རྒྱ་གཞུང་གིས་པཎ་ཆེན་རྫུན་མར་གོ་གནས་སྤྲད་པ།
ཚོགས་འདུ་དེར་ཀྲུང་དབྱང་འཐབ་ཕྱོགས་གཅིག་གྱུར་ཁང་གི་རྒྱུན་ལས་ཚོགས་གཙོ་གཞོན་པ་ཀྲུང་ཝེ་ཆོན་དང། རྒྱལ་ཡོངས་སྲིད་གྲོས་ཀྱི་ཚོགས་གཙོ་གཞོན་པ་ལྷག་པ་ཕུན་ཚོགས་དང། རྒྱ་ནག་ཏའོ་ཅའོ་ཆོས་ལུགས་མཐུན་ཚོགས་ཀྱི་ཚོགས་གཙོ་རེན་ཧྥ་རུང་། རྒྱ་ནག་ཁ་ཆེའི་ཆོས་ལུགས་མཐུན་ཚོགས་ཀྱི་ཚོགས་གཙོ་ཁྲེང་ཀོང་ཡོན། རྒྱ་ནག་གི་ཡེ་ཤུའི་གནམ་བདག་ཆོས་ལུགས་རྒྱལ་གཅེས་མཐུན་ཚོགས་ཀྱི་ཚོགས་གཙོ་གཞོན་པ་ལིའུ་པའོ་ཉན་དང་རྒྱ་ནག་གི་ཡེ་ཤུ་ཆོས་ལུགས་མཐུན་ཚོགས་ཀྱི་ཚོགས་གཙོ་གཞོན་པ་ཐང་ཝེ་མེན་བཅས་གྲོས་ཚོགས་དེར་ཞུགས་ཡོད་འདུག
ཚོགས་འདུ་དེའི་སྐབས་སུ་ཀྲུང་གོའི་ནང་བསྟན་མཐུན་ཚོགས་ཀྱི་ཚོགས་གཙོ་གཞོན་པ་འཇམ་དབྱངས་བློ་བཟང་འཇིགས་མེད་ཐུབ་བསྟན་ཆོས་ཀྱི་ཉི་མ་སྤྲུལ་སྐུས་གཙོ་སྐྱོང་དང། ཀྲུང་གོའི་ནང་བསྟན་མཐུན་ཚོགས་ཀྱི་ཚོགས་གཙོ་གཞོན་པ་དང་ཆོས་དཔོན་ཧྲིན་ཧའེ་ཡིས་གྲོས་ཚོགས་འགོ་ཚུགས་པའི་ཤིས་ཚིག་ཕུལ་བ་དང། ཀྲུང་གོའི་ནང་བསྟན་མཐུན་ཚོགས་ཀྱི་ཚོགས་གཙོ་གཞོན་པ་དང་ཆོས་དཔོན་ཞའོ་ཁྲེང་གིས་ཀྲུང་གོའི་ནང་བསྟན་མཐུན་ཚོགས་སྐབས་བདུན་པའི་རྒྱུན་ལས་ཚོགས་པའི་ཚབ་བྱས་ནས་ལས་དོན་སྙན་ཞུ་ཕུལ་གནང་ཞིང་། ཀྲུང་གོའི་ནང་བསྟན་མཐུན་ཚོགས་ཀྱི་ཚོགས་གཙོ་གཞོན་པ་དང་དགེ་བསྙེན་ཏའོ་ཧྲུའུ་ཡིས་《ཀྲུང་གོའི་ནང་བསྟན་མཐུན་ཚོགས་ཀྱི་སྒྲིག་རིམ》ཞེས་པ་ལེགས་བཅོས་བྱས་པའི་སྐོར་གསལ་བཤད་བྱས་འདུག 
མཇུག་བསྡོམས་ཚོགས་འདུའི་ཐོག རྒྱ་གཞུང་གིས་མིང་བཏགས་པའི་པཎ་ཆེན་གྱིས་བཤད་དོན། ངས་ཚང་མས་ང་ལ་བཅངས་པའི་ཡིད་ཆེས་དེ་སྟོང་ཟད་དུ་རྩ་བ་ནས་མི་གཏོང་བ་དང་། མེས་རྒྱལ་གྱི་གཅིག་གྱུར་དང་། མི་རིགས་ཀྱི་མཐུན་སྒྲིལ། ནང་བསྟན་དར་སྤེལ། འཛམ་གླིང་ཞི་བདེ་བཅས་ཡོང་བར་རང་གི་ནུས་ཤུགས་ཡོད་རྒུ་འབུལ་རྒྱུ་ཡིན་ཞེས་དང་། ཆོས་དད་རང་དབང་ནི་ཏང་ཀྲུང་དབྱང་གི་ཐོག་མཐའ་བར་གསུམ་དུ་འགྱུར་བ་མེད་པའི་ཆོས་ལུགས་སྲིད་ཇུས་ཡིན་པས། ངེས་པར་དུ་སྲིད་ཇུས་ཡང་དག་པའི་ལམ་སྟོན་དུ་གྱུར་པའི་རྨང་གཞི་དེ་ནན་གྱིས་འཛིན་དགོས་ཞེས་དང།
མུ་མཐུད་བཤད་དོན། ཆབ་སྲིད་བསམ་བློའི་ཕྱོགས་ནས། ཀྲུང་གོའི་གུང་ཁྲན་ཏང་གི་འགོ་ཁྲིད་ལ་བརྩི་སྲུང་ཞུ་དགོས་ཤིང་། སྤྱི་ཚོགས་རིང་ལུགས་རྒྱུན་འཁྱོངས། མེས་རྒྱལ་གཅིག་གྱུར་ལ་སྲུང་སྐྱོབ། མི་རིགས་མཐུན་སྒྲིལ་ལ་ཤུགས་སྣོན་བཅས་དང་། རྒྱལ་གཅེས་ཁྲིམས་བརྩི་དང་། ཆོས་གཅེས་སྡོམ་སྲུང་བཅས་རྨང་གཞིར་བྱས་ཏེ། རིམ་བཞིན་ནང་བསྟན་ཕན་ཚུན་བརྗེ་རེས་བྱེད་རྒྱ་ཇེ་ཆེར་གཏོང་བ་དང་། ཧུར་ཐག་གིས་སྤྱི་ཚོགས་ཀྱི་དགེ་ཕན་བྱ་བཞག་ལ་ཞུགས་པ། འཆམ་མཐུན་གྱི་སྤྱི་ཚོགས་འཛུགས་སྐྲུན་བྱེད་པ་བཅས་ཀྱི་ཐད་ང་ཚོ་ནང་བསྟན་ལས་རིགས་ལ་ཡོད་འོས་པའི་བྱེད་ནུས་འདོན་སྤེལ་བྱེད་དགོས་ཞེས་དང། སྤྱི་ཚོགས་རིང་ལུགས་ཀྱི་ཆ་རྐྱེན་འོག་དགོན་སྡེའི་དོ་དམ་ལས་དོན་འཐུས་ཚང་དུ་གཏོང་དགོས་པ་དང་། དམངས་གཙོའི་དོ་དམ་དང་ལམ་ལུགས་འཛུགས་སྐྲུན། རིག་དངོས་སྲུང་སྐྱོབ། དཔལ་འབྱོར་དོ་དམ་བཅས་ཀྱི་ཕྱོགས་ལ་ཅུང་འཐུས་ཚང་དང་དུས་རབས་དང་འཚམ་པའི་ཐབས་ལམ་ཞིག་འཚོལ་ཞིབ་བྱེད་དགོས་ཞེས་གཏམ་བཤད་བྱས་འདུག
ད་དུང་ཚོགས་འདུ་དེར་གདན་འདྲེན་བྱས་པའི་ཀྲུང་གོའི་ནང་བསྟན་ལས་རིགས་ཞེས་པའི་རྒྱའི་སྐད་ཡིག་སྡེ་ཁག་དང་བོད་ཀྱི་སྐད་ཡིག་སྡེ་ཁག པ་ལིའི་སྐད་ཡིག་སྡེ་ཁག་བཅས་ཀྱི་འཐུས་མི་༦༠༠ ལྷག་གྲོས་ཚོགས་སུ་ཞུགས་པ་དེ་དག་ནི་རྒྱལ་ཡོངས་ཀྱི་ཞིང་ཆེན་དང་རང་སྐྱོང་ལྗོངས། ཐད་གཏོགས་གྲོང་ཁྱེར༣༡ ནས་ཡོང་བ་ཡིན་ཞིང་། དེའི་ནང་དུ་གྲངས་ཉུང་མི་རིགས་ཀྱི་འཐུས་མི༡༤༣ ཡོད་པ་དང་། བུད་མེད་ཀྱི་འཐུས་མི༥༧ ཡོད་ཚུལ་བོད་ལྗོངས་ཆ་འཕྲིན་ལྟེ་གནས་དྲ་བས་གནས་ཚུལ་སྤེལ་འདུག
རྒྱ་གཞུང་གིས་སྔར་ནས་ད་བར་བོད་པའི་མི་ཆེན་དང་བླ་ཆེན་མང་པོར་གོ་ས་མཐོ་བའི་མིང་སྐམ་པོ་ཞིག་བཏགས་ནས། བེད་སྤྱོད་རབ་དང་རིམ་པར་བཏང་ཡོད་ལ། མུ་མཐུད་པཎ་ཆེན་རྫུན་མ་ལ་གོ་གནས་མཐོ་བའི་མིང་སྐམ་པོ་ཞིག་བཏགས་ནས་བོད་མི་རིགས་ཀྱི་བསམ་བློ་ལོག་པར་འཁྲིད་པའི་གོམ་པ་གསར་པ་ཞིག་སྤོས་ཡོད། ༧གོང་ས་༧སྐྱབས་མགོན་ཆེན་པོས་བརྟག་དཔྱད་རིམ་པར་གནང་ནས་ངོས་འཛིན་གནང་བའི་པཎ་ཆེན་སྐུ་ཕྲེང་བཅུ་གཅིག་པ་ཕྲུ་གུའི་དུས་ནས་རྒྱ་གཞུང་གིས་བཙོན་དུ་བཅུག་ནས་ད་སྐབས་འདས་གསོན་གང་ཡིན་ཧ་མི་གོ་བའི་གནས་སུ་བསྐྱལ་ཡོད་པ་འདིས། བོད་མི་རིགས་ཀྱི་སྙིང་ལ་ནམ་ཡང་འཇགས་ཐབས་མེད་པའི་ན་ཟུག་ཅིག་བསྐྲུན་ཡོད་པས། པཎ་ཆེན་རྫུན་མར་གོ་གནས་དང་མཐོང་ཆེན་ཇི་ལྟར་བྱས་ཀྱང། བོད་མི་རྣམས་ཀྱིས་སྙིང་ཁོངས་རུས་པའི་གཏིང་ནས་ཁས་ལེན་བྱེད་ཐབས་མེད་པ་ཞིག་ཆགས་ཚར་བ་རྒྱ་གཞུང་གིས་ཤེས་དགོས་པར་གྱུར་ཡོད།།
