རྔ་པ་རང་སྐྱོང་ཁུལ་མཛོད་དགེ་རྫོང་དུ་རང་སྲེག་ངོ་རྒོལ།
ཕྱི་ལོ་༢༠༡༣ ཟླ་༢ ཚེས་༡༣ ཉིན་གནས་ཚུལ་གསལ་རྟོགས་བྱུང་བར། ཕྱི་ཟླ་༢ ཚེས་༣ ཉིན་གྱི་བོད་ནང་གི་ཞོགས་ཀའི་ཆུ་ཚོད་༦ ཙམ་ལ་བོད་མདོ་སྨད་རྔ་པ་ཀིརྟི་དགོན་པའི་གྲྭ་བློ་བཟང་རྣམ་རྒྱལ་གྱིས་རྒྱ་གཞུང་ལ་རང་ལུས་མེར་སྲེག་གི་ངོ་རྒོལ་བྱས་ཏེ་སྐུ་གྲོངས་ཡོད་འདུག
དྷ་ས་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་དང་ཀ་ཉག་ཚེ་རིང་གཉིས་ཀྱིས་ཕྱི་ལོ་༢༠༡༣ ཟླ་༢ ཚེས་༡༣ ཉིན་གནས་ཚུལ་གསལ་རྟོགས་བྱུང་མཁོ་སྤྲོད་བྱས་པ་ལྟར་ན། ཕྱི་ཟླ་༢ ཚེས་༣ ཉིན་གྱི་བོད་ནང་གི་ཞོགས་ཀའི་དུས་ཚོད་༦ ཙམ་ལ་བོད་མདོ་སྨད་རྔ་པ་ཀིརྟི་དགོན་པའི་གྲྭ་བློ་བཟང་རྣམ་རྒྱལ་གྱིས་རྔ་པ་རང་སྐྱོང་ཁུལ་མཛོད་དགེ་རྫོང་མཁར་གྱི་སྤྱི་བདེ་ཉེན་རྟོག་ཁང་དང་ཐག་ཉེ་ཙམ་ནས་རང་ལུས་མེར་སྲེག་བཏང་སྟེ། ༧རྒྱལ་བ་རིན་པོ་ཆེ་སྐུ་ཚེ་ཁྲི་ལོ་བརྟན་པར་ཤོག་ཅེས་སོགས་སྐད་འབོད་བྱེད་བཞིན་ཉེན་རྟོག་ཁང་གི་ཕྱོགས་སུ་རྒྱུགས་ཡོད་པ་དང་། ཁོང་ས་གནས་དེ་ག་རང་ནས་འདས་གྲོངས་སུ་གྱུར་ཡོད་འདུག སྐབས་དེར་ཉེན་རྟོག་པ་རྣམས་ཀྱིས་ཁོང་གིས་རང་ལུས་མེར་སྲེག་གཏོང་ས་དེ་ནས་རྒྱབ་ཁུག་ཅིག་གི་ནང་ནས་ཐོབ་ཐང་ལག་ཁྱེར་དང་ཡི་གེ་ཞིག་རྙེད་སོན་བྱུང་བ་ལྟར་བརྩད་གཅོད་བྱས་མཐར་ཁོང་རྔ་པ་ཀིརྟི་དགོན་པའི་གྲྭ་བློ་བཟང་རྣམ་རྒྱལ་ཡིན་པ་ར་སྤྲོད་གསལ་པོ་བྱུང་ཡོད་འདུག་མོད། ཡི་གེའི་ནང་དོན་ཤེས་རྟོགས་མ་བྱུང་ལ། དེ་བཞིན་ཁོང་གི་སྐུ་ཕུང་ཡང་ནང་མིར་མ་སྤྲད་པར་རྒྱ་གཞུང་གིས་མེར་སྲེག་བཏང་རྗེས་རུས་ཐལ་ཞིག་མ་གཏོགས་ནང་མིར་སྤྲད་མེད་པ་རེད།
ཡང་གནས་ཚུལ་ཤེས་རྟོགས་བྱུང་བར། ཕྱི་ལོ་༢༠༡༢ ལོའི་ཕྱི་ཟླ་དགུ་པའི་ནང་གྲྭ་བློ་བཟང་རྣམ་རྒྱལ་གློ་བུར་དུ་བདུན་ཕྲག་གཉིས་ཙམ་རིང་གར་སོང་ཆ་མེད་དུ་གྱུར་ཡོད་ལ། སྐབས་དེར་འཛིན་གྲོགས་རྣམས་དང་ནང་མི་སོགས་ཀྱིས་སེམས་ཁྲལ་ཆེན་པོས་ཉིན་མཚན་མེད་པར་བཙལ་ཡང་རྙེན་སོན་མ་བྱུང་མོད། རྗེས་སུ་ཤེས་རྟོགས་བྱུང་བར་རྔ་པའི་ཉེན་རྟོག་པས་བཀག་ཉར་བྱས་པ་ཡིན་འདུག་ལ། འཇིགས་སྐུལ་འདྲ་མིན་བྱས་མཐར་གྲྭ་པ་མིན་ཚུལ་བརྗོད་བཅུག་སྟེ་དགོན་པའི་ནང་དུ་འདུག་མི་ཐུབ་པ་བཟོས་འདུག་ལ། སྐབས་དེར་ཉེན་རྟོག་པ་རྣམས་ཀྱིས་ཀྱང་ཁོང་གཞང་ཁང་ནང་ནས་འཛིན་བཟུང་བྱས་ཚུལ་གྱི་གཏམ་འཆལ་བསྒྲགས་ཡོད་འདུག
དེ་རྗེས་ཁོང་ཟླ་བ་ཁ་ཤས་རིང་འབྲོག་ཁུལ་གྱི་སྤུན་ཉེ་སོགས་ཀྱི་ནང་དུ་འཁྱམ་ཉུལ་བྱས་ཏེ་བསྡད་ཡོད་ཀྱང་ཁོང་གར་སོང་ས་ན་ཉེན་རྟོག་པས་རྗེས་འདེད་དང་ལྟ་རྟོག་བྱས་ཏེ་སུན་གཙེར་འདྲ་མིན་བྱས་ཡོད་འདུག
རང་ལུས་མེར་སྲེག་གཏོང་བར་མ་སོང་སྔོན་དེར་རྔ་པ་ཀིརྟི་དགོན་ནང་དུ་ཡོང་ནས་ ཁོ་རང་ད་ནས་བཟུང་གནས་གཞན་ཞིག་ལ་སྒྲིབ་སྦྱོང་བྱེད་དུ་འགྲོ་གི་ཡིན་བརྗོད་དེ་སོང་ཡོད་འདུག
དེང་སྐབས་ཁོང་ཚང་གི་ཤུལ་ལུས་ནང་མི་སྤུན་མཆེད་ཚང་མའི་ཁ་པར་དང་འགྲོ་འདུག་སོགས་ལ་རྒྱ་གཞུང་གིས་བྱ་ར་བྱས་ཡོད་ཅིང་། སྤུན་ཆུང་བ་གྲྭ་བློ་བཟང་སངས་རྒྱས་ཉིན་ཤས་རིང་རྒྱ་གཞུང་གིས་བཀག་ཉར་ཡང་བྱས་ཡོད་འདུག
གྲྭ་བློ་བཟང་རྣམ་རྒྱལ་ལགས་ནི་རྔ་པ་རྫོང་གཅའ་རུ་བ་ཡུལ་ཚོའི་ཕྱུགས་ལས་གོང་མའི་ཕ་སྐར་ཁོ་དང་། མ་སྐར་སྐྱིད་གཉིས་ཀྱི་བུ་ཡིན་ཞིང་། རང་ལོ་༣༧ ཡིན་འདུག ཁོང་ཚང་ལ་བུ་བཞི་དང་བུ་མོ་བཞི་བཅས་མིང་སྲིང་བརྒྱད་ཡོད་འདུག ཁོང་ཆུང་ཆུང་སྐབས་ནས་རྔ་པ་ཀིརྟི་དགོན་པར་ཆོས་ཞུགས་བྱས་ཏེ། དེང་སྐབས་འཛིན་གྲྭ་མཛོད་ལོ་རིམ་གཉིས་པ་ཡིན་པ་དང་། རྒྱུན་དུ་གཉོམ་ཆུང་ཚུལ་མཐུན་བྱས་ཏེ་ཚོགས་ཆོས་ར་དང་། དཔེ་ཁྲིད་སོགས་ལ་ཆགས་མེད་ཀྱིས་ཕེབས་མཁན་ཞིག་ཡིན་འདུག་ལ། ལྷག་པར་དུ་ཀུན་སྤྱོད་ཀྱི་ཐད་ནས་གཞན་གྱི་མིག་དཔེར་འོས་པ་ཞིག་ཡིན་འདུག །
