གངས་ཅན་བུ་རབས་གསར་པའི་ན་ཚ།
གོས་སྔོན་ཅན་གྱི་རུ་སྟར་བསྒྲིགས་པ་དེ།།
གངས་ལྗོངས་དབའ་བོའི་སྙིང་སྟོབས་འཇོམས་པ་མེད།།
གངས་རི་བུ་ཡི་སྙིང་སྟོབས་གསོ་བ་ལས།།
མེ་ལྕེ་འཇོམས་པའི་ཆབ་ཆུ་ག་ལ་ཡིན།།
འཛིན་མའི་ལྟོ་བ་ཕྲལ་ནས་གཏེར་བཏོན་དེ།།
ན་ཚ་འཇོམས་པའི་གཤག་བཅོས་ག་ལ་ཡིན།།
ཁོང་ཁྲོའི་ཁྲག་གི་རྒྱུན་དེ་འཁྱོལ་བ་ལས།།
གངས་ཅན་གཞོན་ནུའི་ན་ཚ་ཤིན་ཏུ་མཆེད།།
ལམ་གྱི་གདོང་ངོས་ཁྲ་སིང་ཙམ་གྱི་ནི།།
ཤིན་ཏུ་གསར་སྐྲུན་ཆེར་སྐད་བསྒྲགས་མོད་ཀྱང་།།
གཡོ་ཅན་སྒེག་མའི་ཞལ་མཆུ་དམར་བ་དེས།།
གངས་ཅན་བུ་ཡི་སེམས་པ་ག་ནས་བསླུ།།
འབྲལ་མེད་ཆ་ཤས་བསྒྲགས་པའི་སྐད་མཐོ་ཡང་།།
དོན་ལ་ཆོལ་གསུམ་ཕོ་མོའི་ཟུང་ཁྲག་ལས།།
གངས་དཀར་ཤོག་བུའི་ཐོག་ཏུ་ལོ་རྒྱུས་ཕབ།།
འབྱུང་འགྱུར་བུ་རབས་གསར་པས་མ་མཐོང་ཅི།།
ཡར་ཐོན་རྒྱལ་ཁབ་མང་པོས་གཅིག་མཐུན་གྱིས།།
ཞིི་བདེ་དེད་དཔོན་མཚན་སྙན་ཕུལ་བ་ལ།།
འཇིགས་སྐུལ་ཁ་བྲལ་སོགས་ཀྱི་གཏམ་བཤད་དེས།།
སྐྱག་དྲི་ཕྱི་རུ་དྲོ་བར་སུ་ཞིག་མགུ།།
སུ་ཞིག་ལ་ཡང་གཟིགས་པ་གཉིས་མེད་པའི།།
ཐུགས་རྗེའི་ཞི་བདེ་དཀར་པོའི་འོད་གང་བར།།
དབྲལ་བྱ་མེད་པའི་ཁ་བྲལ་རིང་ལུགས་ཞེས།།
ཚེ་གང་ཕྱི་ཡུལ་བརྫངས་པའི་འགན་དེ་ལྕི།།
མདོ་དབུས་ཁམས་ཀྱི་སྐྱེ་བོའི་ཁོག་པ་ལས།།
དམར་ཆུང་སྙིང་ཟླུམ་བཏོན་ཏེ་ནད་གྲོལ་བའི།།
ཐབས་ཚུལ་བསྲིངས་པའི་དམར་པོའི་དབང་འཛིན་གང་།།
བླུན་པོའི་སྤྱང་ཁུལ་ཟློས་གར་ངོ་མཚར་ཆེ།།
ཉམ་ཆུང་མེས་པོ་ཕོ་མོ་སྤུན་མཆེད་སོགས།།
གདུག་སྤྱོད་གྲངས་མེད་འོག་ནས་སྦྱར་བའི་མཐར།།
མེ་མདའི་ཁ་སོའི་ལམ་དུ་བསྒྱུར་བ་དེས།།
ཁྲིམས་མཐུན་ཡིན་ཞེས་བདེན་དཔང་ཇི་ལྟར་སྒྲོགས།།
གལ་ཏེ་དབང་འཛིན་ཁྱོད་ལ་ལྐོག་ཟ་སོགས།།
ཁྲིམས་འགལ་བཏགས་ནས་མནར་གཅོད་སྦྱོར་བ་དང་།།
མེ་མདའི་ལྕགས་རིང་ལྟག་ཁུང་འཇོག་པ་ན།།
དེ་ཚེ་ཁྱོད་ཀྱི་བསམ་པ་ག་ལ་བསྒྱུར།།
མེས་རྒྱལ་གཅིག་གྱུར་སྐད་བསངས་མཐོ་མོད་ཀྱང་།།
སོ་སོའི་མེས་རྒྱལ་སོ་སོས་བསྐྱང་བ་ལས།།
རྔམ་ཆེན་མཆེ་བ་བགྲོད་ཉེན་ཤོར་བ་ན།།
རྔོན་པའི་མདའ་སོའི་ཁ་ལ་འགྲོ་ཉེན་ཆེ།།
འབངས་མིའི་བདེ་སྡུག་རྟག་ཏུ་ཁར་ཁྱེར་ནས།།
མི་རིགས་གཞི་རྩ་བརླག་པའི་སྲིད་ཇུས་འཛིན།།
ཕྱི་རུ་མི་མངོན་ནང་རོལ་རྔམ་པ་ཡི།།
སྲིན་བུའི་མཆེ་བས་གཙིགས་པ་སྡོད་བཟོད་ཅི།།
