མི་ཡུལ་ས་མཐས་སྤྲད་པའི་བག་ཆགས་ཤིག །
མི་ཡུལ་ས་མཐས་སྤྲད་པའི་བག་ཆགས་ཤིག།།
ཆ་རྒྱུས་མེད་པའི་ལམ་ཕྲན་རེ་རེའི་ཐོག
རེ་དོགས་དང་སོམ་ཉི་ཡི་ཀློང་ནས་གོམ་འགྲོས་བྱེད་སྐབས།
ཆེས་འབྲེལ་འདྲིས་ཟབ་པའི་ས་ཆ་སྟེ།
ཕ་ཡུལ་གྱི་ཡངས་ཤིང་རྒྱ་ཆེ་བའི་རྩྭཐང་དེ།
འདྲེན་བྱེད་ཀྱི་ཡུལ་ལས་ནམ་ཡང་མ་འདས།
བཤིབས་འདྲིས་མེད་ལ།
དགྲ་གཉེན་གྱི་འབྲེལ་ལམ་མེད་པའི་སྐྱེ་བོ་དུ་མ་ཞིག་གིས།
སྣང་མེད་ངང་བསུན་གཙེས་ཀྱིས་མནར་གཅོད་གཏོང་སྐབས།
གོ་མེད་ཚོར་མེད་དུ་འདུག་ཐབས་བྲལ་ཞིང་།
དེ་བས་ཡ་ལན་སློག་མི་འདོད་པ་ནི།
ས་མཐའ་ནས་ཐོབ་པའི་བག་ཆགས་ཤིག་རེད།
དེའི་ཕྱིར་ན་ནམ་ཡང་།
དགྲ་གཉེན་གྱི་དབྱེ་མཚམས་མ་ངེས་པའི་སྤྱི་ཚོགས་འདི་ནས་གྲོལ་ཏེ།
དལ་ལྷོད་བག་ཡངས་ཀྱི་འཚོ་བ་ཞིག་ལ་རོལ་འདོད་ཀྱིས།
ང་རྒྱང་རིང་གི་གནས་དབེན་པ་ཞིག་ལ་འགྲོ་ན་འདོད།
༢༠༡༣ ༤ ༢༣ ཉིན་བྲིས།