ཁྱེད་ཀྱི་དོན་དུ་ངུ་བ་ཉུང་ཉུང་མིན།
སྐྱེད་མ།
མཐོ་སྒང་གི་ལོ་ཟླ་བསྐྱར་བོ་དེའི་སྔར་བཞུད་དུ།
གཅེས་ཕྲུག་ངས། བེའུ་དང་མཉམ་དུ་རྩེ་འཇོལ་རོལ་དུས།
སྐྱེད་མ། ཁྱེད་ཀྱིས་སྦྲ་གུར་ནས། ཡོད་ཚད་ནས་ཡོད་ཚད།
སྙིང་ཁུང་ནས་འཛུམ་པའི་བཅོས་མིན་གྱི་བརྩེ་བ་དང་།
ངག་སྒོ་ནས་འབོད་པའི་གཅེས་མིང་གི་དབྱངས་རྟ་སྙན་མོ་དང་།
རྟ་བདུན་གྱི་འོད་ཟེར་དང་མཚུངས་པའི་ཁྱེད་ཀྱི་སྤྱན་གཟུགས།
བདག་ལ་འཕངས་བར་ཉུང་ཉུང་དེ་བས་མིན།
སྐྱེད་མ།
དུས་ཚིགས་ཤིག་གི་འགྱུར་འགྲོས་དང་བརྟེན་ནས།
སྟོང་ལོ་དྲུག་པའི་ཟླ་བ་བརྒྱད་པའི་ཚེས་བཅུ་ཡི་ཞོགས་པ་དེར།
ངེད་མ་བུ་གཉིས། མཉམ་འཛོམས་ཀྱི་དུས་དེ་ཡིན་ལ།
ངེད་མ་བུ་གཉིས། གྱེས་བྲལ་གྱི་དུས་ཚིགས་ཤིག་ཀྱང་ཡིན།
སྐྱེད་མ། ཞོགས་པ་དེར་ངེད་མ་བུ་གཉིས་ལ་མཚོན་ན་ཅི་འདྲའི་སྡུག་བསྔལ་ཆེ་ཨང་།
སྐྱེད་མ།
འཇིག་རྟེན་པའི་ཁ་དཔེར་ཞིག།
འཛོམས་པའི་མཐའ་མར་བྲལ་བར་ནི་ཆོས་ཉིད་ཞེས་པའི་གསུངས་འདི།
ཅི་འདྲའི་ལེགས་བཤད་གཅིག་རེད་ཨང་། སྔོན་བསགས་ཀྱི་བག་ཆགས་སམ།
ལས་དབང་གི་དད་པའི་ཟག་བཅས་ཀྱི་ལུས་ཕུང་འདི།
རླུང་བུས་དད་པའི་བྱ་སྤུ་དང་ཅི་མི་མཚུངས་ཨང་། གཞོན་ནུ་ངས།
ཐ་ན་རང་ཡུལ་གྱི་མཁའ་དབུགས་གཙང་མ་འདི་རྔུབ་མ་ཁོམ་པར།
མི་འདོད་པའི་འཁྱར་མ་འཁྱོར་གྱིས་གོམ་རེ་རེ་བསྒྱུར་བཞིན།
ཆེས་ང་ཡ་བའི་མི་ཡུལ་དུ་བརྫངས་ཐལ།