འགྱུར་བ་གཏོང་རན་འདུག

བོད་དོན་འཐབ་རྩོད་དང་རྒྱལ་སྤྱིའི་ཆབ་སྲིད་ཀྱི་འཁོར་ཕྱོགས་གང་ཐད་ནས་བལྟས་ཀྱང་བོད་དོན་འཐབ་རྩོད་ཀྱི་ལངས་ཕྱོགས་སམ། དམིགས་ཡུལ་ལ་འགྱུར་བ་ཆེན་པོ་ཞིག་ངེས་པར་གཏོང་རན་པ་ལྟ་བུར་གྱུར་ཡོད། ཉེ་ཆར་ཨ་རིའི་གྲོས་ཚོགས་གོང་འོག་ནས་བོད་དོན་ཐད་གྲོས་ཆོད་བཞག་པ་དང་། བོད་ཀྱི་སྲིད་སྐྱོང་ཕོ་བྲང་དཀར་པོར་གདན་ཞུས་ཀྱིས་ཨ་རིའི་སྲིད་གཞུང་གི་གནད་ཡོད་མི་སྣ་རྣམས་ལ་མཇལ་འཕྲད་གནང་བ་ནི་འགྱུར་བ་ཆེན་པོ་རེད། ལོ་འདིར་རྒྱ་དཀར་ནག་གཉིས་ཀྱང་བོད་དང་རྒྱ་གར་གྱི་ས་མཚམས་དང་འབྲེལ་བའི་ཐོག་འཁྲུག་པ་བརྒྱབ་ནས་དམག་མི་མང་པོ་གསོད་རེས་བྱས་ཡོད་པ་དང་། ད་ལྟའི་ཆར་ཡང་འཐབ་འཁྲུག་རྒྱུན་ཆད་མེད། རྒྱ་གར་གྱི་སྲིད་བློན་མོ་དྷི་ཡི་ཞལ་ནས་ད་བར་ས་མཚམས་དང་འབྲེལ་བའི་ཐོག་ནས་བོད་ཀྱི་གནད་དོན་ཁ་གསལ་གླེང་པ་ཞིག་ཕལ་ཆེར་བྱུང་མེད་ཀྱང་། རྒྱ་གར་གྱི་གསར་འགྱུར་བརྒྱུད་ལམ་ཁག་དང་། རྒྱ་གར་གྱི་ཆབ་སྲིད་ཆེད་མཁས་པ་རྣམས་ཀྱིས་ས་མཚམས་རྩོད་རྙོག་སོགས་དང་འབྲེལ་ནས་བོད་དོན་གྱི་གལ་གནད་གླེང་སློང་ཆེ་བའི་སྐབས་ཡིན།

སྤྱིར་བོད་ཀྱི་གནད་དོན་ཐག་གཅོད་བྱེད་ཕྱོགས་དེ་རྒྱལ་ཁབ་གཞན་གྱི་ཆབ་སྲིད་ཀྱི་འཁོར་ཕྱོགས་ཁོ་ན་དང་བསྟུན་དགོས་པ་ཞིག་མིན་ནའང་། ད་བར་རྒྱལ་སྤྱིའི་ཆབ་སྲིད་ཀྱི་འཁོར་ཕྱོགས་ཐོག་ནས་རྒྱ་གཞུང་ལ་བསྟུན་མཁས་ཆེན་པོ་བྱེད་བཞིན་པའི་སྐབས་སུ་བོད་ཀྱི་རྩ་དོན་འཐབ་རྩོད་ཀྱང་དེ་དང་ཕྱོགས་མཚུངས་ཤིག་བྱེད་མ་ཐུབ་ན། བོད་དོན་འཐབ་རྩོད་དེ་རྒྱལ་སྤྱིའི་ཐོག་ནས་གྲོགས་མེད་ཁེར་རྐྱང་དུ་འགྱུར་ཉེན་ཡོད་པའི་སྔོན་དཔག་དང་ཐག་གཅོད་དེ་ལ་རྒྱུ་མཚན་ཡོད་ཀྱང་། ད་ལྟའི་ཆར་བཙན་བྱོལ་བོད་གཞུང་གི་ངོས་ནས་མུ་མཐུད་རྒྱ་ནག་གི་རྩ་ཁྲིམས་ཀྱི་སྒྲོམ་གཞིའི་འོག་ནས་མི་རིགས་ས་གནས་རང་སྐྱོང་གི་གནས་བབས་རག་ན་འགྲིག་པའི་ལངས་ཕྱོགས་དེ་མཐའ་འཁྱོངས་གནང་ནས། རྒྱ་གཞུང་གིས་ངོས་ལེན་དང་ཐག་གཅོད་གསལ་པོ་ཞིག་བྱེད་པའི་དབང་དུ་བཏང་ན། བསམ་བློ་གཏོང་ས་ཞིག་ཡོད་ཀྱང་། དེའང་མ་བྱུང་བར་རྒྱལ་སྤྱིའི་ཁྱོན་ནས་རྒྱ་གཞུང་ལ་ཁ་གཏད་གཅོག་པའི་འཕེལ་ཕྱོགས་འདིའི་ཐོག་ནས་བོད་དོན་དེ་གྲོགས་མེད་ཁེར་རྐྱང་ཞིག་ཏུ་འགྱུར་རྒྱུ་ལས་མེད་པ་དེ་ཧ་ཅང་གསལ་པོར་གྱུར་ཡོད།

སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་འགྲོ་བ་མི་ཙམ་དུ་མ་ཟད། སྐྱེ་འགྲོ་ཡོངས་ལ་བྱམས་སྙིང་རྗེས་གཅིག་མཚུངས་སུ་གཟིགས་པའི་རླབས་ཆེ་བའི་དགོངས་གཞི་འདི་ལ། བདུད་སྡིག་ཅན་རྒྱ་དམར་གཞུང་གིས་ངོས་ལེན་གཏན་ནས་གནང་གི་མེད་པ་དང་། ༧གོང་ས་མཆོག་གི་དགུང་ནའི་བབས་སོགས་ལ་གནས་དུས་ཚོད་རྩིས་བྱེད་བཞིན་ཡོད། རྒྱ་གཞུང་དང་མཉམ་དུ་སྡོད་རྒྱུའི་སྲིད་བྱུས་འདི་ལ་བརྟེན་ནས་བཟང་ཐག་ངན་ཐག་ཅིག་ཆོད་སོང་ན་འགྲིག་པའི་དབང་དུ་བཏང་ཆོག་མོད། དེ་ཡང་མ་བྱུང་བར་བཙན་བྱོལ་བོད་པའི་སྤྱི་ཚོགས་ནང་སྲིད་བྱུས་འདི་ལ་འགྲེལ་བཤད་དང་ལོག་འགྲེལ་ཧ་ཅང་མང་པོ་བརྒྱབ་པ་ལ་བརྟེན་ནས། ད་ལྟའི་ཆར་རྒྱལ་ཁབ་སོ་སོའི་རྒྱ་དམར་གཞུང་ཚབ་ཏུ་འགྲོ་མཁན་དང་། དེ་དག་གི་ས་ནས་སྒེར་གྱི་ཁེ་ཕན་ལེན་མཁན་སོགས་ཀྱང་དབུ་མའི་ལམ་གྱི་སྲིད་བྱུས་ཡིན་རབས་ཤོད་མཁན་མང་དུ་འགྲོ་བཞིན་ཡོད་པས། བོད་དོན་ཐད་སེམས་ཤུགས་ཡོད་མཁན་མང་པོ་ཞིག་རང་རང་གི་ས་ནས་གཡོལ་གང་ཐུབ་བྱེད་མཁན་མང་ནས་མང་དུ་འགྲོ་བཞིན་ཡོད།

བོད་དོན་ཐག་གཅོད་ཀྱི་ཐོག་ནས་ནུས་པ་འཐོན་རྒྱུར་དཀའ་ངལ་ཆེན་པོ་འཕྲད་ཡོད་པ་དང་། རྩ་དོན་འཐབ་རྩོད་ཀྱི་ཐོག་ལ་འགན་ཁུར་ཡོད་མཁན་གྱི་མི་སྣ་ཡང་རང་རང་སོ་སོའི་ས་ནས་གཡོལ་ཏེ་གུད་དུ་སྡོད་བཞིན་ཡོད། རྒྱ་དམར་གཞུང་གི་དཔོན་རིགས་ལ་སྣེ་ལེན་བྱེད་མཁན་དང་། གཞུང་ཚབ་ཁང་ཁག་ཏུ་སོང་ནས་གསོལ་སྟོན་ལ་རོལ་བ་སོགས་ཀྱང་ཅུང་རྒྱུན་ལྡན་ཅན་དུ་འགྱུར་བཞིན་པའི་ཐོག་ལ། བོད་རང་བཙན་ནམ་བོད་ཀྱི་བདག་དབང་སླར་གསོ་བྱ་རྒྱུའི་འབོད་ཚིག་ཙམ་ལའང་རྣམ་རྟོག་སྐྱེ་བཞིན་པའི་བསམ་ཚུལ་ཞིག་རྒྱ་ཡན་དུ་འགྲོ་རྒྱུའི་ཉེན་ཁ་ཆེན་པོར་གྱུར་ཡོད། རྒྱ་གཞུང་གིས་གནས་སྟངས་འདི་ལ་རྒྱུས་ལོན་དང་། མི་སྣ་ཆེད་གཏོང་གིས་བོད་ནང་དང་བཙན་བྱོལ་སྤྱི་ཚོགས་སུ་བསམ་ཚུལ་འདི་རྣམ་པ་འདྲ་མིན་གྱི་ཐོག་ནས་དར་ཁྱབ་ཏུ་གཏོང་ཐབས་བྱས་ནས། གྲུབ་འབྲས་ཆེན་པོ་ཐོན་རྒྱུར་བར་ཐག་ཉེ་རུ་འགྲོ་བཞིན་ཡོད། དེར་བརྟེན་བོད་མིའི་སྒྲིག་འཛུགས་ཀྱི་སྲིད་བྱུས་རྒྱ་དམར་གཞུང་གི་མགོ་ཁྲིད་ཀྱི་འོག་ཏུ་སྡོད་འཆར་དེ་ནི་རལ་གྲི་སོ་གཉིས་མ་བརླ་བར་དུ་ལྷུང་བ་ལྟར་ཉེན་ཁ་ཅན་དུ་གྱུར་ཡོད།

མདོར་ན་གནད་དོན་འདི་ནི་ཚོར་བ་རྐྱང་པ་ཙམ་གྱིས་ཐག་གཅོད་བྱེད་ཆོག་པ་ཞིག་མིན་ལ། ཚོར་བ་གཏན་ནས་མེད་པའི་ཐོག་ནས་ཐག་གཅོད་བྱེད་ཐུབ་པ་ཞིག་ཀྱང་མིན། རྒྱ་གཞུང་གི་འོག་ཏུ་སྡོད་རྒྱུར་དཀའ་ངལ་ག་རེ་ཡོད་མེད་ནི། བོད་དང་ཤར་ཏུར་ཀི་སི་ཐན་སོགས་ཀྱི་གནས་སྟངས་ཐོག་ནས་གསལ་པོར་གྱུར་ཡོད་ལ། དེང་དུས་ཧོང་ཀོང་གི་གནས་སྟངས་ཐོག་ནས་དེ་བས་ཀྱང་ཁ་གསལ་དུ་སོང་ཡོད། གནད་དོན་འདི་དག་ལ་བརྟེན་ནས་ཐའེ་ཝན་མི་མང་གི་ངོས་ནས་ཀྱང་བསམ་བློ་ཞིབ་ཚགས་བཏང་ནས་སྲིད་འཛིན་འོས་བསྡུ་བྱས་ཡོད་པ་དང་། རྒྱལ་སྤྱིའི་ཐོག་ནས་ཀྱང་ད་ལྟ་བོད་ཀྱི་སྲིད་བྱུས་འདི་ཉིད་གྲོགས་མེད་ཁེར་རྐྱང་དུ་ལུས་རྒྱུའི་ཚད་དུ་སླེབས་ཡོང་གི་ཡོད་སྟབས། གནད་དོན་དེའི་ཐོག་ལ་༧གོང་ས་མཆོག་ཞལ་བཞུགས་པའི་སྐབས་འདིར་འགྱུར་བ་ཞིག་གཏོང་མ་ཐུབ་ན། མ་འོངས་པར་གནད་དོན་འདིའི་ཐོག་ལ་རྒྱ་གཞུང་གིས་ལག་པ་བརྐྱངས་ནས་བཙན་བྱོལ་བོད་པའི་སྤྱི་ཚོགས་འདི་ཉིད་ཁ་འཐོར་དགུ་འཐོར་དུ་གཏོང་རྒྱུའི་ལག་ཆ་ངན་པ་ཞིག་ཏུའང་འགྱུར་ཉེན་ཆེན་པོ་ཡོད།།