༧རྒྱལ་བ་རིན་པོ་ཆེ་མཆོག་གིས་བཀའ་གང་གནང་བ་དེ་ས་ཆ་གང་འདྲ་ཞིག་དང་དུས་ཚོད་ག་དུས་ཡིན་ནའང་མ་བརྗེད་པ་བྱེད་དགོས།

དཔལ་ས་སྐྱ་གོང་མ་བདག་ཁྲི་རིན་པོ་ཆེ་མཆོག་གིས་བོད་ནས་ཕེབས་པའི་ཆོས་ཞུ་བ་རྣམས་ལ་༧གོང་ས་༧་རྒྱལ་བ་རིན་པོ་ཆེ་མཆོག་གིས་བཀའ་གང་གནང་བ་དེ་ས་ཆ་གང་འདྲ་ཞིག་དང་དུས་ཚོད་ག་དུས་ཡིན་ནའང་མ་བརྗེད་པ་བྱེད་དགོས་པ་དེ་གལ་ཆེན་པོ་རེད་ཅེས་བཀའ་སློབ་གནང་སོང་།

ཕྱི་ལོ་༢༠༡༧ ཟླ་༡ ཚེས་༡༠ ཉིན་གནས་མཆོག་རྡོ་རྗེ་གདན་དུ་དཔལ་ས་སྐྱ་༧གོང་མ་བདག་ཁྲི་རིན་པོ་ཆེ་མཆོག་གིས་བོད་ནས་གསར་དུ་ཕེབས་པའི་གནས་སྐོར་དང་ཆོས་ཞུ་བ་རྣམས་ལ་བཀའ་སློབ་ལམ་སྟོན་དང་། དཔལ་ས་སྐྱའི་ཐུན་མོངས་མ་ཡིན་པའི་རྡོ་རྗེ་ཕུར་པའི་བཀའ་དབང་བཅས་གནང་ཡོད་པ་རེད།

དེ་ཡང་ཐོག་མར་དཔལ་ས་སྐྱ་གོང་མ་བདག་ཁྲི་རིན་པོ་ཆེ་མཆོག་གིས་བོད་ནས་ཕེབས་པའི་ཆོས་ཞུ་བ་རྣམས་ལ། གནས་ཁྱད་པར་ཅན་ལ་༧གོང་ས་སྐྱབས་མགོན་ཆེན་པོ་མཆོག་གིས་ཟབ་ཅིང་རྒྱ་ཆེའི་དཔལ་དུས་ཀྱི་འཁོར་ལོའི་དབང་ཆེན་ཞུ་རྒྱུའི་སྐལ་པ་བཟང་པོ་དེ་འདྲ་ཞིག་ལ་ང་ཚོ་མཉམ་དུ་འཛོམས་པ་དང་། དམིགས་བསལ་བོད་ནས་ཕེབས་པ་དང་འདིར་འཛོམས་པ་ཚང་མར་མཛའ་བརྩེ་ལྡན་པའི་འཚམས་འདྲི་ཡོད་ཅེས་གསུངས་སོང་།

 ཁོང་གིས་ཆོས་ཟེར་བ་དེ་སོ་སོས་ཉམས་སུ་ལེན་དགོས་པ་ཞིག་ལས་མི་གཞན་ཞིག་གིས་བྱེད་ནས་གོ་ཆོད་པ་དང་སོ་སོས་བྱེད་མི་དགོས་པ་ཞིག་མིན་སྐོར་དང་།  ང་ཚོས་ད་ལྟ་སྤྱིར་མི་ལུས་དང་དེའི་ནང་ནས་དལ་འབྱོར་གྱི་མི་ལུས། ཡང་སྒོས་སུ་འཕགས་མཆོག་ཕྱག་ན་པདྨོའི་རྗེས་སུ་འཛིན་པ་དེ་འདྲིའི་སྐལ་བ་དང་གོ་སྐབས་བཟང་པོ་ཞིག་ཡོད་དུས་རང་གིས་རང་མི་བསླུ་བ་ཞིག་བྱེད་དགོས་གལ་གནད་ཡིན་སྐོར་དང་།

 མི་སུ་ཞིག་ཡིན་ནའང་སྡིག་པ་མི་བྱེད་རྒྱུ་དང་དགེ་བ་སྒྲུབ་འདོད་ཀྱི་བློ་ཡོད་པ་དང་། ཡག་པོ་ཞིག་བྱེད་དགོས། སྐྱིད་པོ་བདེ་བོ་ཞིག་བྱུང་ན་བསམ་མཁན་ཞིག་མ་གཏོགས།  ངས་སྡུག་པོ་ཞིག་བྱེད་དགོས་བསམས་པ་སུ་ལ་ཡང་མེད་ཀྱང་།  རང་གི་སེམས་རྒྱུད་མ་དུལ་དུས་བྱེད་ཐུབ་ཀྱི་མེད་སྟབས། སེམས་རྒྱུད་འདུལ་ཐབས་སུ་འབད་རྩོན་བྱེད་དགོས་པ་གལ་ཆེན་པོ་ཡིན་སྐོར་བཀའ་གནང་སོང་།

ཁོང་གིས་མུ་མཐུད་ནས་བཀའ་གནང་དོན། ཐེངས་འདིར་ཁྱེད་རང་ཚོ་དཀའ་བ་དང་དུ་བླངས་ནས་གསུངས་ཆོས་དང་དུས་འཁོར་དབང་ཆེན་ཞུ་རྒྱུའི་གོ་སྐབས་ཐོབ་པར་ཧ་ཅང་གི་སྐལ་བ་བཟང་པོ་ཡིན་དུས། ༧ གོང་ས་༧རྒྱལ་བ་རིན་པོ་ཆེ་མཆོག་གིས་བཀའ་གང་གནང་བ་དེ་ས་ཆ་གང་འདྲ་ཞིག་དང་དུས་ཚོད་ག་དུས་ཡིན་ནའང་མ་བརྗེད་པ་བྱེད་དགོས་རྒྱུ་གལ་ཆེན་པོ་ཡིན་ལ།  ༧གོང་ས་མཆོག་གིས་བཀའ་གང་གནང་བ་དེ་ཡང་ནས་ཡང་དུ་དྲན་གསོ་གཏོང་དགོས་པ་དང་། ཡང་ནས་ཡང་དུ་ཡིད་ལ་འཇགས་པ་བྱས་ནས་ཉིན་ཞག་རེ་རེའི་ནང་ལའང་ཉམས་ལེན་བྱེད་ཐུབ་པ་ཞིག་བྱུང་ན། ཚེ་འདིའི་རྐྱེན་བར་ཆད་སེལ་ཆེད་ཟེར་ན་འདྲ། སྐྱེ་བ་ཕྱི་མའི་ལམ་རྒྱག་ཟེར་ན་འདྲ། འདི་ཕྱིའི་ལེགས་ཚོགས་ཐམས་ཅད་ནང་བླ་མའི་བཀའ་སྒྲུབ་པ་ལས་ལྷག་པ་ཅིག་ཡོད་པ་མ་རེད་ཅེས་གསུངས་སོང་།

རྡོར་གདན་ནས་གསར་འགོད་པ་ཐུབ་བསྟན་བཀྲ་ཤིས་ཀྱིས།