སུམ་བཅུའི་འཕྲེང་ཐག་བོད་མིར་སྤྲིངས།
ཅ་ཅོ་རི་ལུང་འཁེང་བ་སྒྲོག་ནུས་ཀྱང་།།
ཆ་རྒྱུས་རང་གི་སེམས་ལ་ཡོད་དུས་སུ།།
ཇ་ཁང་ཉུལ་ནས་ཉི་མ་གཏོང་བ་ལས།།
ཉ་ཆུ་འཚོ་བའི་ལས་དེ་སྲུང་ན་འོས།།
ཏ་ལེན་ཕྲག་པར་འཁུར་བའི་རྒད་པོ་དང་།།
ཐ་སྙད་ཚིག་ལ་བྱང་བའི་ཤེས་ཡོན་པ།།
ད་ལྟའི་དུས་འདིར་མཁོ་བ་རྩོད་གླེང་མིན།།
ན་ནིང་བྱུང་བའི་ལས་ལ་བསམ་གཞིགས་གནོངས།།
པ་སངས་ལྷག་བསམ་བོད་ལ་ཡོད་མཁན་དག།
ཕ་ཡུལ་བོད་དུ་གནས་པའི་སྤུན་ཟླ་ཚོ།།
བ་གླང་གཤིས་ལས་སྡུག་པའི་རྒྱ་གཞུང་འོག།
མ་བུ་གསོན་བྲལ་སྡུག་བསྔལ་ཇེ་ལྕི་རེད།།
ཙ་རི་གནས་ཡུལ་འགྲིམ་ནས་ཕྱི་ལ་འབྱོར།།
ཚ་བའི་ཡུལ་ལུང་མི་ཡུལ་བྱེས་སུ་གནས།།
ཛ་དྲག་དུས་འདིར་རང་རིགས་བདེན་དོན་ཆེད།།
ཝ་མ་ཝོལ་དུ་སྡོད་རྒྱུ་ངོ་གནོངས་རན།།
ཞ་ཞོར་ཟ་བཏུང་འགྲོ་འདུག་གང་ཡིན་ལ།།
ཟ་ཟུར་ཚིག་གི་མདའ་མོ་ནང་ལོག་ཏུ།།
འ་འུར་ཙམ་ལ་བཅོལ་ནས་བེད་སྤྱོད་པ།།
ཡ་རབས་བོད་པའི་ལུགས་ཀྱི་དགྲ་རུ་འཛིན།།
ར་ས་འཕྲུལ་སྣང་འགྲུམ་འགྲིལ་ཁང་དུ་བསྒྱུར།།
ལ་མོའི་རྒྱབ་ཀྱི་རང་གི་གནས་མཆོག་དེ།།
ཤ་ཁྲག་གཅིག་པའི་སྤུན་ཟླའི་སྲུང་བ་དེ།།
ས་མཐའི་ང་ཚོའི་སེམས་སུ་འཇགས་རན་ཡིན།།
ཧ་ཅང་གཅེས་པའི་སྙིང་གཏམ་ཡོད་མེད་དེ།།
ཧ་ཧ་ཟེར་ནས་དགད་མོ་མ་ཤར་གོང་།།
ཨ་རིའི་ཡུལ་ལ་སྨོན་ལམ་འདེབས་པ་ལས།།
ཨ་མའི་བུ་རྒོད་གངས་ཅན་བོད་དོན་སྙོགས།།