གྲུབ་དབང་རྫོགས་ཆེན་པའི་མཁན་སྤྲུལ་ལྷན་འཛོམས་ཐེངས་གསུམ་པ།
ཟླ་འདིའི་ཚེས་ ༢༩ ཉིན་རྒྱ་གར་ལྷོ་ཕྱོགས་ཀརྣ་ཊ་ཀའི་མངའ་སྡེ། ཅམ་རཱ་ཇཱུ་ན་གྷར་རྫོང་། ཀོ་ལེ་གྷལ། ཨོ་ཊའི་ཡ་པ་ལ་ས་ཁུལ་དུ་ཡོད་པའི་བོད་མིའི་གཞིས་ཆགས་དོན་ལྡན་གླིང་། རྫོགས་ཆེན་དགོན་དུ་གྲུབ་དབང་རྫོགས་ཆེན་པའི་མཁན་སྤྲུལ་ལྷན་འཛོམས་ཐེངས་གསུམ་པ་གནང་ཡོད་པ་རེད།
དེ་ཡང་ཉིན་མོ་དེའི་ཞོགས་པའི་ཆུ་ཚོད་༨ : ༣༠ ཐོག་སྔ་འགྱུར་གྲུབ་དབང་རྫོགས་ཆེན་པའི་བསྟན་བདག་རྫོགས་ཆེན་རིན་པོ་ཆེ་དབུ་བཞུགས་ཐོག རྫོགས་ཆེན་དགེ་མང་རིན་པོ་ཆེ་དང་། ཆོས་རིག་བཀའ་ཟུར་ཚེ་རིང་ཕུན་ཚོགས་སོགས་འཕགས་བོད་གཉིས་ཀྱི་དགོན་སྡེ་ཁག་ ༤༠ ལྷག་གི་མཁན་སྤྲུལ་སྐུ་ཚབ་ཁག་དང་། དེ་བཞིན་ཕྱི་གླིང་ཡུལ་གྲུ་ཁག་གི་དད་ལྡན་བཞིན་བདག་དང་ཆོས་ཞུ་བ་མི་གྲངས་བརྒྱ་ཕྲག་བརྒལ་བ་ཙམ་རྫོགས་ཆེན་དགོན་པའི་དཔེ་མཛོད་ཁང་དུ་གདན་ལ་འཁོད་པ་དང་། འཕགས་པ་བཀྲ་ཤིས་བརྒྱད་པའི་ཚིགས་སུ་བཅད་པས་མདུན་བསུས་ཏེ། རྫོགས་ཆེན་མཁན་སྤྲུལ་ལྷན་འཛོམས་ཐེངས་གསུམ་པ་དངོས་སུ་དབུ་འཛུགས་གནང་།
རྫོགས་ཆེན་ལས་ཐོག་མཁན་པོ་འཇམ་དཔལ་བསྟན་འཛིན་ལགས་ཀྱི་གྲུབ་དབང་རྫོགས་ཆེན་པའི་མཁན་སྤྲུལ་ལྷན་འཛོམས་ཐེངས་གསུམ་པ་ངོ་སྤྲོད་དང་འབྲེལ་གསུངས་དོན། ང་ཚོས་གྲུབ་དབང་རྫོགས་ཆེན་པའི་བསྟན་པའི་བྱུང་རིམ་ལ་ཕྱི་མིག་བལྟས་ཏེ། མ་འོངས་པར་བསྟན་པ་འཛིན་སྐྱོང་སྤེལ་གསུམ་བྱེད་ཕྱོགས་ག་འདྲ་དགོས་མིན་ཐད་གྲོས་བསྡུར་ལྷུག་པོ་དང་། ཞིབ་ཚགས་གནང་རྒྱུ་ཡིན། ཅེས་གསུང་སོང་། བོད་མི་མང་སྤྱི་འཐུས་མཁན་པོ་བསོད་ནམས་བསྟན་འཕེལ་ཀྱིས་མཁན་སྤྲུལ་ལྷན་འཛོམས་དེའི་ཐོག་གསུང་འཕྲིན་ཞིག་གནང་ཡོད་པ་དེ་ཐེག་མཆོག་རྣམ་གྲོལ་གླིང་གི་སྐུ་ཚབ་མཁན་དཀོན་མཆོག་ལགས་ཀྱིས་སྒྲོག་སྦྱང་གནང་ཡོད་པ་དང་། གསུང་འཕྲིན་དེའི་ནང་“༧གོང་ས་སྐྱབས་མགོན་༧རྒྱལ་བའི་དབང་པོ་སྐུ་ཕྲེང་ ༡༤ པ་ཆེན་པོ་མཆོག་གིས་སྐུ་ངོ་རྟ་ར་བ་བརྒྱུད་ཕྱི་ལོ་ ༡༩༦༧ ཟླ་ ༧ ཚེས་ ༡༢ འཁོད་པའི་རྫོགས་ཆེན་མཁན་པོ་ཟླ་ཟེར་མཆོག་གི་མཚན་ཐོག་བཀའ་ཡིག་གནང་བར། རྫོགས་ཆེན་པདྨ་རིག་འཛིན་སྐུ་ཕྲེང་དྲུག་པ་འཇིགས་བྲལ་བྱང་ཆུབ་རྡོ་རྗེའི་སྐྱེ་སྲིད་རྡོ་གྲུབ་མཆོག་སྤྲུལ་རིན་པོ་ཆེའི་ཐུགས་རྟགས་དགོངས་དོན་ལྟར་ཏྲེ་ཤོད་ཧོར་ལ་དཀར་ཚང་གི་བུ་ཤིང་འབྲུག་ལོ་པར་ངེས་རྙེད་ཚང་མ་བློ་སེམས་གཅིག་མཐུན་གྱིས་བདག་གཅེས་ཞུ་མུས་གང་ལེགས་ལ། དམ་པ་གོང་རིམ་གྱི་མཛད་བཟང་བདག་གིར་སྐྱོང་བཞེས་ཐུབ་པའི་སྐུ་ཡོན་གསན་བཞེས་ཞུ་སྐུལ་སོགས་ལ་སེང་ཤོར་མ་སོང་བ་བྱེད་ཅིང་། རང་གཞུང་ནས་རིས་མེད་བསྟན་འཛིན་སྐྱེས་བུར་འོས་བབས་ཀྱི་བཀུར་བཟོས་མཐུན་སྐྱོང་གཟིགས་པ་གཡེལ་མེད་སྔར་མུ་བཞིན་གནང་རྒྱུ་བཅས་ཞེས་བརྟག་དོན་བློ་སེམས་གཅིག་མཐུན་གྱིས་ངོས་བཞེས་གནང་སྟེ་བསྟན་འཛིན་འཇིགས་བྲལ་ལྷུན་པོ་ཞེས་མཚན་གསོལ་བས་གཟིགས་སྐྱོང་ཆེན་པོ་གནང་ཡོད་”ཅེས་རྒྱལ་བསྟན་སྤྱི་དང་བྱེ་བྲག་ལ་ཕྱག་རྗེས་མིས་སྨོན་རང་སྐྱིད་ཇི་ལྟར་འཇོག་ཐབས་ལ་སྒོ་ཀུན་ནས་འབད་བརྩོན་གནང་དགོས་རྒྱུ་དུས་ཀྱི་དགོས་མཁོ་གྱུར་ཡོད་སྐོར་སོགས་འཁོད་འདུག
ཆོས་རིག་ལྷན་ཁང་ནས་གནང་བའི་གསུང་ཕྲིན་དེ་བཞིན་ཀོ་ལེ་གྷལ་དོན་གླིང་ས་གནས་འགོ་འཛིན་སྐུ་ངོ་ཕུན་ཚོགས་ལགས་ཀྱིས་སྒྲོགས་སྦྱང་གནང་སོང་ལ། གསུང་འཕྲིན་དེའི་ནང་དུ་ “གྲུབ་དབང་རྫོགས་ཆེན་པའི་བསྟན་པའི་བྱུང་རིམ་ལ་ཕྱི་མིག་བལྟས་ནས་ད་ལྟའི་གནས་སྟངས་དང་འབྱུང་འགྱུར་བཤད་སྒྲུབ་འཛིན་སྐྱོང་སྤེལ་གསུམ་བྱེད་ཕྱོགས་སྐོར་ལ་རྫོགས་ཆེན་རིན་པོ་དབུ་བཞུགས་ཀྱིས། བཀའ་བསྡུར་གནང་གཏན་ཁེལ་བར་འདི་ག་ཆོས་རིག་ལས་ཁུངས་ནས་༸རྫོགས་ཆེན་རིན་པོ་ཆེ་དབུས་པའི་ཚོགས་བཅར་བ་ཡོངས་ལ་འཚམས་འདྲིའི་བཀྲ་ཤིས་བདེ་ལེགས་ཞུ། གནས་གསལ་༸རྒྱལ་དབང་ལྔ་པ་ཆེན་པོའི་སྐབས་ནས་རྫོགས་ཆེན་སྐུ་ཕྲེང་བདུན་བསྟན་པ་དང་འགྲོ་བའི་དོན་དུ་ཕེབས་ཤིང་། ད་ལྟའི་ཆར་མཇའ་མཚོན་དང་མཁའ་འགྲོའི་སྙིང་ཐིག་གཙོ་བོར་ཕྱག་བཞེས་གནང་བཞིན་ཡོད་ཚོད་ལ། རྫོགས་ཆེན་པདྨ་རིག་འཛིན་གྱི་གསུང་ཆོས་དང་གཏེར་སྟོན་ཉི་མ་གྲགས་པའི་གཏེར་ཆོས་ལའང་མི་ཉམས་རྒྱུན་འཛིན་དང་ཉམས་པ་སླར་སོར་ཆུད་གལ་གནད་ཆེ་བར་མངོན། ” ཞེས་འཁོད་འདུག དེ་བཞིན་བོད་ནང་ནས་མཁན་སྤྲུལ་ཁག་ཅིག་གིས་གསུང་འཕྲིན་ཡང་གནང་ཡོད་པ་རེད།
རྫོགས་ཆེན་རིན་པོ་ཆེས་གསུང་བཤད་གནང་སྐབས། “དེ་རིང་གི་མཁན་སྤྲུལ་ལྷན་འཛོམ་ཐེངས་གསུམ་པ་འདི་ནི་ཆབ་སྲིད་ཀྱི་ཚོགས་འདུ་ཞིག་མ་ཡིན་པར། གཙོ་བོ་སྔ་འགྱུར་གྲུབ་དབང་རྫོགས་ཆེན་པའི་བསྟན་པ་འཛིན་སྐྱོང་སྤེལ་གསུམ་བྱེད་ཕྱོགས་ལ་ཡར་རྒྱས། མདུན་བསྐྱོད་ག་འདྲ་དགོས་མིན་ཐད་བགྲོ་གླེང་དང་གྲོས་བསྡུར་བྱེད་རྒྱུའི་ཆེད་དུ་འཚོགས་བཞིན་ཡོད་པ་དང་། ཕྱོགས་ཡོངས་ནས་རྫོགས་ཆེན་པའི་ཆོས་བརྒྱུད་འཛིན་པ་ཚང་མ་འཆམ་མཐུན་དང་། གཅིག་སྒྲིལ་བྱ་དགོས་པ་ལས་ལག་པ་ཡ་གཅིག་གིས་ཟློག་པ་མི་ཡོང་བའི་དཔེ་ལྟར། རྫོགས་ཆེན་པ་ཚང་མ་མཐུན་སྒྲིལ་གྱི་སྒོ་ནས་རྫོགས་ཆེན་པའི་བསྟན་པའི་ཞབས་འདེགས་ཞུ་དགོས་པའི་སྐོར་ལམ་སྟོན་གསུང་བཤད་གནང་སོང་།
གྲུབ་དབང་རྫོགས་ཆེན་པའི་མཁན་སྤྲུལ་ལྷན་འཛོམས་ཐེངས་གསུམ་པའི་ཚོགས་བཅར་བ་རྣམས་སྡེ་ཚན་གཉིས་སུ་བགོས་ནས། རྫོགས་ཆེན་པའི་བསྟན་པ་འཛིན་སྐྱོང་སྤེལ་གསུམ་བྱེད་ཕྱོགས་དང་འབྲེལ་བའི་བརྗོད་གཞིའི་ཐོག་བགྲོ་གླེང་གནང་ཡོད་པ་རེད།
གྲུབ་དབང་རྫོགས་ཆེན་པའི་མཁན་སྤྲུལ་ལྷན་འཛོམས་འདི་ཐོག་མར་ཕྱི་ལོ་ ༡༩༩༧ ལོའི་བོད་ཟླ་ ༥ པའི་ཡར་ཚེས་ལ་རྒྱ་གར་འཕགས་པའི་ཡུལ་གྱི་གནས་མཆོག་རྡོ་རྗེ་གདན་དུ་དབུ་ཚུགས་པ་ཞིག་ཡིན་པ་རེད།།
མེ་སོར་གསར་འགོད་པས།
