རྒྱ་གར་ལྷོ་ཕྱོགས་སུ་གསུམ་དུས་སྲུང་བརྩི།

ཟླ་འདིའི་ཚེས་༩ ཉིན་ནས་རྒྱ་གར་ལྷོ་ཕྱོགས་བོད་མིའི་གཞིགས་ཁག་ལྔ་དང་སྦེང་ལོར་བཅས་ཀྱི་བོད་ཀྱི་གཞོན་ནུ་ལྷན་ཚོགས་དང་མོན་གྷོ་ས་གནས་བུད་མེད་ལྷན་ཚོགས་བཅས་ཀྱིས་གསུམ་དུས་ལས་འགུལ་འགོ་འཛུགས་བྱས་ཡོད་པ་རེད།
ཟླ་འདིའི་ཚེས་༡༠ ཉིན་རྒྱ་གར་ལྷོ་ཕྱོགས་གྲོང་ཁྱེར་སྦེང་ལོར་དུ་བོད་མིའི་རང་དབང་སྒེར་ལངས་གསུམ་བཅུའི་དུས་དྲན་ཐེངས་༥༦ པ་དངོས་གཞི་འཚོགས་པ་དང། གཞུང་འབྲེལ་གྱི་དངོས་གཞིའི་དུས་དྲན་སྲུང་བརྩིའི་ལས་འགུལ་གྱི་མཛད་སྒོ་དེར་སྐུ་མགྲོན་གྱི་གཙོ་བོ་ཀར་ན་ཀྲ་མངའ་སྡེའི་གྲོས་ཚོགས་ལས་དོན་དང་ཁྲིམས་དང་འགྲོ་བ་མིའི་ཐོབ་ཐང་གི་བློན་ཆེན་སྐུ་ཞབས་ཇ་ཡན་ཆན་ཏ་ར་(Sri T.B Jayanchandra) ཡིས་བོད་དོན་དང་འགྲེལ་བའི་གསུང་བཤད་གནང་ཡོད་པ་རེད།
གཞན་ཡང་དུས་དྲན་གྱི་མཛད་སྒོའི་སྐུ་མགྲོན་དུ་གྲོང་ཁྱེར་བྷང་ལོར་དུ་བཅའ་སྡོད་ཏྲར་ཀི་རྒྱལ་ཁབ་ཀྱི་ཚོང་དོན་འགན་འཛིན་སྐུ་ཞབས་མུ་ར་ཏྲེ་དང་།  ཨི་སི་ཏོ་ནི་ཡ་རྒྱལ་ཁབ་ཀྱི་གཞུང་ཚབ་པ་སྐུ་ཞབས་ པི་རི་སྦན་་གྷོན་ཀ་(Praveen Goenka) སོགས་གནད་ཡོད་མི་སྣ་ཁག་དང་བོད་མིའི་སྒྲིག་འཛུགས་ཀྱི་གྲོང་ཁྱེར་སྦེང་ལོར་དུ་བཅའ་སྡོད་ལྷོ་ཕྱོགས་བོད་མིའི་སྤྱི་ཁྱབ་པ་ཀརྨ་སེང་གེ། སེར་སྐྱ་མི་མང་བཅས་མཉམ་ཞུགས་བྱས་ཡོད་པ་རེད།
དེ་རྗེས་མི་མང་གིས་བོད་དོན་དྲི་བསྒྲགས་ཀྱི་ལས་འགུལ་སྤེལ་བ་དང་། དེ་དང་ཕྱོགས་མཚུངས་རྒྱ་གར་ལྷོ་ཕྱོགས་སྦེལ་ཀོབ་ཏུ་ཡོད་པའི་ས་གནས་དབུ་མའི་ལམ་མི་མང་ལས་འགུལ་ཁང་གི་གོ་སྒྲིག་འོག མེ་སོར་གྲོང་ཁྱེར་དུ་ཡང་སེར་སྐྱ་མི་མང་དང་སློབ་ཕྲུག་བཅས་ཀྱིས་ཞི་བའི་གོམ་བགྲོད་ཀྱི་ལས་འགུལ་སྤེལ་ཡོད་པ་རེད། །
ས་གནས་ནས་དོན་གྲུབ་བཀྲ་ཤིས་ཀྱིས།