༄༅།། རང་སེམས་སྤྲིན་པའི་གཡོགས་སོང་།
དུང་བ་རྒྱང་ལ་ཕྱོགས་སའི་མཚོ་མཐའ་ཞིག་ན།།
སེམས་ཀྱི་གསང་བ་བྱེ་ཐང་ངོས་སུ་སྦར་ཏེ།།
ཉི་འོད་གྲོང་ལ་ཅེར་ཏེ་རེ་སྒུག་གསོན་པོ།།
མཚོ་མོ་དྲག་ཏུ་སྐྱོམ་སའི་མཐའ་ན་སྒུག་ཡོད།།
རེ་བ་གྲངས་མེད་ཞིག་གི་གཏིང་རིམ་ཁྲོད་ན།།
ལོ་ཟླའི་ངོ་གདོང་རྡུལ་དང་ཚ་བས་གདུང་བཞིན།།
སྙིང་གི་འཕར་སྒྲ་ལྡང་སའི་ཁང་ཆུང་ནང་ན།།
དྲན་པའི་གདོང་ལ་སྐྱོ་བའི་རྫིང་བུ་འཁྱིལ་སོང་།།
དྲན་གདུང་རྨ་ཁ་སྐྱོར་ཏེ་གཞན་ཡུལ་ཞིག་ན།།
རང་སེམས་སྤྲིན་པའི་གཡོགས་པའི་ལོ་སྣེ་རེ་ན།།
རྫོགས་མེད་སེམས་ཀྱི་རྨ་ཁ་སླར་ཡང་ཟག་ཏེ།།
ཟླ་བ་ཁེར་འགྲོའི་འོག་ནས་ཤུགས་རིང་འཐེན་ཤོར།།
ཁེར་རྐྱང་ཡུལ་དུ་གྱར་བའི་མྱོང་བྱང་འདྲ་གཟུགས།།
བཅོས་མེད་སེམས་ཀྱི་གསེབ་ནས་དྲག་ཏུ་ལྡང་སྐབས།།
རྩིས་འཕྲུལ་འཆར་གདོང་ངོས་སུ་ཁ་ཐུག་བྲིས་ཏེ།།
ཕྱིར་དྲན་ལོ་ཟླ་ཞིག་གིས་བརྟེན་དུ་བཞག་ཡོད།།
གསེར་རྟ་བསོད་ནམས་ཕུན་ཚོགས་སམ་དཔལ་ཤུལ་འབྲོང་སྲས་སུ་
འབོད་པས་བྲིས་སོ།། ༢༠༡༢ ༡༠ ༡༤