མི་ལ་ལས་ཆོས་ཀྱི་དགོས་མཁོ་དེ་ཙམ་མཐོང་གི་མེད།

ང་ཚོས་ལུས་ལ་འཕྲོད་བསྟེན་དགོས་རྒྱུ་གལ་ཆེ་ཡིན་པ་ཡོངས་གྲགས་ཐོག་ངོས་འཛིན་བྱེད་བཞིན་ཡོད། ད་ཆ་ང་ཚོས་དེའི་སྟེང་ནང་གི་བསམ་བློར་འཕྲོད་བསྟེན་གལ་ཆེ་ཡིན་པ་ངོས་འཛིན་བྱེད་དགོས་ཞེས་༧གོང་ས་མཆོག་གིས་ནིའུ་ཛེ་ལེན་ཌར་གསུངས་ཡོད་པ་རེད།

དེ་ཡང་ཟླ་འདིའི་ཕྱི་ཚེས་༨ ཉིན་༧གོང་ས་མཆོག་ནིའུ་ཛི་ལེན་ཌིའི་ཁི་རི་སི་ཆར་ཆི་(Christchurch)ཞེས་པའི་གྲོང་ཁྱེར་འཁོད་དེ། བསམ་བློའི་གོ་རྟོགས་སྤེལ་མཁན་གྱི་དུས་དེབ་MindFood magazine ཞེས་པའི་གསར་འགོད་པ་ལྕམ་མཱ་རི་མེཀ་ཀུ་ལུ་སི་ཀི་ Maari McCluskey ལགས་ཀྱི་དྲི་བར་ལན་འདེབས་གནང་སྐབས།

༧གོང་ས་མཆོག་གིས་ཕྱི་དངོས་པོའི་ཡར་རྒྱས་ཁོ་ནས་ནང་སེམས་ལ་ཞི་བདེ་སྐྲུན་མི་ཐུབ། དེར་བརྟེན་ནང་གི་བསམ་བློར་དོ་སྣང་བྱེད་མཁན་ཇེ་མང་དུའགྲོ་བཞིན་ཡོད་པ་མ་ཟད། དེ་དང་འབྲེལ་ནས་ཆོས་ལ་དོ་སྣང་བྱེད་བཞིན་ཇེ་མང་དུ་འགྲོ་བཞིན་ཡོད། དེ་ལྟར་ནའང་མི་ལ་ལས་ཆོས་ཀྱི་དགོས་མཁོ་དེ་ཙམ་མཐོང་གི་མེད།  ང་ཚོའི་བློ་ལ་རྣམ་རྟོག་གི་ཆ་མང་པོ་ཡོད། རྣམ་རྟོག་གི་བྱེད་ལས་དེ་དག་ང་ཚོས་ཇི་ཙམ་གསལ་རྟོགས་ཐུབ་པ་ཡིན་ན་དེའི་ཚོད་ཀྱིས་རྣམ་རྟོག་དེ་དག་སེམས་ནང་འཆར་སྐབས་མགོ་གནོན་བྱེད་རྒྱུ་ལས་སླ་བ་ཡོད། ང་ཚོས་ལུས་ལ་འཕྲོད་བསྟེན་དགོས་རྒྱུ་གལ་ཆེ་ཡིན་པ་ཡོངས་གྲགས་ཐོག་ངོས་འཛིན་བྱེད་བཞིན་ཡོད། ད་ཆ་ང་ཚོས་དེའི་སྟེང་ནང་གི་བསམ་བློར་འཕྲོད་བསྟེན་གལ་ཆེ་ཡིན་པ་ངོས་འཛིན་བྱེད་དགོས། ཆུང་བྱིས་པའི་དུས་སུ་ང་ཚོའི་བསམ་བློའི་ནང་གཞན་ལ་ཡིད་ཆེས་དང་བྱམས་བརྩེའི་བསམ་བློའི་བག་ཆགས་ཧ་ཅང་གསལ་པོ་ཡོད། འོན་ཀྱང་རིམ་བཞིན་འགྲན་རྩོད་ཀྱི་ཁོར་ཡུག་ནང་འཚར་ལོངས་བྱུང་རྐྱེན་ང་ཚོས་རིན་ཐང་དེ་དག་སྣང་མེད་དུ་གཏོང་བཞིན་ཡོད།  སྤྱིར་ང་ཚོ་སྐྱེས་མ་ཐག་པ་ནས་མའི་བྱམས་སྐྱོང་འོག་འཚོ་བར་བརྟེན། མི་གཞན་ལ་བྱམས་བརྩེ་ལག་བསྟར་བྱ་རྒྱུའི་བག་ཆགས་གཏིང་ཟབ་ཡོད། མིའི་བསམ་བློའི་རྣམ་རྟོག་གི་ཆ་ནས་བཤད་ན་སངས་རྒྱས་བཅོམ་ལྡན་འདས་འཇིག་རྟེན་དུ་བྱོན་པའི་སྐབས་དང་ད་ལྟའི་མི་གཉིས་དབར་དེ་ཙམ་ཁྱད་པར་མེད། འོན་ཀྱང་དེང་སྐབས་ནང་ཤེས་པའི་རྣམ་གཞག་ལ་དོ་སྣང་བྱེད་མཁན་ཇེ་མང་དུ་འགྲོ་བཞིན་པ་དེ་ནི་ཡར་རྒྱས་ཀྱི་རྣམ་པ་རེདཅེས་གནང་ཡོད་པ་རེད།

དེ་བཞིན་༧གོང་ས་མཆོག་ཀེན་ཊར་བྷུ་རིའི་ཚོགས་ཁང་དུ་ CBS Canterbury Arena ཆིབས་སྒྱུར་བསྐྱངས་སྐབས་ནིའུ་ཛི་ལེན་ཌིའི་གདོད་མའི་མི་རིགས་མོ་རི་ Maori ཞེས་པའི་སྲོལ་རྒྱུན་གྱི་ལམ་ནས་ཕེབས་བསུ་ཞུས་པ་མ་ཟད། ཚོགས་ཁང་ནང་མི་གྲངས་༢༣༠༠ བརྒལ་བ་ཚང་མས་ཕེབས་བསུ་ཟབ་རྒྱས་ཞུས་ཡོད། དེ་རྗེས་༧གོང་ས་མཆོག་གིས་བདེན་བཞིའི་ཆོས་འབྲེལ་གྱི་སྔོན་དུ་མི་མང་ལ་གསུང་བཤད་གནང་དོན།

ཆོས་གྲོགས་ཕོ་མོ་ཚང་མར་འཚམས་འདྲི་ཡོད། ང་ཚོ་ཚང་མ་ལུས་སེམས་དང། སེམས་ཚོར་གང་གི་ཆ་ནས་འགྲོ་བ་མིའི་རིགས་ཡིན་པ་གཅིག་མཚུངས་ཆགས་ཡོད། དེར་བརྟེན་ངོས་ཀྱིས་ཐོག་མར་ཆོས་གྲོགས་ཕོ་མོ་ཚོ་ཞེས་འགོ་འཛུགས་བྱེད་བཞིན་ཡོད། སྤྱིར་ནང་ཆོས་ནི་ཤར་ཕྱོགས་ནས་དར་བའི་ཆོས་ཤིག་ཡིན། ས་ཆའི་ཆགས་བབ་ཀྱི་ཐོག་ནས་བརྗོད་ན་ནིའུ་ཛི་ལེན་ཌི་འདི་ཡང་ཤར་ཕྱོགས་པ་ཡིན། འོན་ཀྱང་རིག་གཞུང་དེ་དག་ནུབ་ཕྱོགས་ནས་དཔེ་བླངས་ཡོད། གདོད་མའི་སྤྱི་ཚོགས་སྐབས་ཕྱིར་འབྲེལ་བ་བྱ་རྒྱུའི་མཐུན་རྐྱེན་ཡར་རྒྱས་ཕྱིན་མེད་པར་བརྟེན། སྤྱི་ཚོགས་གཅིག་གི་སྤྱི་ཚོགས་གཞན་དང་འབྲེལ་བ་བྱ་རྒྱུ་ཧ་ཅང་དཀོན་པོ་ཡིན། འོན་ཀྱང་དེང་སྐབས་གནས་སྟངས་ཡོངས་རྫོགས་ཡར་རྒྱས་ཕྱིན་ཡོད། དེང་སྐབས་འཛམ་གླིང་ནང་ཆོས་ལུགས་དང་རིག་གཞུང་འདྲ་མིན་མཉམ་གནས་བྱེད་པའི་སྤྱི་ ཚོགས་ཤིག་ཆགས་ཡོད། སྤྱིར་བཏང་རིག་གཞུང་གི་ཐོག་ནས་བརྗོད་ན་ནང་ཆོས་དེ་ནུབ་ཕྱོགས་པའི་ཆོས་ལུགས་ཤིག་མིན། འོན་ཀྱང་དེང་སྐབས་ནུབ་ཕྱོགས་སུ་ནང་ཆོས་ལྟ་གྲུབ་ལ་དོ་སྣང་བྱེད་མཁན་བྱེད་ཤུགས་ཆེ་རུ་འགྲོ་བཞིན་ཡོད་ཅེས་སོགས་ཀྱི་བཀའ་སློབ་གནང་ཡོད་པ་རེད།

ཕྱི་ཚེས་༡༡ ཉིན་༧གོང་ས་མཆོག་གིས་ནིའུ་ཛི་ལེན་ཌིའི་དྷུ་ནི་ཌིན་ Dunedin གྲོང་ཁྱེར་ནང་མང་ཚོགས་ལ་ཆོས་ལུགས་ཀྱི་རྒྱ་ལས་བརྒལ་བའི་འཇིག་རྟེན་ཀུན་ལ་སྨན་པའི་བཟང་སྤྱོད་ཅེས་པའི་བརྗོད་གཞིའི་ཐོག་བཀའ་སློབ་སྩལ་རྒྱུ་དང་། ཕྱི་ཚེས་༡༢ ཉིན་ནིའུ་ཛི་ལེན་ཌིའི་ཨོཀ་ལེན་ཌི་ Auckland གྲོང་ཁྱེར་ནང་བདེ་སྐྱིད་ཀྱི་ལམ་བུ་ཞེས་པའི་བརྗོད་གཞིའི་ཐོག་མང་ཚོགས་ལ་བཀའ་སློབ་སྩལ་རྒྱུ་ཡིན་འདུག

དེ་བཞིན་ཕྱི་ཟླ་༦ ཚེས་༡༤ ནས་༡༦ བར་ཉིན་གྲངས་གཉིས་དང་ཕྱེད་རིང་ཨོ་སི་ཊོ་ལི་ཡའི་གྲོང་ཁྱེར་སི་ཌི་ནིའི་སྤྲོ སྐྱིད་ཁང་དུ་༧གོང་ས་མཆོག་གིས་ཁུ་ནུ་བླ་མ་རིན་པོ་ཆེ་བསྟན་འཛིན་རྒྱལ་མཚན་གྱིས་མཛད་པའི་བྱང་ཆུབ་སེམས་བསྟོད་ཀྱི་ཆོས་འབྲེལ་གནང་རྒྱུ་ཡིན་འདུག་ལ། ཕྱི་ཚེས་༡༦ཉིན་རྒྱུན་གཏན་མི་ཚེའི་ནང་ཚུལ་ཁྲིམས་ཐོག་དྲན་ཤེས་ཇི་ལྟར་བསྟེན་དགོས་པའི་བརྗོད་གཞིའི་ཐོག་བཀའ་སློབ་གནང་རྒྱུ་དང་། ཕྱི་ཚེས་༡༨ ཉིན་རྒྱབ་ཨོ་སི་ཀྲོ་ལི་ཡའི་གྲོང་ཁྱེར་མེལ་བྷོན་འདུ་འཛོམས་ལྟེ་གནས་སུ་སྙིང་རྗེ་དང་གཞི་རྩའི་བདེ་ཐབས་ཞེས་པའི་བརྗོད་གཞིའི་ཐོག་མང་ཚོགས་སུ་བཀའ་སློབ་གནང་རྒྱུ་ཡིན་འདུག

ཕྱི་ཚེས་ ༢༡ ཉིན་གྱི་ཕྱེད་ཡོལ་ཨོ་སི་ཊོ་ལི་ཡའི་གྲོང་ཁྱེར་ཨ་དྷི་ལ་དྷི་འདུ་འཛོམས་ལྟེ་ གནས་སུ༸གོང་ས་མཆོག་ནས་བདེ་སྐྱིད་འཚོལ་བ། ཞེས་པའི་བརྗོད་གཞིའི་ཐོག་མང་ཚོགས་ལ་བཀའ་སློབ་གནང་རྒྱུ་དང་། ཕྱི་ཚེས་༢༣ ཉིན་རྒྱབ་ཨོ་སི་ཊོ་ལི་ཡའི་གྲོང་ཁྱེར་དྷར་ཝིན་ཀོན་ཝེན་ཤན་ཚོགས་ཁང་ The Adelaide Convention Center སུ་འཕགས་པའི་བདེན་པ་བཞིའི་ཆོས་འབྲེལ་གནང་རྒྱུ་ཡིན་པ་རེད།

དེ་བཞིན་ཕྱི་ཚེས་༢༣ ཉིན་ཨོ་སི་ཊོ་ལི་ཡའི་གྲོང་ཁྱེར་དྷར་ཝིན་ཀོན་ཝེན་ཤན་ཚོགས་ཁང་མཉམ་སྤྱོད་འཛམ་གླིང་ནང་ཚུལ་ཁྲིམས་ཞེས་པའི་བརྗོད་གཞིའི་ཐོག་བཀའ་སློབ་བཀའ་གནང་གཏན་ཁེལ་ཡོད་པ་རེད།