རྒད་པོ་འདི། སྨུག་མདོག་གི་རྒད་པོ་འདི། ཕལ་ཆེར་མཚམས་སྡོད་ཀྱིས་དབུ་སྐྲ་ལྷག་ཏུ་རིང་བའི་རྒད་པོ་འདི། གཏིང་ནས་ཉམས་ལེན་ལ་འཐིམས་པའི་རྒད་པོ་འདི་ངས་སུ་ཡིན་མིན་མི་ཤེས། ངས་ཁོང་གི་མིང་དང་ཁོང་འཚོ་མྱོང་བའི་ལོ་རབས། ཁོང་སྐྱེས་སའི་ས་ཆ་གང་ཡིན་མི་ཤེས་མོད། ངས་བསམས་ན། ཕལ་ཆེར། ཨོ། མ་རེད། ང་ཁོང་དང་འབྲེལ་བ་རབ་རིབ་སབ་སིབ་ཅིག་ཡོད་ངེས་ཅན་རེད། དེ་མིན་ན་ང་ཅིའི་ཕྱིར་ཁོང་གིས་སེམས་འགུལ་ཐེབས་སུ་བཅུག་པ་རེད་དམ། དེ་མིན་ན་ངས་ཅིའི་ཕྱིར་ཁོང་ལ་སེམས་གཏིང་ནས་གུས་ཕྱག་འཚལ་འདོད་སྐྱེས་པ་རེད་དམ།
འདི་ལྟ་བུའི་ཚོར་བ་ངས<<གཟི-བོད་མིའི་གཏམ་རྒྱུད།>>་ཅེས་པའི་དེབ་དེ་ཀློག་དུས་ཀྱང་ཡོད་མྱོང་། ཟིན་ཐོར་བཀོད་ཡོད་པའི་ཀརྨ་བསམ་འགྲུབ་ཀྱི་སྤོ་བོ་ལགས་ཀྱི་སྐོར་ཀློག་དུས་ཀྱང་། ང་ལ་འདི་ལྟའི་བརྗེད་དཀའ་བའི་མྱོང་ཚོར་ཡོད་མྱོང་། དེབ་དེའི་ནང་གི་དུམ་མཚམས་ཤིག་འདི་དགོད་རྒྱུར། ༡༽
གཤམ་གསལ་བླ་མ་འདིའི་ངོ་སྤྲོད་མདོར་བསྡུས་ཤིག་ཁ་བརྡ་དྲ་ཐོག་ནས་ཕབ་བཤུས་བྱས།
འཇམ་དཔལ་རྣོན་པོ་ནས།
འོད་ཟེར་ལགས་ཀྱིས་མཁན་ཆེན་ཆོས་དབྱིངས་ཁྱབ་བརྡལ་གྱི་སྐུ་པར་མཇལ་བའི་མོད་ལ་དད་པ་དང་མོས་གུས་དེ་ཙམ་སྐྱེས་པ་ནི་སྔོན་རྗེ་བཙུན་མི་ལ་རས་པས་སྒྲ་སྒྱུར་མར་པ་ལོ་ཙཱའི་མཚན་ཐོས་པ་ཙམ་གྱིས་སེམས་ལ་སྨྲ་མི་ཤེས་པའི་དགའ་བ་དང་། ལུས་ལ་བ་སྤུ་ཀུན་གཡོ་བའི་བདེ་བ། མཆི་མ་འཁྲུགས་པའི་མོས་གུས་ཚད་མེད་པ་ཞིག་འཁྲུངས་པར་གསུངས་དང་འདྲ་བས། ཚེ་རབས་སྔོན་མ་ནས་ལས་འབྲེལ་ཡོད་པའི་འབྲས་རྟགས་ཤིག་ཏུ་གོར་མ་ཆག་གོ
མཁན་ཆེན་ཆོས་དབྱིངས་ཁྱབ་བརྡལ།
མཁན་ཆེན་ཆོས་དབྱིངས་ཁྱབ་བརྡལ་མཆོག་ནི་སྤྱི་ལོ་ ༡༩༢༠ བོད་རབ་བྱུང་བཅོ་ལྔ་པའི་དྲག་པོ་ཞེས་པ་ལྕགས་སྤྲེལ་ལོ་སྙི་གསེར་གཉིས་ཀྱི་ས་ཚིགས་དང་ཉེ་བའི་སྙིའི་ལུང་ཕྲན་ལྗགས་ཁོག་ཞེས་པ་དེང་སང་གསེར་རྟ་རྫོང་ཧོར་ཤུལ་ཤང་ལྗགས་ཐལ་མའི་ས་ཆ་ལྗགས་ལག་རྡོ་ཀླས་སུ་སྐུ་འཁྲུངས། ཆུང་དུས་ནས་འཁོར་གདོང་དགོན་དུ་ཆོས་ཞུགས་གནང་སྟེ་སྤྲུལ་སྐུ་ཚུལ་ཁྲིམས་བཟང་པོས་༼ཆོས་དབྱིངས་ཁྱབ་བརྡལ་༽ཞེས་པའི་མཚན་གསོལ། སྤྲུལ་སྐུ་ཚུལ་ཁྲིམས་བཟང་པོ་དང། འཁོར་གདོང་འགྱུར་མེད་རྡོ་རྗེ་སྐུ་མཆེད་གཉིས་ལས་བྱང་གཏེར་གྱི་ཆོས་སྐོར་གསན་བཞེས་མཛད། གཡུ་ཁོག་བྱ་བྲལ་ཆོས་དབྱིངས་རང་གྲོལ་ལས་རྫོགས་ཆེན་གྱི་སྐོར་གསན་བཞེས་གནང་སྟེ་བླ་མས་ཐུགས་གཙིགས་ཤིན་ཏུ་ཆེ་བར་མཛད་ཅིང། དེང་སང་གངས་རིའི་ལྗོངས་ན་འཇམ་མགོན་མི་ཕམ་རིན་པོ་ཆེའི་ཡིག་ཆ་འཛིན་པ་ལ་བོད་པ་སྤྲུལ་སྐུ་མདོ་སྔགས་བསྟན་པའི་ཉི་མ་ལས་མཁས་པ་སུ་ཡང་མེད་པས་ཁྱེད་ངེས་པར་དུ་བོད་སྤྲུལ་སྐུ་དྲུང་དུ་སློབ་གཉེར་ལ་སོང་དང་སྔ་འགྱུར་རང་ལུགས་ཟིན་པ་ཞིག་འོངས་ཞེས་བཀའ་གནང་།
བོད་པ་སྤྲུལ་སྐུ་མདོ་སྔགས་བསྟན་པའི་ཉི་མ་ཞེས་ཡོངས་སུ་གྲགས་པའི་མཁས་གྲུབ་དམ་པ་དེ་ཉིད་ཐུན་མིན་རིགས་ཀྱི་བདག་པོར་བསྟེན་ཏེ་ལོ་འཁོར་བཅོ་ལྔ་ཙམ་གྱི་རིང་ལ་འཇམ་མགོན་མི་ཕམ་རིན་པོ་ཆེའི་ཡིག་ཆ་གཙོ་བོར་གྱུར་པའི་སྔ་འགྱུར་རྙིང་མའི་ཆོས་སྐོར་ལ་སྦྱངས་པ་མཐར་ཕྱིན་པ་གནང་སྟེ་མཁས་པའི་གྲགས་པས་ཁྱབ་པ་བྱུང། ༡༩༥༩ ནས་བཟུང་དུས་འགྱུར་མི་བཟད་པའི་སྐབས་ལོ་ཉི་འཁོར་ཉི་ཤུའི་རིང་ལ་ཀློང་ཆེན་མཛོད་བདུན་སོགས་ལ་དཔེ་གཟིགས་རྒྱུན་མ་ཆད་པར་གནང་ཞིང་བླ་མ་ཡང་ཐིག་གི་ཁྲིད་སྦྱངས་དང་། རྩ་རླུང་གི་ཉམས་ལེན་ལ་བརྟེན་པའི་བཅུད་ལེན་ཁོ་ན་གནང་བའི་དཀའ་སྤྱད་མཛད། སྐུ་ལུས་ཧ་ཅང་གི་སྐམ་པོར་གྱུར་ཏེ་ཕྱག་ནམ་མཁར་འགྱོག་ཚེ་ལག་ངུར་གྱི་རུས་རྐང་གཉིས་ཀྱི་བར་ནས་ཉི་མའི་འོད་མཐོང་ཐུབ། རྟེན་དགེ་ཚུལ་ཡིན་ཀྱང་འདུལ་བའི་གཞུང་ནས་བཤད་པའི་ཉེས་བྱས་ཕྲ་མོས་ཀྱང་མ་གོས་པའི་དགེ་ཚུལ་ཞིག་ཁོང་མ་གཏོགས་བོད་ཡུལ་འདིར་དེང་སང་མེད་ཅེས་བརྗོད་ཆོག ཆོས་རྗེ་འཇིགས་མེད་ཕུན་ཚོགས་ཀྱི་ཞལ་སྔ་ནས་ཀྱང་དེང་དུས་ཀྱི་མི་ལ་རས་པ་གཉིས་པ་ཞེས་བསྔགས་བརྗོད་ཡང་ཡང་གནང་། ཁོང་གི་སྐུ་ཚེ་གང་པོར་ཀུན་སྤངས་བྱ་བྲལ་བའི་བརྟུལ་ཞུགས་དང་དུ་བླངས་པས་ཁོང་ལྟ་བུའི་ཆོས་པ་རྣམ་དག་ཅིག་དུས་རབ་ཉེར་གཅིག་པའི་མཇུག་འདི་ན་མེད་ཅེས་བཤད་ཀྱང་རྫུན་དུ་མི་འགྱུར། ༡༩༨༠ ཙམ་ནས་རྒྱལ་ཁབ་ཀྱི་རྩ་ཁྲིམས་གུ་ཡངས་ཅུང་ཟད་བྱུང་བ་དང་སྟབས་བསྟུན་ཏེ་གསེར་རྟ་ལི་མདོ་ས་ཆ་རུ་ཆོས་འཆད་ཉན་གྱི་འགྲོ་དོན་བསྐྱངས་སྟེ་སློབ་ཚོགས་མང་དུ་བྱུང་། ཁོང་གཤེགས་ལོ་ནི་དགུང་གྲངས་དོན་བརྒྱད་ ༧༨ བཞེས་པ་སྤྱི་ལོ་ ༡༩༩༧ བོད་རབ་བྱུང་བཅུ་བདུན་པའི་མེ་གླང་ཧོར་ཟླ་གསུམ་པའི་ཚེས་གསུམ་ ༣ གྱི་ཕྱི་དྲོའི་ཆ་ལ་ཞིང་གཞན་དུ་གཤེགས། འདས་རྗེས་སུ་ངོ་མཚར་བའི་རྟགས་འཇའ་འོད་ཀྱི་བཀོད་པ་དང་གདུང་རིང་སྤྲེལ་སོགས་བྱུང་༎
