གློ་སྨོན་ཐང་གི་རྒྱལ་པོ་མཐའ་མ་ཚེ་ལས་འདས་པ།
བལ་ཡུལ་གྱི་ནང་པའི་རྒྱལ་ཁམས་གློ་སྨོན་ཐང་གི་རྒྱལ་པོ་མཐའ་མ་འཇིག་མེད་རྡོ་རྗེ་དཔལ་འབར་བྷི་ས་ཏ་ལོ་༨༦ ཐོག་གྲོངས་ཡོད་འདུག་པ་དང་། བལ་ཡུལ་གྱི་རྒྱལ་ས་ཀ་ཐི་མན་ཊོར་མཆོད་འབུལ་སྨོན་ལམ་དང་། མི་མང་གིས་ཁོང་གི་ཕུང་པོ་ལ་མཇལ་ཁ་ཞུ་བཞིན་ཡོད་འདུག
ཁོང་གིས་གློ་སྨོན་ཐང་གི་རྒྱལ་པོ་ལོ་བཞི་བཅུ་ཞེ་བཞི་ལྷག་བྱས་ཡོད་འདུག་པ་དང་། ཕྱི་ལོ་༢༠༠༨ ལོར་བལ་ཡུལ་གྱིས་རྒྱལ་པོའི་ལམ་ལུགས་མེད་པ་བཟོས་རྗེས། ཁོང་གི་རྒྱལ་པོའི་གོ་གནས་མེད་པ་ཆགས་ནས། ཁུལ་དེར་ཆོས་ལུགས་ཀྱི་དབུ་ཁྲིད་ཀྱི་འགན་ཁུར་ནས་བསྡད་ཡོད་འདུག་པ་དང་། མི་མང་གིས་ཁོང་ལ་དད་གུས་ཆེན་པོ་བྱེད་ཀྱི་ཡོད་འདུག
ཁོང་གིས་མི་ཚེ་ཕལ་མོ་ཆེ་གློ་སྨོན་ཐང་ལ་བསྐྱལ་ཡོད་འདུག་ཀྱང་། རྗེས་སུ་འཕྲོད་བསྟེན་གྱི་དཀའ་ངལ་ལ་བརྟེན་ནས་ཀ་ཐི་མན་ཊོར་སླེབས་འདུག་ཀྱང་། ཟླ་འདིའི་ཚེས་༡༦ ཉིན་གྲོངས་ཡོད་འདུག
ཁོང་ནི་གློ་སྨོན་ཐང་གི་རྒྱལ་པོའི་བུ་གསུམ་པ་དེ་ཡིན་འདུག་པ་དང་། བོད་གཞིས་ཀ་རྩེར་དགེ་རྒན་ཟུར་བསྟེན་ཐོག་སློབ་སྦྱོང་བྱས་མྱོང་ཡོད་འདུག་པ་དང་། ཕྱི་ལོ་༡༩༦༤ ལོར་གློ་སྨོན་ཐང་གི་རྒྱལ་པོར་བསྐོ་གཞག་བྱས་ཏེ་ལོ་གཞོན་པའི་སྐབས་སུ། ཨ་རིའི་གསང་བའི་ལས་ཁུངས་ཀྱི་རྒྱབ་སྐྱོར་བྱས་པའི་ཆུ་བཞི་སྒང་དྲུག་འཇབ་དམག་གི་དམག་སྒར་ལ་རྒྱབ་སྐྱོར་བྱས་ཡོད་འདུག །
གསར་འགོད་པ་སྐལ་བཟང་དོན་གྲུབ།
