ཨ་མ་ཁྱེད་བདེ་མོ།
ཉི་ཟླ་འཆར་ནུབ་ཀྱི་ཁྲོད་ནས།།
རེ་འདུན་མཆོག་གསུམ་ལ་བཅོལ་བཞིན།།
དྲན་གདུང་རུམ་ཁ་རུ་སྒོམ་པའི།།
ཨ་མ་བདེ་བོ་རང་ཨེ་ཡིན།།
ཞོགས་པའི་སྐྱ་རེངས་དང་འགྲོགས་ནས།།
འབྲོག་ལས་ཙག་ཙིག་ལ་རོལ་བའི།།
རྒྱང་རིང་དྲིན་ཆེན་གྱི་མ་ལོ།།
སྐུ་གཟུགས་བདེ་ཐང་རང་ཨེ་ཡིན།།
མཚན་མོའི་ཟླ་བ་ལ་བཞོན་ནས།།
དཀའ་སྡུག་ཁྱིམ་ལས་ལ་ཐོམ་པའི།།
བྱམས་ལྡན་དྲིན་ཆེན་གྱི་ཨ་མ།།
སྐུ་ཁམས་བདེ་བོར་ངང་ཨེ་ཡོད།།
དཔྱིད་ཀྱི་རྒྱལ་མོ་ལ་འགྲོགས་ཤིང་།།
རྩྭ་ཐང་གྱོན་ཆས་སུ་ཀླུབས་པའི།།
འཚོ་བ་འབྲོག་ཐང་ན་བཅོལ་བའི།།
དྲིན་ཆེན་མ་ལོ་ཁྱེད་བདེ་བོ།།
འདུས་བྲལ་ཆོས་ཉིད་ཀྱི་ཀློང་ནས།།
ཡུན་རིང་བུ་ཕྲུག་དང་བྲལ་བའི།།
སྤྱན་ཟུང་མཆི་མ་ཡིས་བརླན་པའི།།
ཨ་མ་དྲིན་ཆེན་ཁྱེད་བདེ་མོ།།
གངས་རིའི་འདབ་རོལ་ན་ཆས་པའི།།
ས་མཐར་ཁེར་འགྲོ་བའི་བུ་མོ།།
ཨ་མའི་སྨོན་ལམ་གྱིས་བཅིངས་པས།།
ལུས་ཁམས་བདེ་ཐང་རང་ཡིན་ལགས།།
དྲན་གདུང་སེམས་ཁ་ན་ལྕི་ཞིང་།།
ལོག་འདོད་ཞེ་ཁ་ན་རྒོད་པའི།།
བས་མཐའི་འཇིག་རྟེན་དེ་ཉུལ་བའི།།
བུ་མོ་བདེ་བོ་རང་ཡིན་ལགས།།
བུད་མེད་སྒེར་ལངས་ཉིན་མོ་ཐེངས་ང་བཞི་པ་སྲུང་རྩིས་ཞུས་རྗེས།སྒྱུ་མ་ལྷ་མཛེས་ཁང་ཁྱིམ་གྱི་ཡང་ཐོག་ནས་ཤར་མར་སྦྱར་ཁུལ་བྱས།དྲ་གྲོགས་ལྷན་རྒྱས་ཚོས་ལམ་སྟོན་དང་སྐུལ་བ་ཡོད་པ་མཁྱེན།