ཨོ་བྷ་མ་དང་ྋགོང་ས་མཆོག་མཇལ་འཕྲད་གནང་འཆར།

 ཡང་སྲིད་འཛིན་ཨོ་བྷ་མས་ྋགོང་ས་མཆོག་མཇལ་འཕྲད་ཞུ་རྒྱུ་དེ་གཞུང་འབྲེལ་དང་ཡང་ན་སྒེར་ངོས་གཉིས་ཀྱི་ཐོག་ནས་གནང་སྲིད་པ་རེད་ཅེས་དང༌། དཔེར་ན། ༢༠༠༧ ལོའི་ཨ་རིའི་སྲིད་འཛིན་བྷུ་ཤུ་མཆོག་གིས་ཕོ་བྲང་དཀར་པོའི་གཟིམ་ཤག་ནང་ྋགོང་ས་མཆོག་དང་མཇལ་འཕྲད་ཞུ་མྱོང་བ་དང་གཅིག་མཚུངས་རེད་ཅེས་བརྗོད་ཡོད་པ་རེད།
    ྋགོང་ས་མཆོག་ཨ་རིར་བཞུགས་རིང་བོད་ཀྱི་རིག་གཞུང་དང་སྒྱུ་རྩལ་བདག་གཉེར་ཁང་གི་གོ་སྒྲིག་འོག་ནས། བསམ་བློ་དང་མི་ཚེའི་སྐོར་ཟེར་བ་དང། བསམ་བློར་སྒྱུར་བཅོས་བཏང་ནས་དེང་རབས་ཀྱི་འཛམ་གླིང་ནང་ཡང་དག་གི་བློ་གྲོས་གཉེར་ཐབས་བྱེད་དགོས་ཟེར་བའི་བརྗོད་གཞིའི་ཐོག་གསུང་བཤད་གནང་རྒྱུ་ཡིན་པ་རེད།
    རྒྱ་ནག་གཞུང་ངོས་ནས་ཨ་རིའི་གཞུང་ལ་ྋགོང་ས་མཆོག་གིས་ས་ཁུལ་ཁ་བྲལ་གྱི་ལས་འགུལ་སྤེལ་བས། ཨ་རིའི་ཡུལ་དུ་གདན་འདྲེན་ཞུ་མི་ཆོག་པ་དང་གལ་ཏེ་ཞུས་ན་ཕྱོགས་གཉིས་ཀྱི་ཚོང་འབྲེལ་ལ་བར་ཆད་ཡོང་སྲིད་པའི་ཉེན་བརྡ་བཏང་ཡོད་པ་རེད། ཨ་རིའི་གཞུང་ལ་རྒྱ་ནག་དེའང་ཚོང་འབྲེལ་གྱི་ཕྱོགས་ནས་ཧ་ཅང་གལ་ཆེན་ཆགས་ཡོད་པ་དང༌། ཨ་རིའི་སྲིད་འཛིན་རིམ་བརྒྱུད་ཀྱིས་རྒྱ་ནག་ལ་གནོད་སྐྱོན་ཕོག་པའི་ལས་འགུལ་མང་པོ་ཞིག་ལ་འཛེམས་ཟོན་བྱས་དང་བྱེད་བཞིན་ཡོད་པ་རེད།
    ཟླ་འདིའི་ཚེས་༡༨ ཉིན་ཨ་རིའི་རྒྱལ་དོན་དྲུང་ཆེ་རྒྱ་གར་དུ་གཟིགས་སྐོར་ལ་ཕེབས་ཡོད་པ་དང༌། དྲུང་ཆེས་གཏམ་བཤད་གནང་སྐབས། ང་ཚོས་རྒྱ་ནག་གི་འགྲོ་བ་མིའི་ཐོབ་ཐང་གི་སྙན་ཐོ་སྐྱོ་པོ་དེ་རིམ་གྱིས་གུ་ཡངས་ཀྱི་ལངས་ཕྱོགས་སུ་འགྲོ་ཐུབ་ཐབས་དང༌། དཔལ་འབྱོར་གྱི་འབྲེལ་ལམ་དང་གནམ་གཤིས་འགྱུར་ལྡོག་ཕྱོགས་གཉིས་ཀྱི་ཆ་ནས། རྒྱ་ནག་ནི་ཨ་རི་དང་ཁ་བྲལ་ཐབས་མེད་པ་ཞིག་རེད་ཅེས་བརྗོད་ཡོད་པ་རེད།།