ་གྱིས་ལྷགས་པས་སྐྱོད་དེ
གནམ་ས་གཉིས་ཀྱི་བང་རིམ་ལ་གས་ཆག་གི་སྣང་ཤེས་སྟེར་དུས
བདག་ནི་སྤུ་ཉག་ལྟ་བུའི་འདུས་ཤེས་ཀྱི་གཡུལ་ས་རུ་འཐིམ།
ད་ལོ་དང་ན་ནིང་ནི་འུ་གཉིས་ཀྱི་མཐར་མཇུག་གི་ཚེ་ཚད་ཡིན་སྲིད་ལ
སང་ཉིན་དང་དེ་རིང་ནི་འུ་གཉིས་ཀྱི་ཞལ་ཆེམས་ཀྱི་ས་མིག་ཀྱང་ཡིན་སྟབས
ས་ཡོམ་ལ་རྡུགས་ར་མི་འདོན་པར་མལ་ས་ནས་འཆི་གྲབས་ཀྱིས་དང
ཧ་ཅིང་ཆེ་རྒྱུ་མེད་པའི་འཇིག་རྟེན་གཞན་ཞིག་གི་ངོ་གདོངས་མཐོང་ཐུབ་ཨང་།
༢༠༡༢ཟླ་༡༠་ཚེས་༤་ཉིན་ལ་བྲིས།