བུད་མེད་ཅིག་གིས་རང་ལུས་མེར་སྲེག་གིས་རྒྱ་གཞུང་ལ་ངོ་རྒོལ།
ཟླ་འདིའི་ཚེས་ ༧ ཉིན་རྒྱབ་བོད་ནང་གི་ཆུ་ཚོད་ ༥ དང་སྐར་མ་ ༣༠ ་སྟེང་། ཨ་མདོ་རེབ་གོང་མདོ་བ་སྒྲོ་རོང་པོ་སྡེ་པའི་སྒྲོ་ཚང་ཚོ་བ་ནས་ཡིན་པ་རྟ་མགྲིན་མཚོས་རང་ལུས་མེར་སྲེག་གིས་རྒྱ་གཞུང་ལ་ངོ་རྒོལ་བྱས་ཏེ། འདས་གྲོངས་ཕྱིན་འདུག
ནོར་གླིང་ཉམས་ཞིབ་སྡེ་ཚན་གྱི་འགན་འཛིན་རྡོ་རྗེ་དབང་ཕྱུག་གིས་གནས་ཚུལ་མཁོ་སྤྲོད་གནང་བ་ལྟར་ན། རྟ་མགྲིན་མཚོ་ནི་ད་ལྟ་རང་ལོ་ ༢༣ ཡིན་པ་དང་། ཕ་རྟ་མགྲིན་སྐྱབས་སམ་རྟམ་ཁོ་༼ལོ ༥༠༽ དང་མ་དཀོན་མཆོག་མཚོ་༼ལོ་ ༤༤༽གཉིས་ལ། བུ་གཅིག་དང་བུ་མོ་གཉིས་བཅས་བུ་ཕྲུག་གསུམ་ཡོད་པའི་ནང་གི་རྒན་པ་དེ་ཡིན་ལ། ནུ་བོ་ལྷ་མོ་སྐྱབས་ད་ལྟ་ལོ་ ༢༠ དང་། ནུ་མོ་རི་ལངས་མཚོ་ད་ལྟ་ལོ་ ༡༡ ཡིན་འདུག རྟ་མགྲིན་མཚོ་ལ་བུ་གཅིག་ཡོད་པའི་མིང་ལ་སྙིང་བྱམས་ཚེ་རིང་དང་ད་ལྟ་ལོ་ ༦ ཡིན་འདུག
དེ་རིང་ས་གནས་རང་ནས་གནས་ཚུལ་འབྱོར་གསལ་ལྟར་ན། རང་ལུས་མེར་སྲེག་སྐབས། རྟ་མགྲིན་མཚོས་ “རྒྱལ་བ་རིན་པོ་ཆེ་བོད་ལ་གདན་འདྲེན་ཞུ་དགོས་”ཞེས་སྐད་འབོད་གནང་ཡོད་འདུག རང་ལུས་མེར་སྲེག་གཏོང་ས་ནི། རེབ་གོང་མདོ་བ་ཞང་དང་ཀི་ལོ་མི་ཊར་བཅོ་ལྔའི་སར་ཡོད་པའི་སྒྲོ་རོང་པོའི་གད་དམར་ཐང་ཟེར་བ་དེ་ཡིན་པ་དང་། གད་དམར་ཐང་ནི་རེབ་གོང་མདོ་བ་སྒྲོ་རོང་པོའི་ས་དཀྱིལ་དང་། དེར་སློབ་གྲྭ་དང་ཚོང་ཁང་སོགས་ཡོད་ཅིང་། འབྲོག་ཁུལ་དེའི་མི་རྣམས་འདུས་ཡུལ་ཆེ་ཤོས་ཀྱི་ས་གནས་ཤིག་ཡིན་པ་རེད།
ཉེ་བའི་ཟླ་ཤས་ནས་ཁོང་མོས་བོད་བསྟན་སྲིད་ཆེད་རང་ལུས་མེར་སྲེག་གིས་རྒྱ་གཞུང་ལ་ངོ་རྒོལ་གནང་མཁན་དཔའ་བོ་དཔའ་མོ་དག་གི་ཆེད་དུ་དམིགས་ཏེ། མ་ཎི་གསོག་སྒྲུབ་དང་། སྨྱུང་གནས་སྡོམ་པ་སྲུང་བ། མཆོད་མེ་འབུལ་བ་སོགས་དགེ་སྒྲུབ་ལ་འབད་ཡོད་ཅིང་། དེ་རིང་ཁོང་མོ་རང་གིས་རང་ལུས་མེར་བསྲེགས་བཏང་བའི་གནས་ཚུལ་འདི་བྱུང་བ་རེད་ཅེས་ས་གནས་ཀྱི་མིས་འགྲེལ་བརྗོད་བྱས་ཡོད་པ་རེད།
མེར་སྲེག་བཏང་རྗེས་ཀྱི་གནས་ཚུལ་སྐོར་ལ། དེ་རིང་གནས་ཚུལ་འདིའི་སྐོར་གང་སར་ཁྱབ་པ་ལ་བརྟེན་ནས། དགོང་དྲོར་ས་རུབ་ཡོད་ནའང་འདབས་འབྲེལ་གྱི་མི་མང་སུམ་སྟོང་བརྒལ་བ་གད་དམར་ཐང་ལ་འཛོམས་ནས་ཀི་ལྡིར་དང་། རྒྱལ་བ་རིན་པོ་ཆེ་བོད་ལ་གདན་འདྲེན་ཞུ་དགོས། རྒྱལ་བ་རིན་པོ་ཆེ་ཁྲི་ལོར་བརྟན་པར་ཤོག བོད་ལ་རང་དབང་དགོས་ཞེས་སྐད་འབོད་བྱེད་བཞིན་ཡོད་འདུག་ལ། དེ་རིང་གཅིག་པུར་ས་ཐག་ཉེ་རྒྱང་ནས་དགོན་སྡེ་དང་གྲོང་སྡེ་མང་པོ་ནས་མི་མང་མྱ་ངན་གུས་འདུད་དང་། གདུང་སེམས་མཉམ་བསྐྱེད་ཞུ་བར་འབྱོར་དང་འབྱོར་མུས་ཡིན་པ་དང་། རླངས་འཁོར་སུམ་བརྒྱ་བརྒལ་བ་གད་དམར་ཐང་དུ་འཛོམས་འདུག། ད་དུང་ཡང་མུ་མཐུད་ཐག་ཉེ་རིང་གི་མི་མང་པོ་འབྱོར་བཞིན་ཡོད་འདུག
དེ་རིང་གི་གནས་ཚུལ་འདི་བྱུང་རྗེས། ས་གནས་ཀྱི་རྒྱ་ནག་གཞུང་དང་ཉེན་རྟོག་པ། དམག་མི་བཅས་ཀྱིས་དམ་དྲག་བྱེད་པ་སོགས་ཀྱི་གནས་སྟངས་གང་འདྲ་ཡིན་མིན་དྲིས་པར། རྩ་བས་འབྲོག་ཁུལ་ཡིན་པ་དང་། རྫོང་དང་ཞང་ལ་ལམ་ཐག་རིང་བས་ཡིན་ནམ་གང་ལྟར། ད་ལྟའི་ཆར་ནི་དམ་དྲག་སོགས་ཀྱི་གནས་ཚུལ་གང་ཡང་མི་འདུག་ཅེས་ས་གནས་ནས་འགྲེལ་བརྗོད་བྱས་ཡོད་པ་རེད།།
